Serebana Orang Ngena Whatsapp

Nama aku Nelap Anak Badas ( ukai nama amat aku nya). Aku berumur 45 taun. Diatu aku gawa nyadi eksekutif dalam bidang minyak enggau gas. Utai ti deka dicheritaka aku ditu nya lebih ngagai pengerawang ati aku senentang aplikasyen jaku pesan ke dikumbai whatsapp.

Tuju aku mantaika umur aku ba ats laban deka ngayanka ngagai kitai sebuat aku tu ukai nembiak agi, ukai rebak gen y sereta enda tentu lanchat dalam pengawa teknologi kemaya hari. Aku bisi anak tiga iku ke berumur entara lima ngagai 16 taun.

Sepengelama 20 taun aku udah gawa, jam bekereja ke selama jeman nya berengkah urung pukul 8:00 page nyentuk ngagai jam 6 lemai. Kadang-kadang bisi mega maya gawa lebih jam sereta dipajak ngagai jam 9:00 malam.

Chara kami bekomunikasyen enggau pangan diri ke sama gawa sereta enggau sida ke nyadi tuai seruran nengah char baum tauka betemu mua. Nadai siti-siti kereja digaga udah tembu jam gawa.

Taun nyin kemari bisi berubah baru chara kami gawa. Nengah chara ke enda rasmi dalam kompeni ubah nyadi lebuh whatsapp berengkah dikena nyadika media bekomunikasyen. Group tauka raban pan lalu ditumbuhka sereta nyau deka semua 25 iku pengereja pengawa aba unit kami bisi dipasukka dalam raban nya. Ari sukut teknologi, iya sigi bisi mantu pengereja pengawa bekaul enggau pangan diri. Tang besenutuk enggau nya mega bisi penanggul baru nyumbuk ari pekara tu. Diatu bala pengereja pengawa nyau dipansal gawa 24 jam. Semua kereja mega dipadahka bos nengah whatsapp.

Ketegal nya nyau nadai agi gawa ari jam lapan nyentuk ke jam enam lemai. Taja pan udah pulai ke rumah lalu jam terang-terang nunjukka pukul 12 tengah malam agi bisi pesan ari bos tama dalam whatsapp. Ukai kereja nya enda ulih ditangguh ngagai hari siti.

Enti suba, taja pan kereja nya enda ulih ditembu, kiraka agi bisi hari siti alai nampung pengawa nya. Kemaya hari tu lebuh udah bisi whatsapp, tumu-tumu pagi udah nerima pengawa baru; ambika banding baka ripot ke patut dipasuk ke dalam ripot enggau pengawa bukai. Tu enda nyengkaum jaku sengapa kada tauka jaku pesan ke ngangkatka burit bos.

Enda berasai sebulan nandan di langit, setaun nampun di bukit alai aku udah nempaya ruang bilik laban ke balat agi meratika telefon bebanding enggau pengawa ke betunga mua enggau bini anak. Aku nguji enda ibauka mesej ti tama dalam whatsapp taja pan padah jaku pesan dia terang-terang sigi nuju aku. Pangka ari ulah nya, hari siti aku kena anu laban enda malas mesej nya taja pan ulih ditimbal semina ngena seleka jaku ‘ok’.

Pekara ke sama diperatika aku nyadi mega aba raban apai moden kemaya hari tu. Jari sigi nadai meleka ari telefon binching. Tiap-tiap jam dipeda kinding-kinding minching telefon ke ulu ke ili. Indah maya makai malam ba restoran raban apai agi bisi maya malas mesej. Nyangka bisi ari sida nya baka aku mega dipejal nerima tanggung pengawa udah lepas ‘office hours’.

Aku kala dianu laban enda malas mesej taja pan dalam group nya nyata amat madahka aku udah nerima sereta macha mesej nya. Ya endang amat aku endang enda nibas laban maya nya benung enggau diri sebilik. Nya ke beguna agi ba penemu aku taja pan semina sesikin.

Ketegal aku baru setaun udah aku nemu pekara tu bos aku lalu madahka prestasi pengawa aku nyau majak nurun. Pengawa selama endang tetap aku tembu enggau naka penyampat tang nyangka ketegal KPI baru iya nya ‘enti enda malas pesan dalam whatsapp, nya dikira enda efisien’.