Puntan patut nyadika chunto atlet nempa pemujur

6 April 1980 nya haribulan ke alai team main bol Malaysia ti betuaika Soh Chin Aun mujur masuk pekit Lumba enggau Main Olimpik udah ti ngalahka munsuh terit sida, iya nya Korea Selatan 2-1 ba main ti kepenudi dalam raban Asia. Gol ti dipasukka Bakri Ibni enggau James Wong nya udah chukup nudukka team Malaysia dalam sejarah cherita lumba enggau main menua.

Diatu udah genap 36 taun alai pekara nya udah nyadi lalu kemaya hari tu Korea Selatan nadai agi ngumbai Malaysia nya munsuh terit sida agi. Malaysia ukai agi setanding enggau team Korea Selatan ke kala masuk peringkat semi final berebutka Mangkuk Dunya 2002 nya. Sepemanjai 36 taun tu mega mayuh macham pekara ti pait manis ditapi team main bol menua kitai.

Pekara ti ngalitka ati mensia mayuh nya taja pan team main bol menua terus labuh penuduk ba rintai ranking dunya, main bol tetap main ti tebilang ba menua tu. Team ti pama baka Johor Darul Takzim (JDT) terus mantu ngangkatka populariti main tu. Bah baka ni mega nasit main bukai ti mayuh ngangkatka nama menua kitai ba tikas antarabansa tang lalu enda pegari nama. Ambika banding main skuas. Kumang skuas dunya, Datuk Nichol david udah lama ngangkatka nama Malaysia dalam main tu. Enda salah enti kitai mega ngangkatka iya tu pemain skuas indu ti pengabis pama sereta lati ba sejarah main tu. Tang sayau seribu kali sayau laban main tu lalu bedau dirintai dalam pekit lumba enggau main Olimpik. Uji peratika sema jaku enti main tu udah lama dipasukka dalam pekit Olimpik tentu Malaysia udah lama menang midul mas keterubah Olimpik.

Lumba nyemerai enggau akuatik mega ukai lumba ti popular ba menua kitai.  Tang lumba tu mega ngenjuk pemeri ti besai ngagai pemujur menua ba pekit lumba enggau main Olimpik. Dipelabaka tentu kitai agi ingat pemujur Pandalela Rinong ke menang midul engkeraju ba lumba terejun 10 meter platform Olimpik 2012 London. Pemujur tu mega siti ari sejarah lumba enggau main ti ngasuh kitai temegah.

Main badminton mega suah ngangkatka nama menua kitai. Pemujur Datuk Lee Chong Wei menang mayuh macham pekit ba tikas antarabansa ngujungka iya kala tulihka penuduk pemain lumur satu dunya. Tu mega siti ari pengulih ti ngasuh kitai temegah ati. Pemujur skuad badminton menua menang ba pekit berebutka Mangkuk Thomas di Kuala Lumpur dalam taun 1992 agi dikira entara pemujur ti pengabis manah kala dijapai dalam sejarah lumba enggau main menua kitai.

Maya nya suba, pemain Rashid Sidek pemain single menua nya entara pemain ti mai pemujur ngagai skuad badminton tu. Sepemanjai pekit berebutka Mangkuk Thomas, iya endang enda kala alah ngujungka iya kala digela jaguh kampung. Taja pan digela jaguh kampung, Rashid mujur mega menang midul engkeraju ba pekit lumba enggau main Olimpik 1996 di Atlanta.

Bedau lama ti udah, siku da agi jaguh kampung, Khairul Idham Pawi keterubah iya menang ba pekit Moto3, Grand Prix (GP) Argentina. Anak asal Perak tu ngasuh bala sida semenua ba Kampung Gajah balat bendar temegah ati. Nya ngayanka pelumba ari Malaysia ulih besemekih enggau pelumba ti pengabis manah di dunya. Siku da agi pelumba ba pekit ti sama iya nya, Adam Nordin enda benasit manah lebuh iya labuh ba alur ti bingkuk lebuh nuju ngagai adan. Taja pia, pengering semengat iya nembuka lumba nya enggau chara nulak motosikal iya datai di adan endang patut dipuji. Labuh ukai tanda alah, labuh nya tanda terus mansang ke mua.

Pemujur dua iku nembiak tu diarapka ulih ngerintiska jalai dalam pengawa ngemansangka lumba motosikal di Malaysia. Menua kitai ngembuan alur lumba betikas dunya. Nya alai udah chukup maya mega alai kitai ngembuan pelumba betikas dunya.

Pejalai Khairul Idham enggau Adam Nordin agi jauh tang utai ti patut dikingat nya pengering semengat enggai alah ke udah diayanka seduai. Nya patut nyadika perangsang ngagai semua atlet menua kitai ngambika terus berumpak enggau naka ulih ngelaban orang bukai dikena ngangkatka nama menua kitai ba tikas antarabansa. Sekali alah ukai reti nya lalu selama jeman kitai nya alah. Pekara ti ngasuh sida puntan nya patut nyadika chunto atlet ngulihka pemujur ti lati dudi hari.

Patut dikingatka mega, lumba enggau main nya medium alai rayat Malaysia ti enda ngira chura kulit terus betempikka jari sereta nyukung atlet enggau team menua. Kebuah pia, kitai ke rayat tu mih tentu bisi juluk ati deka meda Jalur Gemilang terus didegika sereta lagu Negaraku ditebah ke kelai pemujur menua kitai.