Jaku Iban kenyau
ari suba mayuh diguna ninting hari di nengeri tu lalu ngujungka jaku tu nyadi medium
ke pemadu beguna dikena nempa penyerakup pupu raban bansa ke nguan nengeri tu.
Ku Sapit Kepala Menteri, Datuk Patinggi Tan Sri Alfred Jabu Numpang madah, nyau
deka semua bansa di nengeri tu nemu bejaku Iban enggau chara ke betul.
Nitihka penemu
iya, jaku Iban diatu beguna amat nyadi medium penyerakup rayat pupu bansa.
Kebuah pia, laban iya sebengkah jaku ke mayuh ditemu pupu bansa ukai semina di
Sarawak tang mega di menua bukai. Nya mih kebuah, perintah menua Sarawak deka
bebendar nyaga sereta ngerembaika jaku Iban ngagai tikas ke lebih tinggi.
Enti disurutka tinjau ke belakang, jaku Iban endang kala
nyadi jaku lingua franca jeman perintah Rajah Brooke. Maya nya kelia, endang
udah bisi bup ditulis dalam jaku Iban lalu tu terang mandangka jaku Iban sigi
mayuh guna. Nya alai, pengawa ngemansangka jaku Iban tu mesti terus dipajak
bala tuai raban bansa Iban ti siruka jaku tu sereta mega raban aktivitis jaku
Iban.
Mayuh bendar chara ulih dikena ngangkatka jaku tu
ngambika mansang ngerembai sereta pegari dikena dalam bejaku besehari-sehari
sereta maya formal. Nya mih kebuah, pengawa ke meransang nembiak ngambi mata
pelajar tu patut chakah agi dipejalaika sida ke mekuh pengawa dalam
ngemansangka jaku tu baka bala pengajar jaku Iban empu sereta raban pengatur
sekula. Dalam pekara tu raban pengatur sekula enda patut semina berundingka
deka ngangkatka nama diri empu enggau sekula sereta enda meri peluang ngagai
nembiak ngambi bagi dalam mata pelajar jaku Iban. Pekara ke milih nembiak ke
pandai jaku Iban aja enda mega patut nyadika batang pekara lebuh ngambi tauka
milih nembiak ke patut ngambi jaku Iban. Nya endang realiti utai ke nyadi
kemaya hari tu laban bala pengetua balat agi ngemeratka prestasi sekula lalu
nya mega ulih ngangkatka nama diri.
Bala pengajar ke milih nembiak ke enggau masuk kelas tu
mega enda patut ngira iya ke pandai aja sereta nembiak ke ulih ngasilka A dalam
peresa jaku Iban. Enti sida berunding baka tu nyangka jemah ila penyampau
nembiak ke ngambi pelajar jaku Iban mega majak kurang sekurang.
Baka nya mega raban gerempung apai indai enggau pengajar
sekula mega patut bejalaika tanggung pengawa meransang bala nembiak redak ba
endur sida bebala mayuh ngambi mata pelajar jaku tu. Ba sekula ke endang tekang
anak Iban sigi nadai dalih alai sida enda diasuh belajarka jaku tu. Baka nya
mega gerempung bukai kelebih agi gerempung ukai kuasa perintah ti bisi kaul
enggau budaya sereta jaku Iban patut mega meransang raban sida ngasuh anak sida
belajarka jaku Iban. Naka kediatu nadai udah ninga bisi kelas tuisyen belajarka
jaku Iban udah dibuka di nengeri dikena meri peluang ngagai anak Iban di
nengeri belajarka jaku tu. Bejaku jaku Iban enggau belajarka jaku Iban nengah
chara formal endang bisi bida. Kebuah pia enti jaku Iban nya dipelajar nengah
chara formal dia bala nembiak nemu enggau dalam agi sistem jaku Iban ke betul
sereta nemu budaya bansa Iban enggau dalam agi.
Radio Iban baik nya RTM sekalika CATS FM bagi Iban patut
mega chakah meransang bala Iban ngena jaku Iban ke standard sereta betul lalu
ukai jaku ke udah dilumai enggau jaku bansa bukai. Kemaya hari tu mayuh bendar
peninga radio udah enda nemu chara ngenataika pesan ti betul ba radio. Kelimpah
ari nya sida ngena jaku bansa rojak lalu ngelebihka jaku bansa bukai lebuh
bejaku ba radio. Tu tau bendar mai empas ti negatif ngagai pemansang jaku Iban
jemah ila. Ba sekeda endur jaku Iban udah nyadi jaku pidgin tau mega dikumbai
jaku ke udah bangkut.
Surat berita enggau majalah ke bisi meri ruang ngagai
jaku Iban dikena ba surat berita sida endang patut dipuji ketegal pemerani
raban pengarang berita sida nulis dalam jaku Iban. Kelimpah ari nyadi kereban
bacha ngagai bala pemacha jaku Iban ke auska penemu sereta berita pekara tu enda
patut bendar diberi tabi puji. Ketegal kurang kereban bacha dalam jaku Iban,
surat berita enggau majalah tu mih nyadika batang kereban bacha bala pemacha
jaku Iban. Nya alai raban pengarang berita enggau penulis majalah enggau naka
ulih belajarka sistem sepil jaku Iban ke dikena sida ba sekula. Kebuah pia enti
enda iya mega tau mai empas ti negatif ngagai bala nembiak sekula ke benung
belajarka jaku Iban di sekula. Runding sereta penemu sida tau beba sereta
charut lebuh tebachaka artikel ti enda sebaka sistem sepil enggau jalai jaku. Bala
pengarang berita enggau penulis majalah patut ngiga jalai belajarka sistem jaku
Iban ke dikena di sekula ngambika ulih sama-sama besaup ngangkatka jaku Iban.
Baka nya mega institut pelajar tinggi baka institut pematih
pengajar enggau Universiti Pendidika Sultan Idris patut berundingka ngatur
seminar tauka kus ti ulih nambahka penemu bala ke bisi kaul enggau pemansang
jaku tu kelebih agi baka raban pengajar di sekula, bala penabur ba radio, raban
pengarang berita enggau penulis majalah enggau bup dalam jaku Iban. Enti utai
tu ulih digaga sereta diatur ninting taun tentu jaku tu ulih ngenataika diri ba
tikas ke tinggi jemah ila.
Kemaya hari tu turai pelajar sekula ti baru iya nya
Kurikulum Standard Sekolah Rendah (KSSR), jaku Iban ba sekula primari udah
nyadi sebagi ari mata pelajar elektif ke
sama tikas enggau jaku Arab, jaku China, jaku Tamil enggau jaku Kadazandusun. Reti
nya jaku Iban udah diberi peluang diajar ukai semina ngagai raban bansa Iban
aja tang mega ngagai bansa bukai baka Bidayuh enggau Orang Ulu. Empas ari
pengawa tu jemah ila penyampau orang ke nemu ngena jaku Iban ke standard ukai
semina raban bansa Iban aja tang mega nyerangkung raban bansa Iban.
Nya mih kebuah jaku Iban tu ulih mantu menua dalam
pengawa nyerakupka pupu raban bansa ke bisi di Sarawak. Enda mega ngalitka ati
enti jemah ila bansa bukai mega ulih mangku pengawa nyadi penyanyi lagu Iban, penabur
ba bagi Iban radio Sarawak, nyadi pengarang berita Iban sereta mega nyadi
pengajar jaku Iban. Maya nya ila mih raban bansa Iban baru deka enchelak. Nya alai
kala jaku tu baru deka angkat mansang dia bala ke bisi tanggung pengawa dalam
pengawa tu enda nejuka pekara tu terus bejalai rarat ke ulu rarat ke ili baka
apung balu baka mega perau ke nadai orang ngayuh.
Tiada ulasan:
Catat Ulasan