Nisih Pengulih Nembiak Bepikir

Panyun Jaku

Pentaksiran Tingkatan 3 tauka PT3 nyadi pelasar ngemansangka pelajar sekula ngambika iya dinamik agi sereta fleksibel dalam aspek nempa potensi nembiak. Reti nya, potensi nembiak patut diperetika nengah chara ti beserekan baka ti dikedekaka Falsafah Pelajar Bansa sereta ngenegapka pemereti ati dalam konteks nukuhka bansa baka ti diterangka dalam undang-undang menua. PT3 nya siti ari polisi transformasyen perintah dalam pengawa nisih nembiak. Iya berengkah dipejalaika dalam taun 2014 dikena nganti Penilaian Menengah Rendah (PMR).

Batang Kenang

Bepelasarka rekod Opis Menteri Pelajar, penyampau nembiak ti ngambi PT3 dalam taun 2015 iya nya 465 674 iku orang. Ketegal penteba tisih ti bepusat ba sekula,dia pemutus tisih ti dikeluarka nya balat ngayanka pengulih ti befokus ngagai sekula. Reti nya lebuh digaga analisis, mayuh sekula semina ngemeratka pengulih sida ngangkatka penuduk Gred Purata Sekula. Ukur pengulih ti dibantaika sekula agi balat ngemeratka penyampau nembiak ti bulih gred A taja pan Tisih Bepusatka Sekula patut ngira tisih ke diperati ari sukut holistik. Aspek tisih dalam PT3 mungkur elemen psikometrik, pengelandik mensia(insaniah) enggau kokurikulum.

Pengawa nabur pemutus tisih PT3 balat ngayanka sekula ti ngembuan nembiak ke mayuh skor gred A. Sekula ti mayuh nembiak bulih A nya dikira sekula ti pengabis manah. Reti nya, raban opis pelajar baka JPN, PPD enggau sekula agi bepanggai ba penyuran ti ngemeratka penyampau A lebuh meratika pemansang pengulih nembiak dalam tisih PT3. Tu mega ngayankan mensia mayuh agi ngait diri sida enggau konteks nimbang pengulih nembiak bepelasarka pengulih akademik aja lalu agi ngemeratka pengawa bebandingka pengulih sekula dalam konteks pengulih sida ari sukut nasional taja pan iya ti patut nya pemutus tisih ti bepusat ba sekula. Pengawa ti ngayanka individu ke mujur ngumpul mayuh A ukai pengawa ti patut dikemeratka dalam trend pemansang pelajar kemaya hari tu. Tambah mega ketegal penteba PT3 ke balat agi beorientasyenka pengawa ngajar enggau belajar sereta pengawa ti bejalaika tisih nya bepusat ke sekula ngujungka chara meri mark enggau gred nya dikira mega ukai bepelasar ba graf tabur normal.

Pugu fokus dalam konteks PT3 patut diberi ngagai pengawa ke ngaga analisis penyadi nembiak sereta pengulih sida nengkebang daya pengulih bepikir ba tikas tinggi baka ti dipinta dalam PT3. Reti nya, langkar PT3 dikena ngangkatka minda nembiak dalam Taksonomi Bloom nitihka tikas aplikasyen, sintesis, analisis enggau nyerenih. PT3 nyadika stimulus pengawa ti nempa lima kategori minda jemah ila baka ti dichirika Gardner, iya nya minda disiplin, minda sintesis, minda nengkebang, minda adat basa enggau minda etika.

Besenutuk enggau guna tu, proses belajar patut bekonsep enggau chara ti integrated kelebih agi lebuh ngaulka guna akademik, guna sosial, guna teknologi, guna kaul global, guna pemansang menua enggau guna ekonomi. Pengawa ti bejalaika proses pelajar patut ngira enggau serius nimbang empat dimensyen ti nyemetak.Tu mungkur pemansang penemu enggau proses pelajar, kaul sosial enggau pengawa nyadi tuai, penemu senentang waris menua sereta pemansang ekonomi enggau industri. Keempat-empat aspek tu meri impak ti besai ngagai pemansang menua sereta ngagai potensi pemansang pengawa mensia.

Pekara ti nyadi fokus dalam konteks pelajar patut bisi kaul enggau realiti pelajar dikena ngemunka penemu senentang ukur peninggi penemu sereta ngangkat lalu ngenegapka pemandai ba tikas ti patut. Bidang pelajar patut ulih ngayanka nilai reti ba diri nembiak awakka nyadi mekanisma magar diri lebuh sida betapi enggau ubah rampa menua ti bisi belaban enggau tamadun sereta konflik ukur pemanah pendiau tauka nilai moral.

Bepekit dalam konteks ngangkatka pengulih akademik logik nya endang sesebengkah pekara ti rasional tang hal tu ukai nyadika dalih alai bisi sapat enggau seraka sosial. Sekula patut nyadi palan ke ulih alai neleba idea ti manah enggau sosial ke setimbang dikena nentuka sida ulih bekunsi potensi enggau tanggung pengawa. Kedua-dua aspek tu ulih negapka runding sosial dalam konteks nempa komuniti ti bepelasar ba integriti enggau akauntabiliti. Reti nya, proses belajar patut dipejalaika nuju pengawa ti deka ngerembaika realiti pemanah ati laban ari realiti iya dikemanahka agi ba mensia nya empu. Belajar ukai semina deka nempa mudal mensia aja tang mega negapka potensi  mensia ti nyampun semperna.

Ngadaka konteks pelajar ti bepelasarka bepikir ba tikas tinggi nya elemen fokus ti patut dikemeratka lebuh ngambuh sereta narak individu nembiak. Bah, nama utai ti dikumbai pengelandik bepikir ba tikas tinggi?  Tanya ba PT3 dikumbai befokus ba tanya bepikir ba tikas tinggi. Bah, nama kelai enggau standard ti ngayanka tanya nya tanya bepikir ba tikas tinggi?

Fokus pengelandik bepikir ti dikerembai maya proses belajar nya balat agi nguing ngagai konteks operasyen tauka chara pekara nya dipejalaika lalu ukai nuju ngagai pengawa ti ngemeran sereta ngangkatka isi pekara. Nya mih kebuah, nama-nama pekara ti besangkut-paut enggau pengawa bepikir ba tikas tinggi enda bejalai enggau optimum lebuh nukuh ulah sereta aktiviti proses bepikir nembiak. Kitai patut nemu maya proses bepikir, runding enggau peragam ngembuan kaul dinamik enggau tradisyen penemu. Reti nya, bepikir tikas tinggi patut diangkat, dikerembai sereta ditegapka belalauka paksi penemu.

Pengawa bepikir tikas tinggi ukai semina ngasuh orang nya bepikir ba luar kutak, iya nya pengawa ke digaga luar ari chara selama. Bepikir ba luar kutak enti enda dikelapung enggau pugu penemu ti tegap, sereta enda disempulangka enggau prinsip enggau teori penemu deka ngelimpangka nilai lalu ngujungka ulah enggau runding ti enda ngira ukur pemanah pendiau.

Nya alai dalam hal tu, nembiak ti diasilka nengah konteks belajar enda ulih befungsi nyadi aset ti ulih meri pengelantang sosial. Iya balat agi ngerusakka landskap atur sosial sereta ngerubuhka rega pemai ulah pendiau mensia enggau pemanah ati.

Pengelandik bepikir tikas tinggi kelebih agi dalam konteks pelajar patut mega meri perati ngagai penalam, pemesai, enggau penyauh jengkau runding.  Pekara tu ukai sebengkah pengawa ti betukuh nerima lalu nyerap nengah ajar pengajar tauka nengah peresa laban langkah rapat tu enda meri impak ngagai pengerembai potensi intelektual enggau budaya penemu sereta enda nyukung meransang tradisyen penemu. Kelimpah ari nya mega, iya semina nasalka budaya macha.

Bidang pelajar patut meri fokus ngagai pengawa nempa nilai pengidup mensia lalu ukai semina ngemeratka pengawa nempa ‘mensia ekonomi’ dikena ngisi sektor industri begagaka barang. Nya alai, pengawa ti ngemeratka konteks ngajar enggau belajar patut ngira pengawa narak nembiak nyadi orang ti kreatif enggau inovatif sereta analitikal kelebih senentang isu ti bisi bekaul enggau pengawa  ngenegapka pengelandik diri, pengawa ngemansangka budaya, pengawa nempa komuniti, penegap identiti diri sereta enggau kaul sosial.

Realiti transformasyen dalam bidang pelajar enggau chura pejalai bidang pelajar patut digaga dikena nentuka nembiak nya meretika kebuah guna bepikir. Realiti ubah tu mega patut bepelasar ba prinsip nilai moral sereta pengulih ti bisi kaul enggau fungsi penyadi mensia ti ngenegapka nilai pengidup ke bepelasar ba paksi pengarap.

Langkar pengawa bepikir dalam konteks tradisyen bepikir patut ditukuh bepelasar ba pengawa ti ulih ngambuh attitude, ulah enggau moral ti beteras ba minda kelas keterubah. Reti nya runding ti besakang ba elemen ti bepaksi ba prinsip deras sereta positif, empati, relevan, bedaya pekit, rurus, rentang sereta beintegriti, benilai tambah sereta nyelai lalu bisi ngembuan pemintar enggau penemu.

Proses belajar mesti ulih ngambuh nyepuh persepsyen enggau perspektif nembiak ti dinamik agi, analitis lalu befokus ngaga pengawa ngemansangka potensi diri. Nya alai, kelimpah ari meransang pengulih nguna enggau penuh potensi pemandai enggau beperegam nyadika elemen proses kereja mental, pengawa ti belajaika pengelandik bepikir tikas tinggi patut mega nukuh isi pengelandik bepikir ti nyemetak awakka pengawa bepikir ulih dikaitka enggau aspek penyadi mensia dalam konteks tanggung pengawa ngagai Petara ti nempa utai di dunya.

Pengawa ti ngenegapka pengelandik bepikir tikas tinggi ukai semina nukuh intelektual nembiak dikena sida napi situasyen ti kompleks maya proses ngaga pemutus penemu sereta ulih ngasilka generalisasyen ti konkrit. Tang ba awak ti sama, sida ulih ngelala diri ba taka ti pengabis tinggi maya ngenanka aspek kualiti diri empu ti nguing ke pengulih bepikir, merambu, ngatur sereta ngereja pengawa bepelasar ba jalai pengarap.

Pekara tu ulih nguing runding ti nuju ngagai pengawa meretika penemu sereta ngenegapka kualiti diri maya napi ubah ti dipenyadi ari dinamik sosial, ekonomi enggau politik lalu iya ngembuan pengetan empas ari gumbang teknologi pemadah.

Raup Penemu

Taja pan kitai enda nemu nyagam panyun dalam ulu, enda berani nyagam bungkung dalam kayu tang dipelabaka mayuh ari kitai besetuju PT3 nya pengawa nisih nembiak ti manah. Iya patut nyadi langkar dikena ngambuh nyepuh pengawa transformasyen enggau reformasyen ba bidang pelajar. Kelimpah ari nya, PT3 mega patut ngira pengawa ti deka ngurangka seraka pelajar lalu ukai semina ngemeratka aspek pengulih akademik aja tang mega dalam aspek ti bisi kaul enggau pemansang sosial nembiak sekula, perengka guna pelajar sereta enggau pengawa ti ngatur pejalai sekula.