Pansut ari zon lantang

Diau ba tempat lantang endang nyamai tang iya nadai tentu meri pemanah enti diperati ari sukut awak ti panjai. Nya alai bisi orang mai bala ke agi biak pansut ari zon lantang ti betukuh sementara aja. Peninju ti tebilang dunya, Muhammad Ali kala nyebut orang ke enda berani napi risiko deka enda tulihka nama-nama dalam pengidup sida.

Siti ari langkah rapat nya meransang bala nembiak redak bebendar gawa lalu pansut ari zon lantang. Tang taja pia, agi mayuh orang enda tentu nemu sentang pekara tu lalu agi bisi nanya nama utai ke dikumbai zon lantang tu.Zon lantang nya ruang tauka situasyen ke alai kitai ngasaika diri nyamai ba dalam nya. Ruang enggau situasyen tu nyau kelama-lama ngasuh kitai empu berasai kelalu likun lalu ngujungka kitai enda sanggup pansut ari endur nya.

Nitihka penulis enggau pakar motivasyen ari Amerika Syarikat, Bo Parrish madahka dalam zon tu, kitai enda ngasaika sebarang emosyen ti nyata lalu asai ati kitai semina statik aja. Iya ti bendar kitai nya agi ba taka ti sama lalu enda ulih eksploit pengulih diri. Ngagai sida ke udah tedani lalu deka pansut ari zon lantang, kaki mega asai ke berat deka nyingkang, ati berengkah asai gegetar lalu minda enda ulih tepedaka pemanah pekara nya. Nya mih ti nyadi enti kitai kelalu lama diau ba zon lantang kelebih agi kenyau ari umur kitai agi biak.

Simptom zon lantang

- Taja pan kita gagau, tang kitai agi enda berasai puas. Utai ke dijuluk ati kitai suah agi ba tikas ‘nganti dulu’ aja. 

- Taja pan bisi ubah mimit tang kitai ngasaika enda nyamai sereta ati gegetar. 

- Seruran bepikir deka ngelepaska juluk ati ukai lantang diatu.

Nama kebuah patut pansut?

Diau dalam zon lantang ukai pekara ti enda badas. Sapa ke enda rinduka pengelantang enti kita semampai ngasai likun sereta enda ibuh berundingka risiko enggau penanggul bukai di luar. Ambika banding, maya belelak sereta bepedaka televisyen maya udah badu kereja, bisi apai indai tauka laki bini ke mantu kitai ba mayuh pekara tauka ngaga kereja rutin di opis ngambika iya tembu. Nya mih ke ngasuh kitai berasai lantang. 

Taja pia, pengidup kitai ukai semina naka nya aja enti nadai utai ajih nyadi. Kitai tentu nadai belajarka utai baru lalu enda tepedaka peluang ti bisi ngelingi kitai. Kitai mega agi diau ba tikas ti sama lalu semina bepanggai ba nasit aja. Semina enggau chara nyingkang pansut ari zon lantang baru pengulih kitai deka ngerembai.

Langkah pansut ari zon lantang

- Tulis tuju ti nemban. ‘Aku dekaka kereja ti manah agi ari diatu’, nya tuju ti kelalu kabur. Iya ti patut disebut kitai nya ‘aku dekaka pengawa ti ulih meri aku duit ti chukup lalu kereja ti ngemuaska ati seraya ke agi bisi meri aku awak ti chukup kena aku begulai enggau diri sebilik.’

- Tulis semua runding ti negatif ke tau nagang kitai ari nyapai juluk ati diri empu. Ambika chunto ‘aku udah tuai lalu enda ulih ngereja pengawa tu’, ‘aku tentu enda bulih duit ti chukup kena ngidupka diri.’ 

- Enti udah tembu, bacha genap runding ti negatif nya enggau nyaris. Munka enggau ayat tu ‘aku ngelepaska pengarap negatif tu ari terus ngeruga pengidup aku.’

- Pikirka pengulih tauka utai ke dikemisika kitai ti ngayanka kitai nya ulih nyapai juluk ati kitai. Taja pan enda mayuh tauka enda kuat, kitai sempama baka ke udah bisi batu dikena merejuk.

- Beri tuju tauka juluk ati kitai siti timpuh maya ti tetap dikena mantu kitai nyeliahka diri ari semampai deka nangguh juluk ati kitai nya.

- Berengkahka pengawa kitai enggau ngembuan siti bup jurnal. Tulis misyen enggau perambu ti nyata terang dikena kitai nyapai juluk ati nya. Tulis mega pengawa ti digaga kitai dikena ngulihka juluk ati nya.

- Gaga jarin pengelikun tauka kaul pengelikun. Reti nya, tentuka nuan nemu sapa ti ulih dikuntik lalu alai minta lalau maya bisi penanggul. Apai indai, tawing rapit tauka mentor nyangka ulih nyaup meri jaku peransang ngagai kitai.