Tabin typhoid
nya ukai penyakit ke nyelai di Malaysia. Iya ke nyadi ba Kuala Lumpur nya ke
baru nyadi kemaya hari tu. Kelia Iban kala ngumbai tu penyakit muang ai. Penyakit
muang ai ke ku Iban lebih ngagai penyakit kolera. Sebedau tu penyakit typhoid
tu kala ngerekai ba menua Kelantan dalam taun 2012.
Taja pan ulih
ditagang sereta bedau kala datai ba tikas epidemik penyakit baka tu tau
ngemaleka menua kitai ke bisi juluk ati deka nyapai status menua maju. Kebuah
pia, penyakit bansa tu suah agi nyadi ba menua ke bedau mansang ke alai
standard pemeresi rama sida agi baruh amat. Reti nya, baka ni kati pan peninggi
standard pemeresi diri enti kitai udah
ba palan rama kitai mega napi risiko rampa endur ti kamah baka kedai pemakai.
Penyakit tu
datai ari, dirapit nengah ai enggau pemakai ti kamah. Bakteria ti dikumbai salmonella typhii tama ke dalam pemakai
lebuh ti dibai orang ke nyediaka pemakai ti enda tentu ngintu pemeresi diri
sepengudah pansut ari agu.
Sida ke ba
pengawa nyediaka pemakai patut meresika jari sida enggau sabun anti bakteria
ninting kali pansut ari agu laban bakteria selalu ngerekai nengah tai mensia.
Iya mega ulih tama ke dalam ai enti sistem paip agu bisi pantis sereta ditembus
ngagai paip selama. Nya mih kebuah penanggul tu ulih ditagang ari nyadi enti
sida penerit adat bisi bejalaika pengawa sida enggau silik ngelama tu.
Penanggul ke
nyadi baru-baru tu bedau datai ba tikas ke balat ngerekai laban bedau bisi kes
bebadi. Pun penatai penyakit tu agi bedau ditemu tang rayat Malaysia dipinta
terus nyaga pemeresi lalu mentin diri ari keluar makai taja pan makai nya siti
ari pengawa lepa ti dikerinduka orang Malaysia. Kelimpah ari nya, sebun asap
mega siti agi kebuah kitai sama-sama patut ngetuka diri sementara ari makai ba
luar.
Taja pia, enti
enda ulih diseliahka mega dia kitai patut makai ba kedai ti beresi, ai ti
meruan sereta orang ke nyediaka pemakai nya ngena gari ti menyana beresi.
Perati mega pemakai ti udah lama disediaka; kebuah pia kitai bela enda nemu
kemaya sida nyediaka pemakai nya lalu ni naka tikas pemeresi palan pemakai ke
udah alai sida nyediaka pemakai nya. Nya alai, manah agi pilih pemakai ke agi angat baka pemakai
bekuah tauka pemakai ti disediaka ba endur nya maya nya mega. Tentuka mega
semua ai irup nya dipanduk.
Sensitiviti
mensia mayuh ngagai pekara tu ngayanka pengingin sida meda standard pengawa
neritka adat dipejalaika raban ari Opis Menteri Pengawa Berumah enggau Opis
Menteri Pengerai. Sida tu mih ke bekuasa nyaga tikas pemeresi rama ti nyamin
pengelikun mensia mayuh. Pengawa ti semina terit maya bisi penanggul datai
patut diubah laban enti sida ke ba kedai daja enggau restoran seruran diperesa
pemeresi tentu pekara ti baka tu enda nyadi. Pengawa ti baka nya suah disema
orang baka sempama jaku tuai; ujan datai baru belangkau, langkau tembu ujan
badu. Orang ke bedagangka pemakai ti nadai lisin enggau permit patut dibai
ngagai court sereta diukum setipak enggau penyalah ti digaga sida. Nya mih
kebuah, sida penerit adat ari opis pengerai patut mega disalahka ketegal
penusah ti udah nyadi. Pemesai ari opis pengerai patut suah agi meresa ngenyit
kedai enggau palan alai makai sereta nyeliah diri ari makai suap dikena nutup
penyalah bala pedagang tu. Tanggung pengawa sida endang nyaga pengerai rama ngambika
semampai likun.
Tiada ulasan:
Catat Ulasan