Penteba Karang Ti Lati

Juluk Kurikulum jaku Iban ba sekula nya endang dikena nempa, ngaga, ngambuh sereta nyepuh nembiak awakka sida ulih sereta pintar bekomunikasyen dalam pengidup sida besehari-sehari maya begulai sejalai enggau orang, maya ngulih penemu sereta rindu belematika mayuh macham bansa litericha lalu ulih mantaika buah runding diri ngena jaku Iban standard. Ari juluk kurikulum nya ngasilka sekeda objektif pelajar ti patut dijapai nembiak dikena negapka pengelandik sida ngena jaku nya.

Siti ari objektif pelajar ti deka dikenang ditu nya senentang pengelandik nembiak ba bidang nulis. Ba pengujung pengawa ngajar enggau belajarka jaku Iban di sekula sekondari nembiak ditagaka udah nemu ngena penerang ti udah diulihka sida dikena ngeluruska penanggul, ngaga pemutus runding lalu naburka penerang nya ngena chara betulis. Sida mega dikarapka ulih mataika pikir sereta penemu diri ngena chara betulis enggau jalai ti kreatif sereta bisa.

Pengelandik jaku nya nyengkaum pengelandik mending, bejaku, macha enggau nulis. Tu mih pekara ti ditaga patut dikuasa nembiak sereta nyadika tulang belakang kurikulum jaku Iban. Nembiak patut ngena pengelandik jaku tu dikena napi bidang interpersonal, dikena ngulihka penemu, mantaika penemu sereta nemu reti pemanah jaku.

Munyi ke udah disebut pengelandik ti deka dikenang ditu nya sentang pengelandik nulis. Pengelandik nulis tu penglandik ti besai bendar guna ngagai mensia kelebih agi dalam pengidup kemaya hari tu. Pengelandik tu ngujungka nembiak nemu nulis enggau jingan baka landik ngena pengaya jaku ti betul sereta standard, ngena jaku ti betelipi, lanchar enggau ayat ti gramatis. Pekara ti ditulis mega bisi tema enggau isu ti terang, runding ti rurus, format enggau genre ti betul. Nambahka nya nembiak mega ulih ngedit, ngemetul tauka nyeruri sereta nusun karang enggau mayuh macham penerang.

Siti ari aktiviti pengelandik nulis nya pengawa nulis karang. Nulis karang tu endang tu diajar sereta dipelajarka nembiak kenyau sida ba sekula primari. Ba sekula sekondari, pengawa nulis karang majak diajar sereta dipelajar ngambika sida ulih nyapai objektif pengelandik nulis. Pengawa nulis karang tu mega bisi ditisih ba tikas pom tiga enggau pom lima dikena meda sereta nyukat pengulih sida dalam pengelandik nulis.

Ba pom tiga bisi dua aktiviti tisih sentang pengawa nulis karang iya nya mindahka penerang ngagai jaku tulis dalam tukuh karang pandak sereta nulis karang rama ti nyengkaum karang beformat enggau karang selama. Ba  pom lima karang bisi ditisih dalam Bagi A tanya tikas SPM sereta karang ti diasuh gaga nya mungkur beberapa dimensyen ti nyengkaum dimensyen diri empu, diri sebilik, sekula, komuniti, menua enggau pekara ba tikas global.

Maya dalam kelas bala nembiak tentu udah masai diajarka pengajar enggau mayuh macham karang. Pengawa tu balat agi dikereja lebuh ngirai diri maya peresa betulis ba tikas pom tiga enggau maya peresa SPM. Bala nembiak ti deka napi peresa kelebih peresa ba tikas SPM tentu deka nemu penteba karang ti lati. Kebuah pia ngambika sida nyamai ngirai diri ke pengawa tu maya peresa nya nyadi ila.

Penteba karang ti lati nyengkaum tiga pugu pekara iya diperatika ari sukut isi karang, jaku ti dikena enggau gaya karang nya ditulis.

Isi karang nya patut nemban sereta relevan enggau tanya karang nya. Kelimpah ari nya mega, isi karang ti nemban sereta relevan patut dikerembai, chukup terang sereta dikelapung enggau chunto ti engkeman sereta relevan.

Penteba kedua nya mungkur jaku ti dikena maya nulis karang. Karang ti lati ngundan mayuh leman leka jaku baik nya jaku tunggal tauka jaku bepenambah. Leka jaku ti dikena nya lebat sereta enda betandu. Iya mega mesti nemban sereta terang nitihka konteks tanya. Kelimpah ari leka jaku, karang ti lati mega ditulis ngena mayuh macham struktur ayat. Ayat ti ditulis nya mungkur ayat selapis enggau mayuh bansa ayat turu ti chukup gramatis. ayat pasif enggau ayat aktif, ayat selama enggau ayat tunsang mega patut dikena maya nulis. Karang ti lati mega nadai ngembuan sepil enggau tanda bacha ti salah enti udah dipeda nengah chara holistik. Penyalah jalai jaku mega ba tikas ti pengabis minimum entara semua karang.

Penteba karang lati ti kepenudi tu diperatika ari sukut gaya karang nya ditulis. Tiap-tiap penulis karang negmbuan chara kediri empu lebuh nulis karang. Karang ti lati mesti ulih narit ati pemacha sereta semitan nitihka tanya. Pemacha bisi ati deka terus macha karang nya enti gaya nulis nya naritka ati. Dikena nentuka karang nya lati tauka enda, jaku ti dikena mega nyengkaum jaku dalam enggau penemu tuai ti betul sereta engkeman enggau tanya ti diberi. Reti nya karang nya bisi ngundan sekeda jaku sempama. Paragraf dalam karang mesti dibidaka entara paragraf pemuka, isi enggau penutup. Isi ti bebida mesti ditulis dalam paragraf ti bebida. Enti sesebengkah isi nya dikerembai enggau panjai, iya patut dipechahka ngagai beberapa buah paragraf. Paragraf ti manah nya paragraf ti nyau deka sama panjai entara sebuah paragraf enggau paragraf ti bukai. Tu nyengkaum paragraf pemuka enggau penutup.

Diarapka jaku kenang senentang penteba karang ti lati tu ulih meri penguntung ngagai bala nembiak ngambika sida tulihka pemutus ti manah dalam peresa kelebih agi ba tanya karang. Ngagai raban pengajar, kenang tu nyangka diarapka ulih meri malin ngagai sida dalam proses ngajar enggau belajar nulis karang.