Kaul entara Pengerai enggau Sebun Asap

Selamat betemu baru ngagai raban pemacha blog tempalang kenang tu. Berasai lama udah enda ayan. Minta ampun ngagai raban pemacha ke nganti artikel ke deka dipansut tang lalu enda temu semaya. Ukai pia, kelimpah ari mayuh pengawa bisi kebuah bukai mih penulis enda ulih ngenataika diri enggau kenang pengarang ti baru.

Mayuh pengawa enti nunda ukai patut nyadi batang dalih kitai lebuh madahka diri enda tekerejaka sesebengkah pengawa. Tang nya mih ke suah nyadi buah mulut bala iban lebuh madahka diri enda tekerejaka pengawa.  Nyadi penulis pan baka nya sekali dua ngena dalih tu. Arapka iya enda nyadi tebiat tauka ulah laban iya tau lekat nyadi ba tubuh kitai ke dibai kitai kin kitu. Nya kebuah bisi orang madah nya udah nyadi pemai ulah uchak nya.

Dua tiga minggu ke udah tu penulis balat dikangau nguluka aum baik nya di Nanga Lutak tauka ba nengeri Kuching. Udah datai ba ujung minggu nyau abis tulang urat lunggar lalu ngiga maya alai belelak, ngalap enda lama ari pengawa berat.

Kelimpah ari nya, menua kitai Malaysia mega napi penusah angin kamah ketegal sebun asap ke dipuputka ribut ari menua Indonesia. Kenu ku berita ti ditampung penulis madahka bulan September enggau bulan October endang maya sida din numu reban, nunu dandang alai sida nanam sawit. Lama mega udah pengawa betunuka reban umai tauka dandang alai nanam sawit tang nadai ngelaban sekali ke alai angin balat bendar kamah sereta lama amat enda badu-badu.

Ninting taun endang bisi angin kamah tu. Iya ukai semina datai ari menua Indonesia tang mega menua kitai empu kelebih agi Sarawak. Nyau berasai tuai udah umur tu napi asap ke besebun ke baka tu tang kitai enda bangat serebana baka ke sekali tu. Enti suba bansa Iban endang nadai ngemeran batang pengawa bukai enti enda bumai betaun. Sida mega nadai chara bukai dikena ngensiangka umai kelimpah ari nunu reban kayu enggau babas ti udah ditebang sereta ditebas sida. Tang kelia sebun asap ke kamah enda bangat udu baka kediatu.

Diatu kelimpah ari sebun asap ari dandang kebun sawit, sebun asap endang sedia ada datai ari kilang, sumil kayu enggau kereban pengangkut. Ketiga-tiga pekara tu endang lama mega udah bisi ba menua kitai. Nya kebuah, lebuh sebun asap balat nyadi kemaya hari tu nya ketegal ditambah enggau pengawa betunuka reban.

Nyadi kebuah penulis tak empegal nyerita pasal sebun asap tu laban iya bisi kaul enggau pengerai kitai mensia. Penulis mih entara bala anak mensia ke kena pedera rengga ketegal sebun asap tu. Kuala Lumpur enggau Kuching nya dua buah endur ke suah alai penulis kuang kuit ngiga anak belanja kena ngidupka diri enggau kami menyanak. Dua buah endur tu mih ke balat bendar besebun. Di Sarawak lebuh ke baum ba Hotel Grand Merdeka, padang Merdeka ti betiban enggau hotel tu enda nyau beserapun dipeda ari jenila hotel. Empa pemalat sebun asap tu alai sekula ba bagi menua Kuching, Samarahan enggau Sri Aman diperintah tutup sepengelama dua hari. Maya nya penulis udah ngemulaika diri ke Kuala Lumpur. Maya ke di Kuala Lumpur sebun asap mega majak balat-sebalat ari sehari ke sehari. Ketegal pemalat sebun asap nya mega sekula di Malaya nyau deka genap menua semina Kelantan aja enda, diperintah tutup dua hari. Maya sekula tu tutup, penulis ngemulaika diri ke Kuching.

Laban sebun asap endang udah kelalu balat sereta enda tentu ulih diseliahka ngujungka penulis pan tabin bebirin. Di rumah kemisi ke dipinta ukai semina kena belelak tang ngenatka diri, gegaring ngetatka batuk ke munyi rengkung-rengkung enggau idung ke sirut-sirut. Ubai rengga enggau ubat batuk nyau dua kali pusin abis diempa tang insak enda majak tempuyak buah rian, batuk majak rengkung-rengkung munyi orang nebah engkeremung.

Nitihka ripot opis pengemata gaya hari madahka indeks pengamah angin ba sekeda endur udah datai ba tikas ke jai amat. Tang maya nya nyadi data ke dibantai opis gaya hari ari menua Malaysia enda sebaka enggau enggi sida ari Singapore. Baka nya mega peda mata kasar kitai endang balat tang disakal sida ari Malaysia. Nyau meniga hari udah nya baru sida madah kereban ke dikena sida nimpai utai kamah dalam angin nya enda sebaka enggau sida ke ari Singapore. Kitai ke napi angin kamah nya endang udah berasai nemu pemalat angin nya ke kamah. Kelimpah ari ripot data ti enda nemban nya isu kitai ditu suah nyakal penemu orang mayuh ngujungka diatu balat bendar utai, pekara tauka penemu ti dibantai enda tentu ulih diterima mensia mayuh.

Isu sebun asap ti balat nya endang udah nyadi ninting taun. Tang diatu penusah tu balat agi nyadi ketegal faktor bukai munyi ke udah disebut tadi baka asap ari kilang enggau kereban pengangkut baka kerita, bus enggau lori. Sida ti bekuasa patut berunding kelebih agi enti utai tu bisi kaul enggau entara menua. Nama menua udah dirungkup sebun asap mayuh utai enda nyadi. Bungai enda nyadi. Enti bungai enda nyadi pun buah sigi rumbau. Sayur ke ditanam mega baka nya. Orang ke bekebun sayur nadai chara bukai tang nikika rega sayur. Enti mayuh orang sakit kelebih agi pengereja pengawa, produktiviti mega nurun. Baka nya mega bala nembiak enda ulih belajar formal laban sekula diansak tutup.

Taja pan balat agi mai empas negatif sebun asap tu bisi mega mai empas positif ngagai sekeda orang baka sida raban klinik prebet enggau kedai ubat tauka farmasi. Sida tu baka ke gaga nerima penatai pesakit ke deka berubat tauka bebelika ubat dikena ngeraika penyakit rengga, tabin enggau batuk. Enti baka penulis sekali tu udah tiga butul ubat Chap Ibu dan Anak abis ditegup baru bisi belinsur manah.

Diatu udah manggai ba tengah bulan October, sebun asap agi ayan ba menua Kuala Lumpur. Kami ke diau ba nengeri ditu enda nemu maya penusah tu tauka ngetu. Tang munyi ke dipadahka pemesai ari opis pengemata gaya hari madahka ubah sereta penatai angin monsun nyangka tau ngemaduka sebun asap tu ari majak nyadi. Sama-sama mih kitai merati sereta ngarapka pengamatka jaku sida.