Panyun Jaku
|
Enggau juluk ati ti deka besemekih enggau menua bukai ke udah jauh mansang di dunya tu, dia sistem pelajar kitai patut ulih ngasilka nembiak rebak baru ti bepenemu, ulih bepikir enggau chara ti kritis, kreatif sereta bisi ngembuan komunikasyen ti semitan ba ringkat global. Langkah ti deka nguna Pengelandik Bepikir Tikas Tinggi tauka tebilang agi disebut Kemahiran Berfikir Aras Tinggi (KBAT) dalam pengawa ngajar enggau belajar diarapka ulih ngangkatka prestasi menua kitai kelebih agi lebuh besemekih ba peringkat antarabansa baka dalam tisih Programme for International Student Assessment (PISA) enggau Trends in International Mathematics and Science Study (TIMSS) ti bisi disebut dalam Perambu Pemansang Pelajar (PPP) 2013-2015.
Konsep enggau
Teori Pengelandik Bepikir Tikas Tinggi (PBTT)
PBTT tu mungkur
pengelandik intelek ti tinggi. Pengelandik nitihka selama mungkur empat tikas
ti di atas dalam Taksonomi Bloom iya nya aplikasyen, ngaga analisis, nyerenih
enggau nengkebang. Peratika grafik di baruh tu:
Pengelandik Bepikir
Tikas Tinggi
|
Nengkebang
|
Nyerenih
|
Ngaga Analisis
|
Aplikasyen
|
Mereti
|
Ingat
|
Pengelandik Bepikir
Tikas Baruh
|
Nama utai ti
dikumbai Pengelandik Bepikir Tikas Tinggi (PBTT)
PBTT mega begunaka runding tauka runding ti kritikal, runding ti kreatif, runding
ti logikal, runding ti reflektif enggau meta kognitif. Reti nya nembiak mencerap
sesebengkah data tauka penerang udah nya lalu diproses dalam minda sereta
kepenudi iya dikeluarka baru dalam mayuh macham tukuh. Pengelandik bepikir mega
dikumbai bepikir nengah chara kritis enggau
kreatif.
Nembiak ti bisi ngembuan pengelandik tu endang nadai sekat lebuh manding, mida,
nusun atur, ngelas sereta nemu kebuah enggau empas nitihka penemu enggau
runding diri empu. Enti nembiak diberi siti tanya, nembiak nya ulih meri saut
ti mayuh macham, idea baru lalu ulih meratika pekara nya ari mayuh sukut. Tu mih
ke dikumbai nembiak nya ulih bepikir betukuhka kreatif, inovatif lalu ulih
nengkebang sesebengkah idea baru.
PBTT tu mega bisi pengelebih ti bukai. Iya ulih ngangkat sereta nambahka
pengulih nembiak. Sida ulih ngetan, nyaga, mutar sereta ngukur pelajar ti udah
dikuasaka sida. Pengulih tu ngasuh sida produktif agi sereta bisi daya
besemekih enggau orang bukai. Nangkanka nya sida mega ulih nambah pemereti sida
sereta negapka pelajar sida senentang sebarang pekara ti deka dipelajarka sida.
Tanggung pengawa pengajar signifikan amat alai sida nyerapka pengelandik bepikir tikas tinggi ba
nembiak. Pengawa nuju pekara ti patut dipejalaika enggau bebendar. Pengelandik bepikir
tu ukai pekara baru ba raban pengajar laban sida udah kala dibantaika enggau konsep
sereta langkah rapat pengelandik tu maya sida dilatih nyadi pengajar baik nya
ba palan pematih pengajar tauka universiti. Taja pia, sida patut nambah
pengulih pengelandik bepikir sida ngambika sida ulih meri ajar ti pengabis
manah ngagai nembiak sida. Entara chara ti semitan ti ulih digaga dikena
ngemasukkan PBTT dalam pengawa ngajar enggau belajar nya mantaika tanya ti bisi
elemen PBTT maya proses ngajar enggau belajar dipejalaika. Tanya ti kenataika
nya bansa tanya ti ulih ngasuh nembiak ngaga aplikasyen, ngaga analisis, ngaga sintesis
sereta nyerenih sesebengkah penerang ari ti semina madahka baru fakta tauka
semina ngingatka fakta ti udah dipelajar.
Tiada ulasan:
Catat Ulasan