Tirai Kenang
Enti
maya hari indai tu tadi penulis bisi nguji nempa leka pelandai senentang hari
indai tang ke sekali tu aku nguji ngenangka pekara ti bisi kaul enggau apai
nyerumba hari apai ke deka datai kena 21 haribulan June 2015.
Ngelama
ke udah didinga penulis, kitai balat agi ngemasaka indai nengah chara ngintu
hari indai enggau chukup besai. Tang pekara tu enda nyadi ba raban apai taja
pan sida mega ngembuan tanggung pengawa
ke sama berat dalam ngemesai sereta ngiring ngembing anak sida. Nyerumba
hari apai ti deka datai tu aram kitai sama-sama beratika rintai bansa apai ke
dikerinduka kitai ke nyadi anak iya.
1 Apai ke kiruh enggau gajet
Iya
diperatika balat bendar kiruh enggau Nokia 3100 lebuh orang bukai udah pindah
ngagai telefon pintar tauka telefon chulik kenu ku orang kemaya hari tu.
Tang
enda mukai-mukai iya diatu udah bisi model ti pengabis baru ke ulih ngalahka
kitai bala anak iya. Apai ke kiruh bendar enggau gajet tu kekadang sampai ke
maya makai agi kiruh nyulih tablet nyau lebih ari sida ke biak.
Apai ke
bansa tu endang semampai orang ke
pengabis beguna dalam ruang bilik kelebih agi dalam raban ke ngena sistem pesan
jampat. Sida apai ke baka tu suah diperatika nganjung mayuh macham pekara baka
jerita ngeluji pasal apai, video senentang jelu ke manah dipeda sereta mayuh
macham pekara ke bisi nyadi dalam Internet. Raban apai ke baka tu mega rindu
bemain candy crush.
2 Apai ke trendy
Apai ke
baka tu endang nitihka pemansang kemaya hari. Chara enggau gaya iya ngena ngepan
mandangka iya nya orang ke nemu pasal pemansang pisin kemaya hari. Iya mega
ngembuan lagu rock ke pengabis baru dalam kerita iya.
Iya ulih
nampil sida ke nembiak redak berandau pasal trend ke baru baik nya pasal
kerita, gajet, selebriti tauka topik ti viral. Kitai ke anak iya berasai
temegah ati keluar bejalai enggau apai ke bansa tu lalu nadai malu madah iya
ngagai pangan kitai.
3 Apai ke ngerusakka pisin
Tu bisi
belaban enggau apai ke trendy. Apai ke bansa tu dikira 20 taun jauh tinggal ari
sukut ngepan enggau stail laban ke lantang agi enggau gaya lama. Iya suah agi
milih tali rekung ke nyelai sereta enda setipak enggau gari ke dikena. Kadang-kadang
iya lantang agi ngena tanchut jean tauka selipar lebuh bisi pengerami makai lemai. Taja pan baka nya
apai baka tu endang semampai nerima kasih sayau ari bala anak enggau bini iya. Nadai siku
orang dalam bilik nya kempang madahka tanchut bell bottom ke dikena iya
nya udah tinggal stail iya pisin dalam taun 1980an.
4 Apai ke kelalu ngungkung
Tu bansa
apai ke sanggup nganjung anak iya kini-kini endur ke dipinta anak iya. Iya sanggup
nganjung anak iya sampai kaki tangga rumah tawing anak iya. Iya semampai irauka
penunga anak iya, nangika utai ke enda manah tau nyadi ba anak iya. Nya alai,
tiap 15 minit bisi mih pesan jaku pandak tauka kangau telefon ari iya.
5 Apai ke landik nyumai
Enti ngelama
tu kitai kala ningan apai ke enda nemu nyumai, indah telu guring enggau ruti
paun pan tau angus. Tang maya udah berubah. Diatu mayuh apai udah digelar
masterchef tauka tukang masak. Apai ke bansa tu endang landik nyumai macham
lauk. Kekadang nya kala ngemaluka orang indu enggau resipi sereta lauk ke
dipanduk sida.
6 Apai ke mangah
Apai ke
bansa tu enda tentu mayuh jaku tang enti iya bisi udah chukup ngenakutka bala
anak iya. Diau jenuh iya ukai baka nyumbuh ke nangika ipuh, diau sunyi iya ukai
babi ke nangika sangkuh. Indah udah
besai pan bala anak agi berasai nangika apai sida. Enti iya bisi anak indu,
hahaha iya tu mih diketakutka pangan lelaki anak iya. Tusah deka enggau bejaku,
nama agi enti dibai berunding.
7 Apai ke ngembuan mayuh pengelandik
Tu ke
bansa apai ke nemu nempa ngaga sereta nyeruri enggau miki barang utai ke bisi
dalam rumah. Semua utai dibeli ari kedai DIY (Do-It-Yourself) lalu dipasang diri empu. Nyangka apai ke bansa tu
suba ada maya telefon nadai sereta tusah mimit deka ngangau tukang biki paip
tauka orang ba bengkel. Kemaya hari tu nyau deka semua utai kitai bepanggai ba
sida tukang biki paip, tukang ngadu letrik enggau teknisyen. Tang apai ke baka
tu enggau temegah ati madahka diri endang ulih dikarapka pasal betukang dalam
rumah.
8 Apai ke selalu bekenangka pekara lama
‘Maya
aku suba’ nya jaku ke suah bendar niti mulut apai ke bansa tu. Rambai jaku nya
suah nyadika panyun jaku apai. Apai ke bansa tu mega rindu meri jaku lalau
ngagai bala anak sereta becherita pasal pekara lama sereta baka ni pendiau
orang suba enggau diatu udah jauh bendar berubah. Apai ke nostalgik baka tu
endang ngembuan mayuh cherita lama ke manah-manah lalu iya enda sanggu nusi nya
ngagai bala anak iya. Apai ke baka tu ngajar kitai senentang pengeliat ati
enggau pemagas ngereja pengawa.
9 Apai super
Apai ke
bansa tu tau dikumbai superman. Kebuah
pia laban iya mih chunto apai ke bagas gawa sereta agi bisi awak pulai ke rumah
ngereja pengawa di rumah baka nyumai sereta beribun. Maya ujung hari iya mih ke
ngemataka bala anak iya ngaga kereja rumah ke diasuh pengajar sereta nusi
cherita ngagai anak iya sebedau sida tinduk.
10 Apai deriba ke pro
‘GPS’
reti nya Guna Pan Sesat (tesat). Nya jaku ke suah disebut apai ke bansa tu.
Apai ke bansa tu enda begunaka Waze laban iya nemu agi jalai sebelah menua sereta nemu jalai puntang lebih ari kar ke
dikena Google. Iya ulih datai dulu ari kitai taja pan nurun ari tempat ke sama
tang semina ke lain kerita. Nya pan kerita iya ke entudi engkitai.
Simpul Kenang
Nya baka
sekeda ari bansa apai ke dibai penulis kunsi enggau raban pemacha. Penulis berasai
betuah laban bisi dua iku apai – siku apai ke ngadaka lalu siku nya apai iru. Iya
ke ngada nya udah nadai tang iya ke ngiru nya agi bisi. Penulis besampi ke
semua apai di serata dunya gerai nyamai, gayu guru nguan menua. Selamat Hari
Apai ngagai semua apai!!!
Tiada ulasan:
Catat Ulasan