Kurikulum Standard Mata Pelajar Jaku Iban Tikas Primari

Kenyau ari taun 2011, kurikulum sekula primari udah betukar ari kurikulum lama ti dikumbai Kurikulum Bersepadu Sekolah Rendah (KBSR) ngagai Kurikulum Standard Sekolah Rendah (KKSSR). Mata pelajar jaku Iban mega ampit enggau ubah kurikulum tu. Enti maya KBSR suba jaku Iban semina berengkah diajar ba primari tiga lalu diajar nyentuk ke primari enam tang ba baruh kurikulum ti baru (KSSR) dia mata pelajar tu sama baka mata pelajar bukai iya nya berengkah diajar ari primari satu nyentuk ngagai primari enam.

Kurikulum Standard Jaku Iban Sekula Primari mega baka mata pelajar ti bukai, endang ditempa nitihka prinsip sereta semengat Filosofi Pelajar Nasional tauka tebilang agi dikumbai Falsafah Pendidikan Kebangsaan. Dalam kurikulum tu, iya mega ngaraka langkah rapat ngajar enggau belajar ke mungkur mayuh bengkah standard, pengelandik enggau aktiviti. Nambahka nya, kurikulum tu ngembuan juluk ati ti deka nyikap nembiak enggau penemu sereta pengelandik abad ke-21. Nyadi tu sigi dikena ngangkatka pengelandik nembiak berunding ba tikas tinggi ngambika sida ulih mujur napi arus globalisasyen nyengkaum segang pemansang e-ekonomi sereta pemansang teknologi pemadah enggau komunikasyen.

Dalam arus ubah kurikulum ti baru (KSSR) dia mata pelajar Jaku Iban diungkupka status mata pelajar dalam Tunjang Komunikasi Elektif. Reti nya, mata pelajar tu dipasuk ke dalam taga jam belajar ti sama enggau mata pelajar bukai lalu tau dipelajarka semua nembiak enda milih bansa asal sida rinduka mata pelajar tu. Kuasa ngemendarka mata pelajar tu diajar dalam taga jam sekula bisi dikeluarka bepelasarka Surat Pekeliling Ikthisas Bilangan 11 Tahun 2010: Pelaksanaan Kurikulum Standard Sekolah Rendah (KSSR) Tahap Satu Mulai 2011.

Kelimpah ari mata pelajar Jaku Iban, modul elektif nya mega nyengkaum Bahasa Arab, Bahasa Cina SK, Bahasa Tamil SK enggau Bahasa Kadazandusun. Ungkup maya ngajar enggau belajar modul elektif tu iya nya 90 minit (3 taga jam belajar) ti dipasukka dalam taga jam belajar sekula.

Ngajar enggau belajarka jaku Iban endang dikena nentuka nembiak rebak baru seruran bepegai ba adat basa sereta bekenjing ngidupka diri bepelasar ba adat asal enggau waris budaya bansa Iban. Nembiak patut bebendar belajar sereta belematika pemesai reti ngemeranka jaku enggau adat ti dititi entali kenyau ari menya ngambika pemansang jaku Iban tu seruran regas lalu gasa bansa Iban seruran tegap, tajam ati sereta pintar napi arus pemansang.

Dalam kurikulum tu mega, raban pengajar ti ngajar mata pelajar tu patut seruran ngemeranka pengelandik beukur tambah sereta ngerembaika budaya bansa Iban dalam aktiviti ngajar enggau belajar. Ari nya jaku tu tau nyungkak penyerakup sereta pengingin nembiak ngelala budaya, adat basa enggau tradisyen semua pupu raban bansa di Malaysia. Kaul sereta pemereti ati ke baka tu meri awak endur semua peranak bansa Malaysia ngenegapka semengat 1 Malaysia. Nya alai ngajar enggau belajarka jaku Iban patut besenutuk enggau rampa budaya idup lokal sereta nitihka konteks pluralisma di Malaysia sebedau kitai nimpai jauh ngagai dunya luar.

Kurikulum ti udah ditempa tu mungkur tuju, objektif, prinsip pedagogi, aspek guna jaku, elemen beukur tambah, standard isi, standard pelajar enggau standard tisih. Turai pelajar iya ditusun bepelasar ba pengerembai standard isi ke diterangka enggau lenak dalam standard pelajar. Jaku Iban tu endang patut ditarak lalu dikuasa nembiak sebedau sida ditisih nitihka standard pemenyana. Kelimpah ari nya, kurikulum tu mega betatika kaul-jaul pengelandik jaku, guna jaku, pengawa nyerap penemu, pengelandik beperagam lalu ngemeranka ukur pemanah dikena ngilir sida nembiak enggau semengat besemekih ngemansangka diri sereta belajar sepemanjai umur.

Nambahka nya, nembiak patut ditarak sambil beperindang dikena ngenajamka pengulih, ngelantangka diri sereta ngelatih pengelanchar sida bekomunikasyen ngena jaku Iban. Aktiviti kokurikulum mega patut diperambu ngambika tau nyadi pelasar dikena meransang pengerindu belajar, mandangka pengelandik soft-skills sereta nempa tukuh nyadi tuai. Sida patut ditimuh enggau semengat patriotik ngambika sida berasai temegah nyadi peranak menua Malaysia. Nembiak ti udah tembu belajar ba sekula primari diarapka besedia nyatup penanggul, ngembuan pengadang sereta berasai angkun ngemansangka diri empu.

Sanding penemu:

Bahagian Pembangunan Kurikulum (2013), Dokumen Standard Kurikulum dan Pentaksiran, Modul Elektif, Bahasa Iban Tahun Enam, Kementerian Pendidikan Malaysia.

Kementerian Pelajaran Malaysia (2001), Sukatan Pelajaran Bahasa Iban, Kuala Lumpur: Dewan Bahasa dan Pustaka

_____________ (2003), Kerembai Turai Pelajar Bahasa Iban

_____________ (2003), Sukatan Pelajaran Kurikulum Bersepadu Sekolah Rendah Bahasa Iban, Pusat Perkembangan Kurikulum

achiarasecret.blogspot.my/2015/11/evolution-of-bahasa-iban-html

tempalaikenang-uchutedung.blogspot.my/2009/12/turai-pelajar-bahasa-iban.html

www.moe.my/v/kurikulum-kebangsaan

www.suneducationgroup.com/pendidikan-di-malaysia