Beratika isu ke amat nyadi

Lama amai udah nadai nyenguk ngagai laman tu bekenangka pasal pekara politik. Diau jenuh ukai ketegal baka nyumbuh ke nangika ipuh, diau sunyi ukai baka babi ke nangika sangkuh. Ukai nama agi mayuh pekara bukai mega deka dibantai, asai ke sama bela pemerat, sama beguna sama tau dikunsi. Nyadi sekali tu aku deka bekenangka pasal pekara ke bisi kaul enggau politik ke nyadi ba menua kitai kemaya hari tu.

Ninting hari, baik nya ba televisyen, surat berita tauka laman sosial baka Internet berita pasal pekara politik semampai bisi dibantai sereta dikenang. Aku asai ke udah leju udah bansu ninga berita ke nadai pengujung tu. Dipelabaka aku mayuh rayat Malaysia mega ngembuan asai ati ke baka aku tu. Politik nyau udah datai ba taka obses.

Bala pemesai tauka tuai pemegai menua baka ke udah tebelengka pegai kuasa sida kelebih agi maya kitai rayat selama begunaka iring sereta embing sida nuju pemansang ke dijulukka ati ngelamat tu. Sigi amat bala tuai pemesai kitai amat pisit, agi ga jarang, amat janit agi ga lapang, tang nya ukai kedalih sida enda tekerejaka pengawa. Ambika banding isu 1MDB udah lama amai ngeruga pengelikun sereta runding bala tuai kitai. Ninting hari bisi aja berita ke dipansut pasal penyai 1MDB. Rayat Malaysia kelebih agi sida ke diau ba nengeri balat bendar ngasaika pangka pekara tu baka ke ngelegua puput angin taufan. Sida ke mantaika berita tu endang enggau naka ulih nguji ngamatka berita sida ngichaka raban peninga bisi ngembuan pengarap ngagai berita sida.

Nya mih kebuah ba runding aku sida ke ngembuan tanggung pengawa baka Auditor-General patut enggau lengkas mantaika ripot sida sereta nyerahka ngagai Komiti Wang Rama (PAC) sereta mega enggau Bank Negara ngambika kitai semua sida tu ulih betatika pansik ti udah dipejalaika sida nya. Kitai ke rayat selama mega ngarapka sida ulih mantaika fakta ti betul ukai ngemeratka raban politik awakka gambar pekara ke amat ulih tebantai laban kenu ku sempama jaku dalam dipelam pan buah rian ditemu mih bau, ditungkus mih abus tekebu mih debu. Nya mih kebuah, intergriti sesebengkah institusyen mesti dijaga ngambika nyamai mih kitai betatika pansik ti udah dipejalaika raban ke betungkapka pekara tu.

Kelimpah ari isu akauntabiliti enggau intergriti bisi mega isu bukai ke majak nyadi senyadi kemaya hari tu. Ba runding mensia mayuh menua kitai kemaya hari tu baka ke mansang ngagai ideologi menua ke ngembuan siti pengarap tauka mono religious ti alai bala orang ke konservatif mayuh agi mantai runding ke lama sereta orang bukai ke ngembuan runding ke tebuka deka dikelanyaika sida. Baka nya mega raban menteri kabinet perintah besai balat bendar diau diri ba isu tu ari ke mantaika penemu sereta ngetanka runding rayat Malaysia. Mayuh ari kitai mega nyau udah enda nemu nama ke bendar utai ke dirundingka sida. Nya alai, sapa-sapa ke bisi nitihka pemansang berita di Malaysia tentu nemu kitai kemaya hari tu dipansal beratika mayuh isu ke nyadi.

Ambika banding, nama kitai rayat ibuhka kedai makai patut ditutup maya udah jauh malam tauka skirt indu ke pandak enda nitihka kod ngepan? Nama kebuah kitai patut ninggalka pengaga ati kitai  lebuh jimnas kitai tulihka midul mas ketegal gari ke dikena iya? Nya sekeda pekara ke ku aku tu majak nyadi batang berita ba radio, televisyen, surat berita enggau laman sosial. Tang lebuh tebachaka berita ba surat berita, tabi puji patut diberi ngagai bala raja laban ke udah meranika diri bejaku pasal isu tu lebuh sida raban politik diau diri. Pelaba aku semua kitai ulih ngasaika baka ni asai ati jimnas Farah Ann Hadi lebuh iya nerima surat pekirum ari Sultan Selangor ke meri tabi puji ngagai iya sereta enda ngasuh iya ibuhka pejah runding orang ke sempit sereta negatif nya. Tang lain mega utai ke nyadi ba sekeda opis perintah. Sekeda nya nyau majak neritka atur dikena sida ngayanka kuasa ketegal ari pengelemi tuai pemegai perintah. Sida tu berani ketegal sida nemu perintah endang enda berani ngeletak ukum ngagai sida laban ke kiruh belaya enggau pangan diri.

Baka nya mega raban parti penyakal. Suba sida ngembuan juluk ati ti besai ke deka ngerebut sereta megai perintah, megai Putrajaya tang diatu cherita udah jauh limpang. Gempung ke udah digaga nyadi sempekat diatu udah retai sereta nganti maya ke deka runtuh. Nya mih ku aku, diatu rayat Malaysia mayuh ke nyau beba runding; nama penyadi ngagai sida tiga parti seraban nya. Kati sida nya deka ngujungka beserara enggau pangan diri tauka agi diau serumah taja pan udah enda bejaku enggau pangan diri? Enti baka nya utai ke nyadi tusah bendar gempung tu ulih nyadi parti alternatif ngagai parti ke merintah diatu. Kebuah pia, sida nyau kiruh belaya enggau pangan diri.

Rayat Malaysia ke diau nguan pasar enggau nengeri kemaya hari tu nyau berasai bendar diruga runding pasal isu 1MDB, isu makai suap enggau penyalah guna kuasa tang nadai siti ari pekara tu bisi disebut maya aum Parti PAS apin lama ke udah. Nyangka isu nya ukai isu ke berat ba sida laban mayuh ari penyukung sida tu datai ari menua pesisir tauka isu tu tekelalu mar diperetika bala pengari ke ngulu aum nya. Penemu rayat ba nengeri ke ngumbai sida raban PAS ke progresif  ulih menang nengah parti Islam baru nya penemu ke pabu laban sida nadai idea baka ni politik sida rayat menua pesisir ke bendar.

Rayat Malaysia mayuh ke udah enda lantang ati enggau raban politik kitai kemaya hari tu laban mayuh ari sida udah ningkilka kaul sida enggau mensia mayuh. Kelimpah ari nya rayat Malaysia mega tembu tusah ati berundingka ukur mata duit ringgit ke makin sehari makin ngeredut mit semit. Nya dipeda ari utai ke dibeli baka pemakai enggau utai bukai. Rega kupi sechangkir di Kuala Lumpur diatu udah manggai dua ringgit ba kedai kupi selama. Ukur mata duit kitai majak nurun senurun lalu nadai siku nemu kemaya iya badu nurun.  Tang apin lama ti udah perintah bisi meri jaku jamin lebuh Ripot Fitch ke madahka tikas duit kitai ba tikas A. Sapa kitai rayat selama nemu utai ke dikumbai Ripot Fitch lalu nama reti tikas A nya ba kitai? Taja pia enti diperatika amat-amat mata duit kitai lalu nadai ngayanka ubah enti diperatika ari utai ke dipelanjaka kitai ngena duit nya.

Besenutuk enggau nya mega rayat Malaysia agi bepas was napi pangka GST tauka chukai servis perintah. Isu GST majak nyadi isu ke besai ba mensia mayuh kelebih agi rayat selama. Kos daya idup ke majak tinggi mega ngeruga pengidup bala pengereja pengawa. Mayuh ari rayat selama nyau nadai agi duit lebih deka disimpan sepengudah mayar semua bil. Nadai salah enti kitai madah pengidup bala rayat ke diau ba nengeri tau disema baka pengidup manuk - kair pantuk, tiap bulan gaji semampai rapas jengkau. Nya alai pesan ke patut dituju ngagai perintah - uji beri peratika ngagai isu ke amat nyadi.