Sistem Jaku Iban Di Sekula nya
malin pugu pekara sentang fonologi, morfologi enggau sintaksis ungkup mata pelajar
jaku Iban ba semua renggat sekula. Sistem tu udah dipejurai sereta digaga nyadi
sebuah bup ti dikumbai Sistem Jaku Iban Di Sekula.
Sistem tu digaga dikena napi guna
Turai Pelajar enggau Kerembai Turai Jaku Iban sekula primari enggau sekula
sekondari sereta ngembuan tuju ti deka nyambut juluk ati enggau semengat
Filosofi Pelajar Bansa tauka Falsafah Pendidikan Kebangsaan lalu nyediaka
nembiak napi arus globalisasyen taja pa enda ninggalka penyelai jaku enggau aris
chura budaya lokal.
Pengawa Opis Menteri Pelajar ke
nyemaka sereta ngatur standard sistem jaku Iban tu udah nerima sukung ari Opis
Sapit Kepala Menteri Sarawak. Nya alai, sistem enggau bup ti udah diasilka
raban komiti pejurai sistem tu udah dikeamatka nengah sempekat ti diatur kena
26 ngagai 30 November 2006. Aum sempekat tu udah mujur nempa sejarah baru
ketegal deklarasyen sempekat nya udah diterima mayuh instutitusyen perintah
enggau ukai perintah. Deklarasyen ti diatur kena 1 Disember 2006 nya udah nyadi
pemun tanda tikas sanding sistem jaku Iban kelebih agi ba sekula.
Asil ari sistem tu, raban pengajar
diarapka ulih merambu sereta bejalaika pengawa ngajar enggau belajarka jaku
Iban enggau semitan agi. Sistem tu mega diarapka ulih nyadika malin sereta
sanding penemu ungkup semua raban kelebih agi sida ke deka nempa ngaga bup
teks, ngaga kereban sukung sereta pengawa tisih jaku Iban ba tikas nasional.
Besenutuk enggau nya, raban
pengajar jaku Iban patut seruran sensitif ngagai tikas guna enggau pengulih
jaku Iban bala nembiak sekula sida nengah chara belematika kaul rakup penemu,
ukur pemanah enggau pengawa ti dikemeranka nembiak sida. Pengawa ngajar enggau
belajar diperambu ngambika ulih nempa peranak menua ti ulih bekomunikasyen
ngena jaku Iban standard sereta neruska waris budaya Iban.
Tiada ulasan:
Catat Ulasan