Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Rabu, 12 Ogos 2015

Ruang Bilik Kemaya Hari tu Napi Penguji Sosioekonomi


Semua kitai dipelabaka ngaku idup dalam dunya ke jampat beputar tu kekadang tau bendar ngasuh kitai beba runding. Kenyau ari 20 taun ti udah kitai ukai semina tebalan enggau leka jaku baka globalisation, Information age, Free Trade enggau Social Media tang kitai mega meda pekara ke disebut tu bisi kaul ti rapit  enggau sosioekonomi ngujungka sentimen kitai bechampur baur. Kitai seruran serebana enti pengawa kitai diberi ngagai orang ba menua tasik tang kitai gaga enti kitai bisi peluang bebelika barang nengah chara online laban deka ngulihka barang ke manah sereta bekualiti taja pan iya dijual luar ari menua kitai.

Ba menua kitai empu, perintah nengah GST, rasionalisasyen subsidi enggau program ETP nguji enggau naka ulih ngurangka utang menua ngambika ulih besedia nyapai status menua maju maya taun 2020 ila. Ba tikas individu dia kitai ulih meda penatai pemisi sekeda ari kitai bisi udah niki ari RM1500 sebulan dalam taun 1992 ngagai RM5,000 sebulan dalam taun 2012; median penatai pemisi diatu kira-kira RM4,200 sebulan.  Kitai mega dipadahka bisi pengurang ari sukut penyampau sida ke merinsa mensena tang betambah ba sida ke ulih bebelika rumah, kerita enggau reta tengkira ti bukai. Tikas pengayu rayat Malaysia mega diripotka niki ari umur 71  dalam taun 1992 ngagai 75 taun dalam 2012. Kitai kemaya hari tu  balat agi ngasaika kualiti pengidup ti manah agi ari sukut pengerai, telekomunikasyen, pengawa matau menua sereta pemerindang.

Tang taja pia lebuh bejuraika pekara ti bekaul enggau gaya sosioekonomi di Malaysia dia pekara nya suah agi diperatika ari sukut negatif. Kitai ulih ninga mayuh macham komen ari mensia mayuh baka; “semua utai udah niki semina gaji aja ke enda” tauka “aku idup gayu agi ari orang kelia tang duit simpan EPF enda chukup” tauka “rega rumah nyau majak mar sereta enda ulih dibeli”. Bisi mega sekeda nya becherita pasal pemakai manding rega diatu enggau kelia. Ambika banding, menya rega nasi lemak, ruti canai tauka mee kolo semina berapa sen aja. Kitai ukai semina enda ulih nguasa pengidup kitai jemah ila tang kitai mega mupuk irauka pengidup bala anak redak, uchu ambu kitai jemah ila. Sida tu mih deka nyadi pewaris sereta penerima lanting ari kitai.

Runding ti negatif nya nyadika pelasar  rawang kitai ke enda likun sereta nangika pekara ke bedau temu tuku baka ni deka nyadi jemah ila kelebih agi dalam dunya ke jampat beputar tu. Munyi ku lagu Bob Dylan, “The times, they are changing” tang kitai enda berunding munyi ku lagu nya. Mayuh ari kitai agi bepanggai bendar ba paradigma ti lama. Mayuh ari kitai agi ngembuan peneleba sereta masai enggau idea ke madahka bekereja tetap sereta bepinchin kelebih agi ba sektor perintah nya manah agi. Kitai agi berunding sereta bekenangka duit bayar pinchin, duit jali ti bisi subsidi, berubat chara subsidi, subsidi minyak, perengka-guna enggau pemakai.  Semua utai tu kemaya hari tu majak kurang sekurang, majak lenyau selenyau ngujungka kos daya idup majak niki. Tu reti nya orang kemaya hari tu bebelanja lebih tang nadai duit ke simpan jemah ila.

Orang ke balat agi napi penguji baka tu iya nya raban apai indai ke bisi anak besekula ba primari sereta sekondari enggau anak sida ke belajar ba palan pelajar tinggi. Idea ke madah orang ke ngembuan degree ari universiti nyadika pasport pengidup jemah ila mega ngeruga runding raban apai indai. Ambika banding ba Singapore tikas penyampau orang ke bedau bulih kereja majak betambah ketegal penyampau orang ke begraduat mayuh ari ti patut. Nitihka ripot dalam bulan March 2014, Menteri Pengereja Pengawa madahka penyampau orang graduat di Singapore nyau majak betambah baka ba menua Korea Selatan enggau Taiwan. Baka nya mega ba menua kitai Malaysia. Kualiti sida graduat enggau nadai pengawa suah bendar nyadika isu kemaya hari tu.

Kelimpah ari nya mega, bisi isu bukai baka isu ubah dinamik ti patut beduduk ari ruang bilik.  Kemaya hari tu nyau udah nyadi pekara selama apai indai nya gawa ngulihka duit lalu pekara ngiga orang beribunka anak mega majak betambah. Taja pan bisi sekeda ruang bilik nya agi ulih minta saup kaban belayan tauka aki ini tang enda kurang mega sekeda nya dipejal nganjung anak sida ngagai palan nyaga anak mit. Tu begunaka belanja ti besai kelimpah ari mai empas emosional ngagai bala apai indai ketegal ke nadai chukup awak begulai enggau anak sida. Lebuh anak tu besai dia ruang bilik tu napi penguji bukai. Kurang pengarap ngagai kualiti sistem pelajar sekula ngujungka sekeda bala apai indai nganjung anak sida belajar ba sekula vernikular, sekula prebet tauka sekula antarabansa. Semua opsyen tu begunaka ungkus belanja ti besai laban belanja sekula bepun ari sekula primari enggau sekondari bebanding enggau orang suba ke semina meri fokus ngagai melanja anak sida ba pelajar tinggi aja.

Siti agi ubah dinamik dalam ruang bilik nya trend orang kemaya hari tu ke bejadi melaki bini maya umur ti udah laun sereta beranak maya umur sida udah lunggar. Trend tu mai empas ngagai anak ke diadaka sida ke ngujung sekeda nya tau ada menawa. Ambika banding, risiko penyakit down sysndrome  tau nyadi nya baka tu; umur 20: siku ari 1500, umur 30: siku ari 900, umur 40: siku ari 100.  Anak nya pemeri ari Petara. Enggau pansik ti chukup kitai kemaya hari tu ulih agi nyendiaka perengka dikena napi nembiak ke nyelai. Tang semua utai tu bepun ari duit ringgit. Tu mega mai empas ngagai diri empu enggau pengerawang emosional ti nating sosioekonomi sesebengkah ruang bilik.

Nambahka nya mega ba ujung sebengkah spektrum nya pengawa ke minta kitai nyaga sida ke udah tuai. Enggau gaya pengerai ti manah orang kemaya hari tu gayu agi. Ketegal nya sekeda ruang bilik enda ulih enda ngembuan tanggung pengawa nyaga sida ke udah tuai tauka napi kos nganjung sida ngagai rumah pengandai tuai. Rumah pengandai tuai kemaya hari tu nyau majak mayuh semayuh baka kulat ke tumbuh udah ujan. Siti agi penteba ti suah ba Malaysia nya raban diri menyadi ke pindah ke menua bukai. Tu meri empas ngagai menyadi bukai ke dipejal nyaga bala apai indai sida. Kelimpah ari mai impak ngagai sosioekonomik iya mega meri kebuah ti signifikan ngasuh kaul ti enda manah entara diri sebilik.

Bah nama respons kitai?

Nama mih timbal kitai ngagai semua pekara ti ngeruga sosioekonomi tu? Respons kitai nyangka ulih dibagi ngagai tiga kategori. Keterubah nya bisi kaul enggau emosyen kelebih agi sukut pengeringat. Kitai suah agi mantaika pengeringat sereta serebana enda puas ati kitai ngagai perintah enggau raban politik ketegal runding ti beba sereta dipejal napi penguji. Ayat dalih ke suah dipansutka kitai baka, “Perintah nadai chukup duit ketegal makai suap” lalu “semua tu nyadi ketegal bisi tiris”. “Enti semua penanggul tu nyadi ketegal makai suap sereta polisi ti enda engkeman dia aku berunding nama kebuah mih aku patut berubah tauka bekelimat?” Tu sekeda ari respons kitai. Kitai balat terunda-terunda nitih bala sekeda bejaika bala pemesai. Penemu aku pia ukai reti nya menua kitai nadai penanggul makai suap. Penanggul tu endang bisi sereta patut bendar dipunaska. Tang taja pia, penguji sosioekonomi nya lebih kompleks ari nya. Iya enda ulih diputarka kitai enti kitai mega nekan orang bukai.

Respons kedua nya bekaul enggau sentimen kitai ke rindu agi diau ba zon lantang. Randau kitai suah bendar bepun enggau, “Suba ...” tauka “Maya nya suba ...” Kitai balat agi belalaka utai lama. “Mayuh raban profesional, menija, eksekutif enggau teknisyen berasai lantang ba gaya pengidup sida diatu. Tu mih ke ngasuh sida nadai teperansang deka belajar sereta belajar baru. Tiap sektor ekonomi ke majak enda diguna deka diganti enggau iya ti baru lalu pengawa mengkang bisi disediaka tang semua tu begunaka pengelandik baru. Sekeda pengereja pengawa nadai sempat nikika tikas gred pengawa sida kelebih agi sida ke udah ba tengan umur. Sida ke berumur 40an nya mih ke napi pemedis deka belajar baru. Tu mih realiti ba menua Malaysia laban menua kitai tu enda kuat ba budaya belajar.

Kategori ketiga nya bekaul enggau orang ke ngujika diri nitih realiti sosioekonomi baru. Sida tu nguji meratika baru bajet sida sereta nguji mayuh macham chara ngurangka kos sereta ngiga peluang nambahka penatai pemisi sida. Bisi nya berubah ari ke mimit dulu. Ambika banding, nukar mintol  lampu dalam rumah ngena LED ngambika ulih ngurangka guna karan. Sekeda nya masang kipas dikena nganti airkon. Bisi mega bebelika insuran perubat dikena nyediaka diri napi umur ti tuai sereta enda ngenusahka bala anak.

Kelimpah ari nya, bisi mega sekeda ke ngurangka diri makai ba kedai. Lalu enda kurang mega orang ke nguji belajar baru ngagai tikas masters dikena nambahka peluang begaji besai agi. Bisi nya nukar kerita selama ngagai kerita hybrid dikena ngurangka belanja meli minyak. Bisi mega nya enggau masuk gerempung ukai kuasa perintah (NGO) ngambika ulih meratika tikas kualiti pelajar bala anak. Ba penemu sida tu enti sida ulih ngansak perintah nyediaka pelajar bekualiti ba tikas primari enggau sekondari dia sida empu ulih meri fokus melanja anak sida ba institut pelajar tinggi aja. Batang pekara ba sida ke ba kategori tu iya nya sida ngemeratka tanggung pengawa personal sereta nguji enggau naka ulih ngemanahka agi gaya pendiau sida.

Simpul Runding

Endang enda ulih diseliahka gaya sosioekonomi di Malaysia enggau menua bukai ti ngujungka kita majak betapi enggau penguji ti besai amat. Tang semua penguji tu enda patut nyadika penekul pengidup kitai munyi ku Reinhold Niebuhr, “Tuhan, beri aku runding ngambika aku ulih nerima pekara ti enda ulih diubah, pemerani dikena aku ngubahka pekara ti ulih diubah sereta pemintar dikena aku betatika pemida entara kedua-dua pekara.” Enggau nya kitai ngarapka diri enda terunda-runda enggau pekara ti enda ulih diubah tang meri fokus ti lebih senentang chara kitai ulih napi ubah ke nyadi ba diri empu enggau ba orang bukai.      

Tiada ulasan:

Catat Ulasan