Pemansang Teknologi Mai Empas Negatif Ngagai Jaku Melayu

Pemansang teknologi penerang dikumbai ulih ngapus tauka ngelenyauka pemansang sesebengkah jaku. Ba dekad 1990-an maya internet aktif amat mansang, kitai semua enda terundingka jaku English ke bendar udah balat dikena mungkur serata dunya. Kuasa bansa baru tu nyau nempayaka jaku bukai ke bisi dikena ba dunya tu.

Jaku English dikena nyadi sebengkah jaku ba dalam aplikasyen teknologi penerang tu. Nya mih kebuah semua bansa ke bisi di dunya tu nyau mupuk belajar sereta meretika jaku English ngambika sida ulih mereti jaku English dikena sida napi teknologi penerang ke chakah amat mansang kemaya hari tu.

Pengawa megai kuasa chara baru tu nadai agi begunaka perintah sesebengkah menua nganjung raban soldadu sida ke chukup disikap enggau senyata dikena sida nyerang sereta ngalahka sesebengkah menua. Diatu sida balat agi bekuasa atas sesebengkah ngena chara 'bepikir.' Lebuh pikir tauka gaya runding rayat sesebengkah menua ulih dipegai, iya tau ngujungka rayat dia angkat ngelaban perintah sida empu. Tu mih ke nyadi aba dunya kemaya hari tu. Pemansang teknologi mai empas ke enda manah ngagai jaku  Melayu. Jaku Melayu diserang ketegal pemansang teknologi komunikasyen tu.

Serak tubuh ke deka datai jemah ila nadai ulih betatika jaku Melayu baka sida ke sebedau tu. Jaku Melayu menya kala nyadi medium dikena ngetanka bansa sereta ngelaban kuasa luar kelebih agi maya Malayan Union tang diatu nyau dikamahka orang ke empu jaku nya.

Sejarah mega ngayanka kitai, jaku Melayu napi sekeda jeman ke tusah sereta penuh enggau penguji. Penatai Portugis, Belanda enggau British mai empas ke jai ngagai jaku Melayu. Nya mih kebuah, evolusyen jaku Melayu mega beseranyat lubah nyingkang ketegal empas ari kuasa luar nya.

Kemaya hari tu, pemansang teknologi penerang enggau komunikasyen sekali agi nyerang jaku Melayu. Pemansang tu lalu nempa tukuh komuniti ti baru, struktur ekonomi baru ke balat agi bepelasarka  dunya siber sereta makit ke balat agi besemekih ba tikas makit antarabansa. Nya mih kebuah, jaku Melayu enda tau enda tegap sereta entap ngambika iya ulih dikena bejaku pasal nama-nama bidang ke balat bendar jampat nyumbuk sereta mansang dalam pengidup mensia.

Dalam majalah, The Economist ke dikeluarka maya pengujung Februari 2012 bisi siti topik ke dikumbai 'Embracing the Future,' ngingatka kitai mayuh senentang guna teknologi tauka pengelenyau teknologi nya. Nitihka runding David K Harrison, siku raban linguistik ari Swarthmore College di Pennsylvania madahka teknologi moden ulih nyelamatka jaku sereta mega ngemunaska jaku nya.

Teknologi ngeruga jaku

Harrison ke kala nulis dalam pansik iya pasal pengelenyau sesebengkah jaku ngembuan penemu optimis sereta pechaya teknologi pemadah nya sesebengkah pekara ti dianggap mensia mayuh tau ngeruga mayuh bansa jaku.

Jaku Melayu rojak kemaya hari tu nyau majak nyadi-senyadi laban ke nadai pengadang enggau sekat. Guna jaku Melayu dalam ruang siber diperatika balat bendar udah jauh nurun ari sukut tikas pemanah jaku kelebih agi ba laman siber ke alai berandau enggau pangan diri. Guna jaku Melayu dalam SMS, Facebook, WhatsApp, Telegram, WeChat enggau mayuh bengkah aplikasyen ti bukai nyau nadai agi ngena jaku Melayu ti betul tauka standard.

Ambika banding jaku Melayu ti suah diguna ba ruang siber baka jaku tu: "Perggh..gempak giler, terbaek, OK..orait, Ellemak ..lupa lak, Eeee..teruknya, chow, opocot, hek eleh." Jaku puntang mega seruran diguna baka: Pulak jadi lak, pergi jadi p, minta diri dulu jadi chow, sereta beratus-ratus agi tauka nyangka beribu-ribu ayat ke bukai. Fenomena baka tu tau ngamahka ukur pemanah asal jaku Melayu. Ayat ti ditengkebang enda nitihka ukum jalai jaku Melayu sereta dipeda enda engkeman.

Pengulih jaku Melayu ngetanka diri dalam era siber mayuh bepanggai ba pengulih mensia mayuh ke ngena jaku tu. Ulah mensia mayuh ngagai jaku Melayu ngasuh jaku tu mar tulihka penuduk ba tikas antarabansa. Ulah kitai empu ke nadai pengarap ke jaku tu mansang nyadi jaku penemu sereta nyadi jaku antarabansa ngujungka jaku Melayu terus tinggal ari ke besemekih enggau jaku bukai di dunya. Orang ke bejaku jaku Melayu rindu agi nguna jaku English tauka jaku rojak ti majak nyadi-senyadi sereta ngeruga pemanah jaku Melayu. Ba penemu sida, jaku Melayu enda sebaka tikas enggau jaku English lalu sida ngasaika diri elit agi enti sida nguna jaku English taja pan bejaku enggau orang Melayu. Sida ngumbai jaku rojak nya rindang agi sereta enda tentu formal. Nya alai kitai enda ulih enda nerima realiti ke madahka bidang teknologi penerang enggau komunikasyen tu penemu ti datai ari luar. Penemu tauka ilmu tu nadai bisi ditemu  dalam dunya Melayu. Taja pia, nya ukai reti iya kitai patut nitihka penemu Barat dalam ngasilka istilah ba bidang tu.

Besandingka artikel dalam Dewan Bahasa bulan March tahun 2012, madahka nitih Ethnologue, dalam taun 2005, bisi 6,912 iti jaku di dunya. Ari penyampau tu, 516 iti jaku disadang deka pupus jemah ila.

Guna jaku ke rindang agi

Raban nembiak redak kemaya hari tu balat agi ngemeratka jaku ti ngembuan ukur ekonomi sereta jaku ti rindang lalu mudah diguna ba dalam laman siber. Faktor bukai nyangka enda tentu dikemeratka.

Enti autoriti tauka kuasa jaku enda dijaga nyangka apus mih penegap jaku Melayu ti dulu suba diguna nyadi jaku dikena begaul enggau pangan diri (lingua franca) ba tanah pulau Melayu kenyau ari abad ketujuh maya jeman perintah Srivijaya nyentuk ke abad ke-14 sereta maya jeman perintah ti nangkanka nya baka Empayar Melayu Melaka. Enti jaku Melayu udah lenyau, ukur budaya sereta identiti bansa Melayu mega deka lenyau retai diempa jeman.

Nitihka penemu Ibnu Khaldun dalam kitab iya ke benama Muqaddimah madahka pekara ti nentuka telentang tungkup sesebengkah bansa nya bepanggai ba penguat asabiyah iya. Siti pekara ti nyadi penentu ngagai penguat asabiyah iya nya jaku ti nyadi kereban komunikasyen sesebengkah raban bansa. Besenutuk enggau nya mega, ku Profesor Dr James T Collins madahka peninggi penuduk sesebengkah jaku ukai semina bepanggai ba penegap jaku nya empu tang mega bepanggai ba penaluk ati raban ke bejaku jaku nya.

Kena nyimpulka runding, uji kitai malik ke belakang sesempa leka pinang. Dulu suba maya pengawa ngajar Sains enggau Matematik diajar dalam jaku English ti beduduk ari penemu Tun Dr Mahathir Mohamad dalam taun 2003, mayuh amat jaku pejah diterima ari sida ke enda besetuju enggau atur ke ngajar nguna jaku English kelebih agi ari sida ke ngumbai diri aktivitis jaku. Tang kemaya hari tu lebuh jaku Melayu ba ruang siber nya dikena sengapa kada enda nitihka atur jalai jaku ti betul ninting jam kinika penunga sida ke ngumbai diri aktivis jaku nya diatu dih?