Sebedau tu penulis bisi ngenang siti pekara sentang
pengawa nyeliahka diri ari nyadung berita selebebu ngapa ba media sosial.
Kenang tu bepelasar ari laya ke bisi nyadi ba Plaza Low Yat bedau lama ti udah.
Sekali tu penulis agi deka ngenang ke pekara tu ke ujung agi laban empas
negatif ari pekara nya bisi bendar mai pengerugi ngagai semua rayat Malaysia.
Dalam pengawa naburka Ngamatka Kemerdekaan ti dikenataika
Tunku Abdul Rahman maya pagi 31 Ogos 1957, ba genteran kepenudi nya bisi nyebut:
“Enggau tu Gerempung Tanah Melayu deka mungkur Menua
Johor, Pahang, Negeri Sembilan, Selangor, Kedah, Perlis, Kelantan, Terengganu,
Perak, Melaka enggau Pulau Pinang disempulang berekat Allah Subhanahu wa ta’ala
dekat terus nyadi sebuah menua ti merdeka sereta berkuasa bepelasarka menua ti
nadai dikuasa menua bukai, rentang lalu semampai nyaga sereta ngenulu pengelantang rayat iya lalu
ngentan pemaik entara semua bansa.”
Tunku Abdul Rahman, ke dikumbai Apai Merdeka lalu betanggungjawab
numbuh menua Malaysia seruran nyebut tentang juluk ati ti deka ngerakupka bansa.
Indah maya ke macha pengawa ke bejadika merdeka nya, iya enda muai peluang nyebut
tentang idealisma penyerakup entara pupu raban bansa di menua tu. Nya alai nadai
kebuah enda kitai madahka menua kitai ditempa bepelasarka semengat penyerakup
entara bansa.
Tragedi Low Yat
Taja pan tragedi Low Yat enda balat baka insiden 13 Mei
1969 menya tang utai ke udah nyadi nya bisi bendar ninggalka impak besai ngagai
menua kitai. Enti enda ngagai genap endur
mimit pan bisi ngasaika kelebih agi sida ke diau ba Lempa Klang. Taja
pan penerang ari PDRM bisi madahka tragedi tu nadai kaul enggau laya entara
bansa tang kitai patut nerima realiti api laya entara bansa udah bisi teperechi asil ari pekara nya.
Enti niang Yap Ah Loy agi idup, tentu bala nembiak China
enggau pangan Melayu sida udah kena anu. Yap Ah Loy, ke kala nyadi Kapitan
China di Kuala Lumpur pandai ngatur sereta ngaul diri enggau orang-orang
Melayu. Ambika banding, Yap Ah Loy ngerapitka kaul iya enggau Tengku Kudin sereta
Sultan Abdul Samad maya Perang Klang bisi nyadi. Pengelandik Yap Ah Loy ngambi
ati orang Melayu ulih dipeda ari maya iya bisi diberi pangkat Datuk, lalu
dikelapung enggau sebuah perak ti ditulis “Yap Ah Loy Sultan Indra Perkasa
Ujaya Bakti Capitan China Kuala Lumpur.”
Kaul dalam
pengawa perintah enggau dagang entara bansa di menua tu ukai sebengkah pekara
ti baru. Tang nama kebuah penanggul tu ngujungka manjut api laya entara bansa?
Stereotaip sepengudah
58 tahun
Semua orang nemu Malaysia tu sebuah menua ti diuan pupu
raban bansa tauka dikumbai Plural Society. Konsep pupu raban bansa tu berengkah dikena siku penulis
Barat ke benama Furnivall. Iya bisi mansik pasal utai ke nyadi di Hindia Timur
(diatu dikumbai Indonesia) enggau Burma maya menua tu dipegai Belanda enggau
Inggeris. Nitihka Furnivall, raban pupu bansa tu nyadi ari siti situasyen lebuh
tiap-tiap bagi ke lain-lain dalam komuniti nya idup berimbai pendiau enggau
pangan diri tang diserara ari sukut unit politik ti sama. Kelimpah ari nya,
tiap-tiap raban bepegai ba pengarap, budaya enggau jaku diri empu. Indah bisi
mega dibagi ari segi ekonomi nitihka sukut bansa tauka ras.
Bisi sekeda
faktor ti berat lebuh begigaka pun penanggul entara bansa ke nyadi di Malaysia.
Keterubah nya ari sukut polisi pechah lalu perintah
(dalam jaku English; Divide and Rule, dalam istilah asal Latin ; divide et
impera) ti dikena sida pemerintah
English menya. Nitihka penemu politik enggau sosiologi, strategi tu dikena
nyeliahka raban ti mit ari begempung lalu nyadi raban kuasa ti besai. Dalam
konteks Malaysia, taktik tu mih nyadi puncha ekonomi enda setimbang sereta
penanggul polarisasyen entara bansa. Ambika banding, orang Melayu enggau India diau
di genturung menua pesisir enggau ladang sereta ngemeranka ekonomi ngidup kediri.
Orang China diau di pasar sereta bejalaika pengawa dagang. Lebuh raban entara
bansa tu dipechahka baka tu dia nyamai mih sida perintah English bejalaikaka
pengawa merintah. Tang iya deka ngujungka siti situasyen ti enda setimbang lalu
tau ngujungka laya tau nyadi ketegal atur ti nadai rentang.
Faktor kedua ti sama pemerat nya ari sukut pemida sereta
pekara ti belaban penemu ari segi ukur pendiau enggau iya ti patut dikemeratka.
Pekara tu bisi diterangka enggau lenak ulih Dr. Syed Husin Ali dalam bup iya Orang Melayu : Masalah dan Masa Depan.
Lebuh bejuraika hal tu, Dr. Syed Husin Ali madahka entara kebuah laya ke nyadi
laban tiap-tiap bansa nya enda nemu tirai juru sesebengkah bansa ngujungka penyadi
siti situasyen ti stereotaip.
Ambika banding, bisi sekeda orang Melayu ke ngumbai orang
China nya semua iya pengamah, rindu ngakal orang lalu semina ngiga untung aja
lebuh maya bedagang. Baka nya mega lebuh bisi sekeda orang China ke ngumbai semua
orang Melayu nya kelalah, pengerua lalu rindu beperindang aja munyi ku jaku
Melayu empu – joli kin joli kitu.
Penteba sereta gaya pendiau nya nyangka bisi pengamat
tang iya dipelabaka bisi ba sekeda orang China enggau orang Melayu aja. Tang
iya enda amat enti dikumbai gaya pendiau semua orang China enggau Melayu tak
baka nya memagang. Nya mih kebuah lebuh iya nyadi stereotaip baka tu iya tau
ngujungka sida sama-sama beperagamka utai ke negatif dalam sebengkah bansa tentang bansa bukai.
Katika penemu ngempung
bansa Malaysia udah puntan?
Taja pan pait deka ditelan tan g Malaysia kemaya hari tu
agi napi siti penanggul dalam pengawa nempa sebuah menua bansa. Konsep menua bansa
Malaysia tu udah lama nyadi juluk ati kenyau ari polisi ti diperambuka maya era
Almarhun Tunku Abdul Rahman lalu ditampung enggau idea Wawasan 2020 ulih Tun Dr
Mahathir sereta 1 Malaysia ulih Datuk Seri Najib Razak. Deka nyebut penemu sida
tiga tu puntan tauka enda nya bepanggai ba anggap enggau peragam individu.
Tang ba penemu aku, idea Bansa Malaysia tu begunaka proses.
Kitai sekurang-kurang iya begunaka maya 100 taun da agi dikena kitai nyapaika tuju tu.
Malaysia tu agi kelalu puda alai iya ngulihka siti situasyen ke endur rayat
Malaysia amat-amat ulih meretika gempung idea ke memelan tu. Bansa Malaysia
deka mujur ditempa lebuh rayat iya ngembuan ulah tolerans ti tinggi sereta
ngangkatka Perlembagaan Persekutuan nya
nyadika undang-undang ti tinggi dalam menua kitai.
Injiner
sosial
Roscoe Pound ke nyadi siku pakar undang-undang Amerika
Syarikat kala madahka undang-undang disemaka baka kereban injin sosial dikena
nempa sebuah raban bansa enggau tamadun (law
as a tool for social engineering). Ba penemu Pound, penanggul raban bansa
ulih diputarka nengah tiga pekara iya nya; pemesai-guna pekara rama(public interest), pemesai-guna pekara
individu (individual interest) enggau
pemesai-guna sosial (social interest)
ti patut disetimbangka lalu pekara ti belaban entara ketiga-tiga pekara nya
patut dikurangka.
Dalam isu tu, ba penemu aku dikena kitai ngiga tipang (remedy) ngagai penanggul di atas dia kitai patut
betatika pekara ti nyadi ari ti manding pekara ti patut nyadi. Mayuh orang
minta bala rayat enda meda isu tu ari konteks bansa tang meratika iya ari sukut
penanggul entara penyual enggau pemeli. Sigi amat. Aku pan besetuju enggau hal
tu.
Tang ari sukut realiti nya, penemu majoriti mih ti nempa
ulah raban bansa kitai. Enda ngira nya pait tauka manis, kitai patut nerima raban bansa kitai nimpai penaangul tu dalam
konteks entara bansa. Nya mih kebuah kitai patut betatika penanggul tu nengah chara
ti pragmatik seraya ti ngemeratka ukur pemanah ti praktikal iya nya hal ti
amat-amat nyadi.
Bepelasarka teori injinir sosial ti ditengkebangka Pound,
sekeda pekara ti patut diperundingka amat lebuh mutarka penanggul ke nyadi dalam
raban bansa kitai kemaya hari tu.
Keterubah nya, mungkur pekara ti bekaul enggau undang-undang.
Undang-undang nya endang terang amat nyadika kereban ke beguna dikena nempa
ulah raban bansa. Taja pia ba penemu aku Akta Hasutan 1948 ke dikena nya bisi
enda tentu engkeman dikena mutarka penanggul tu. Kitai begunaka sebengkah undang-undang tunggal. Undang-undang tu patut betukuh tempa lalu ukai nagang enggau regresif
baka Akta Hasutan.
Ambika banding, parlimen patut ngaga Akta Perpaduan. Akta
tu patut betatika pekara ti bekaul enggau pelajar, jaku, dialog entara bansa
ngambika undang-undang enggau polisi baka Akta Jaku Nasional, Falsafah Pelajar
Bansa, Polisi Budaya Bansa enggau Polisi Sukan Kereban Penyerakup ke betemarung
nya ulih disatu sereta dipegulaika. Nya alai, siti malin ti terang patut disediaka dikena ngelancharka tuju pejalaika perambu tu.
Kedua nya bekaul enggau pekara pelajar. Taja pan isu tu
dianggap sensitif, tang iya patut dibantai laban iya bisi kaul enggau mensia
mayuh. Siti kategori pelajar ti amat beteraska penyerakup patut dipejalaika. Kitai patut nerima reliati sistem kitai ke
nyerara pangan diri kenyau ari sebedau merdeka nya ke nyadi pun penanggul
kemaya hari tu. Indah pemisi sekula ke ari kategori sekula bansa pan bedau tentu ulih
mutarka penanggul tu.
Ketiga, pemereti ati sentang pugu Perlembagaan
Persekutuan enggau pemida ari sukut budaya patut ditegapka ba raban mensia
mayuh. Pemereti ati tu ulih ditempa nengah chara pelajar sereta dialog entara raban
bansa. Dialog tu beguna awakka mensia mayuh ulih sama-sama meretika bida lalu
ulih ngurangka penanggul stereotaip ke bisi dalam komuniti raban bansa kitai. Dialog ti deka dipejalaika nya ila patut majak
diteruska bepelasarka pengelurus enggau pengamat ti deka meretika pangan diri. Tiap-tiap
raban patut berani pansut ari alam bungkung enggau budaya diri empu dikena ngiga
titik alai betemu enggau pangan diri dalam siti raban bansa.
Simpul penemu
Dikena aku nyimpul penemu enggai enda madah artikel tu enda ulih nyediaka remedi-remedi ti chukup
genap dikena mutarka penanggul tu. Tang, pugu idea ti deka dibantai nya tolerans
enggau pekara ti deka ngurangka penemu ti beserekang munyi ke udah disebutkan di
atas. Bida entara raban bansa di Malaysia endang semampai bisi laban tiap-tiap
bansa sigi ngembuan ulah enggau gaya kediri empu. Orang Melayu endang ari suba
nemu pengidup mensia semampai mayuh macham nitihka ku jaku sida “lain padang
lain belalang ; lain lubuk lain ikan.” Indah dalam pengarap Islam pan bisi
madahka tiap iku mensia patut bekelala enggau pangan diri ukai semina dalam raban
pengarap Islam aja.
Tiap-tiap raban bansa kelebih agi sida ke nembiak enggau mahasiswa
patut ngaga tali penyambung supra-etnik dikena nempa sebuah Bansa Malaysia ti
baru lalu bejuraika isu-isu baka DEB, Konsep Betuanka Melayu, Perlembagaan, Penuduk
Islam etb dalam sfera intelektual awakka ulih mutar penanggul tu. Dikena
nutupka kenang tu, siti pesan ke patut dikingatka iya nya buai semua asai ke takut, pemenchi sereta
beperagam jai laban kitai semua tu rayat Malaysia!
Tiada ulasan:
Catat Ulasan