BEBERAPA hari ke udah,
ruang-ruang media sosial balat bendar penuh enggau isu belaya ke bisi nyadi di
Pasaraya Low Yat. Penulis enda tentu deka enggau ngeruhka ai sereta ngemauka
api jurai ke bisi ba alam maya enggau teori-teori baru senentang insiden nya
laban kes nya diatu benung dipansik sida ke betanggung pengawa ba pekara
jenayah.
Taja pia, enti
diperatika polemik ti di media sosial tau bendar ngasuh kitai nangi. Berita ti
bedau tentu temu pun ujung mudah amat betukar nyadi kereban api ti tau ngemauka
api pemenchi antara bansa. Bisi sekeda nya sanggup ngereja pengawa ari luar garis
ukum. Sida ngereja pengawa ti enda patut ngujungka sida sanggup ngerijat sereta
nyamah orang sampai bakal. Sida ke dijamah nya mega bedau tentu temu salah
tauka enda.
Dia kitai udah
meda pemalat pengawa media sosial ti jampat bendar nyadung berita selebebu
ngapa sampai mungkalka sentimen entara bansa. Nya mih kebuah kitai ke matang
penemu patut bendar mansik sesebengkah berita enggau dalam sereta lenak agi
sebedau nerima 100 persin penerang ba alam siber. Ari sukut realiti, sentimen
entara bansa nyamai bendar diputar belit ngujung laya entara bansa tau nyadi.
Nya mih kebuah,
enda milih nama bansa tauka pengarap kitai mesti ngembuan prinsip ti tegap sereta enda
jampat diparit orang enggau sentimen entara bansa, itah agi enti nyau datai jari
sereta ngaturka penusah nya ngena undang-undang diri empu. Dalam pengarap Kristian
sida diajar enda terus ngelaban munsuh sida tang besembiangka munsuh. Baka nya
mega dalam pengarap Islam, umat sida diperintah enda jampat pechaya sereta
nyadung berita ke bedau tentu amat tauka enda kelebih agi kemaya hari tu dalam
jeman teknologi pemadah ti udah balat maju sereta ngena mayuh macham aplikasyen
ba media sosial.
Baka utai ke
nyadi ba Low Yat patut bendar nyadika teladan tiap-tiap iku peranak menua ke
rinduka pemaik sereta menua ti stabil ngambika sida enda jampat ngaga jaku
pejah ngagai sapa-sapa. Menua kitai ngembuan sistem ukum enggau undang-undang.
Nya mih kebuah, kitai patut nyerahka pekara tu ngagai sida penerit adat
ngambika sida ulih mansik lalu nangkap sida ke ditemu salah. Enti sema rayat majak
diasuh ngatur penusah ti baka nya ngena undang-undang diri empu tentu menua
kitai jemah ila rusak sereta nadai temu tuku.
Taja pia,
ngagai sida ke penerit adat patut mega mending sereta ngambi serius serebana rayat
ke ngelama tu disempamaka baka api dalam seku kelebih agi lebuh betatika chara
sekeda orang dagang ke suah bendar didinga suah ngakal bala pemeli. Sida tu baka ke
udah dilalai sereta dijaga enggau manah sereta kebal ari sebarang dawa undang-undang.
Ngagai kitai ke bepengarap Islam, bulan Ramadan tu patut nempa kitai nyadi mensia
ti liat ati, tan sereta enda mudah diransang pengeringat enggau ngerijat enda tentu pasal.
Tiada ulasan:
Catat Ulasan