Mayuh bengkah pansik udah dipejalaika gerempung ti bisi
kaul enggau pekara antarabansa. Siti ari gerempung nya, iya nya Global
Education Organisation. Gerempung tu udah ngerintaika faktor penyeranta bepun
ari mensia mayuh ke enda tulihka pelajar ti chukup sereta manah.
Faktor nya mega seruran nyadika dalih ke nagang proses
pelajar ari ngerembai mansang ba tikas ke patut sereta suah dijadika pengukur
pemaruh pengulih nembiak nitihka standard ti udah ditetapka. Taja pia, nitihka
penemu konsultan pelajar antarabansa, Peter De Witt, kelimpah ari isu
penyeranta ke seruran dikemesaika agi bisi sereta mayuh isu kritikal ti patut
bendar diperatika. Iya ngerintaika 10 isu kritikal ke enda dipeda orang bukai.
Iya madahka mensia mayuh semina tepedaka isu besai aja lalu nyeliahka isu mit
ti dianggap sida semina ngeribatka pengawa taja pan iya tau mai impak ti besai
enti enda dikeibuhka.
Ninting maya, isu penyeranta ba serata dunya suah bendar
nyadi pugu topik ti ditanka. Nya ngelaika pemuntan sida ke betanggung pengawa
meri pelajar ngagai mensia mayuh. Sida tu enda teingatka agi mayuh isu kritikal
ti patut diperatika laban iya ulih ngempang sesebengkah proses pelajar ari ke
dipejalaika enggau lanchar. Meri fokus ngagai sekeda isu aja enda ulih
ngangkatka pelajar ngagai tikas ke patut ketegal semua isu patut dipansik lalu diberi
perati ti setimbang.
Peter De Witt mega madahka 10 isu kritikal ti patut diberi
perati nya nyengkaum aturan tauka jaku padah strata ti diguna ba tiap-tiap menua,
chara belajar, teknologi, media sosial, politik, tuai sekula, peresa, program servis
ngajar ungkup bala pengajar, gaya rampa sekula enggau penyeranta.
Tiap-tiap isu nya
endang semampai bisi kaul sereta nyukung entara siti enggau ke bukai lalu enti
digembarka sama tau ngasilka impak ke manah agi ke sistem ti udah bisi. Ambika
banding, chara belajar ba semua menua endang ngembuan langkah rapat ti kediri
ba jalai ngeluruska proses nya. Taja pia pekara ti patut ditanya nya langkah
rapat ke dikena nya engkeman tauka enda enggau tikas umur, rampa pendiau,
pengulih enggau pengingin nembiak.
Ngajar nya proses ti beguna bendar kelebih agi mekanisma
ke diguna sekalika iya mujur nyapai tuju ke ditaga tauka enda. Kaul proses
belajar endang semitan enti diguna enggau menyana. Standard pengulih nembiak diberi
penuduk nitih keguna nengah chara selampur genap. Lalu standard pengulih pelajar
nembiak nitihka pengulih sida bepelasarka kriteria ti udah ditetapka.
Taja pia, ukai
semua orang meda proses belajar nitihka pengulih nya patut dikemeratka. Sida
balat agi ngemeratka spesifikasyen tauka
indeks sechara global. Ba menua maju ti bisi perengka guna enggau akses, pekara
tu ukai siti penanggul besa i tang baka
ni mih ba menua ti miskin, kati rentang tauka enda nya ba nembiak sida?
Teknologi enggau media massa mega ngasilka mayuh isu ti
bedau mujur diputar enggau bebendar. Dalam era global, kedua-dua pekara tu
beguna bendar dikena ngangkatka kapasiti pengulih nembiak lebuh sida bulih akses ngagai pampang
penerang. Bisi sekeda sekula ti ngasaika guna kedua-dua medium tu ulih nyaup
ngelancharka agi proses pelajar tang utai ke nyadi nya tebalit. Iya enda nyadi
munyi ku penemu sida nya. Nama agi enti sekula nya endang nadai ngembuan perengka
guna ketegal kurang duit agih belanja sereta sida ke ngasaika pekara nya semina
muai duit ketegal enda chukup bajet.
Ari sukut politik, mayuh ke enda tepedaka pekara ke masuk
champur politik ulih ngeruga sereta ngerusakka sistem pelajar. Bidang pelajar
udah lama bendar nyadika kereban jaku pejah tiap-tiap raban politik. Pekara tu
majak nyadi senyadi kemaya hari tu. Utai ke nyadi penanggul nya sida semina
meri fokus ngagai sekeda pekara aja, ambika banding baka maya prestasi sekula
nurun. Sida semina ngarapka pekara ajih tau nyadi enggau mudah. Tang iya ke
bendar nya raban pengajar nyau bepas was ngulihka pemutus peresa ti badas. Nya mih kebuah kitai patut ngelakka sida
bejalaika polisi ke udah digaga sereta enda ibuh dikachau orang luar. Tang sinu
bendar enti diperatika ba mayuh menua di dunya tu, politik seruran tepejuh ari
alur ke patut sampaika ngeruga pengawa ba bidang pelajar. Nya alai, baka ni
kitai ulih tulihka komitmen pengajar ba
tikas ti pengabis manah enti politik baka ke deka ‘ngerampas kuasa’ di sekula?
Kitai enda ulih
madahka ngenggaika semua menua di dunya
tu benung nengah proses kritikal dalam isu pelajar. Tang baka ni kitai ulih bekerejasama
mutarka penanggul tu? Katika isu tu ulih
diputar maya kitai nguji enda ingatka isu bukai?
Tiada ulasan:
Catat Ulasan