Panyun Jaku
Landskap kurikulum
jaku Iban berubah enggau jampat dalam kandang beberapa dekad ti udah kenyau ari
kurikulum struktural iya nya Kurikulum Lama Sekolah Rendah (KLSR) diganti
enggau kurikulum komunikatif iya nya Kurikulum Bersepadu Sekolah Rendah (KBSR).
Kurikulum tu ngaraka mayuh bengkah atur enggau langkah rapat ngajar enggau
belajar. Nya mih kebuah ubah paradigma dalam atur pelajar ngelama tu ditemu
bisi nating sereta mai pengeribat ngagai bala pengajar ti ngajar mata pelajar
tu di sekula. Nyadi sekeda pekara ti nyadi penguji sereta nyakap pengawa
pengajar tau diperatika baka ke ditusi di baruh tu.
Konten tauka isi
pelajar
Kelalu mayuh konten
diajar dalam awak ti serekat nya dilema ti seruran ditapi raban pengajar jaku
Iban di sekula. Kurikulum ti padat nating pengajar nyediaka langgur ngajar,
kereban bantu enggau aktiviti ke menyana dalam awak ti serekat dikena ngulihka
juluk tauka asil belajar. Ngelama tu pengajar balat agi meri fokus ngagai
pengawa ngemayuh ni nembiak patut diajar
tang ukai ngemulih ni nembiak belajar. Nya mih kebuah pengajar suah bendar
ngasaika diri ditating enggau kereja latih, tisih enggau peresa ti tampung
menampung sepemanjai maya dikena nentuka gred. Nya alai ubah paradigma ti
dikedekaka diatu iya nya deka meda ngemulih ni nembiak belajar. Nambahka nya
ubah ari sukut pemai ulah enggau pengeregas nembiak asil ari ti belajar patut
nyadi fokus pengajar ti ngajar dalam kelas.
Ngenataika pelajar
Pengawa ngajar ti
semina ngenataika isi kurikulum aja udah ditemu enda semitan ngasuh nembiak
bulih pengelandik ke dipelajarka sida. Pengajar semina betimbangka pemayuh isi
kurikulum enggau pengelandik sereta pengulih penemu ti nyadi ba nembiak. Nyadi
ubah ti dikedekaka diatu iya nya pengajar patut nyendiaka ruang alai nembiak
ngereja aktiviti dikena ngenegapka pengelandik jaku, sistem jaku ti nyengkaum
jalai jaku enggau bungai jaku. Nembiak diberi peluang senaka-naka iya luas alai
sida bejalaika aktiviti ngambika peluang belajar ti bepusat ba nembiak deka
dipeda autentik agi sereta mai reti ti dalam ba pengidup sida.
Tisih enggau
indikator pemulih
Pekara ti beguna
bendar dalam proses ngajar enggau belajar nya tisih ti ngayanka asil pengulih
belajar. Tisih dipejalaika dikena berati sekalika proses ngajar enggau belajar
nya semitan tauka enda. Ubah dalam langkah rapat, strategi, akal chara enggau
pedagogi ke dikena ngemansangka pengelandik sereta penemu nembiak ari tisih nguji pemulih belajar ditukar
ngagai tisih ngemeranka pelajar.
Tisih ukai semina naka nyadika indikator dikena meda pengelandik pengajar tauka
pengeregas nembiak tang beguna bendar enti iya ulih nyadi seruan; iya nya iya
ulih nusui, ngemadas aktiviti ngajar enggau belajar ti udah dipejalaika.
Raup Penemu
Nya sekeda ari ubah paradigma
dalam atur pelajar ngelama tu ti ditemu bisi nating sereta mai pengeribat
ngagai bala pengajar ti ngajar mata pelajar tu di sekula. Arapka kurikulum baru
iya nya Kurikulum Standard Sekolah Rendah (KSSR) mai ubah ti manah agi ari
selama.
Tiada ulasan:
Catat Ulasan