Unit 12 Ayat Turu, Ayat Turu Berakit

12.1   Pun Jaku

Ayat turu nya ayat ti digaga ari berakitka dua tauka lebih ayat tunggal awakka nyadi siti ayat baru ti ngundan lebih ari siti klausa. Ayat turu bisi empat bengkah iya nya:

      (i)         Ayat turu berakit

      (ii)        Ayat turu selit

(iii)       Ayat turu champur

(iv)       Ayat turu pasif

  

12.2     Ayat Turu Berakit

Ayat turu berakit nya ayat ti dipenyadi ari berakitka dua tauka lebih ayat ngena jaku penyambung enggau, tauka, sereta, tang, taja pia, ukai semina etb.

Chunto:

1. Bala nembiak nya begagai sereta betundi.

2. Hari ujan lebat kemari tang sehari tu panas.

3. Ni bagi pilih nuan, baju gadung tauka biru?

4. Pemayuh jelu mansang kurang lalu sida dipelabaka deka punas.

5. Rumah nya panjai, taja pia orang nadai mayuh diau dia.

6. Aku makai tang iya semina ngirup.

Ayat turu berakit mega tau dipenyadi enda ngena jaku penyambung tang semina ditanda ngena tanda koma (,). Ayat ti disambung nya ngembuan tingkat ti sama lalu ulih bediri kediri.

Chunto:

7. Mujan nyenguk ari mua empelua, beratika gaya hari.

8. Orang ke bekuntau nya chukup sikar, merejuk ke kiba, merejuk  ke kanan sereta nerais manjung kekalau.

9. Iya bejalai ari setak, mangkung tawak, ngasuh orang di bilik nanggung pemakai ke ruai.    

   

12.2.1  Tukuh Ayat Turu Berakit

Grafik tu nerangka chara berakitka ayat tunggal awak ke nyadi ayat turu.

	Ayat 1
Ayat 2	Jaku Penyambung	Ayat 3

Ba grafik di atas, ayat turu(Ayat 1 ) dipenyadi ari berakitka Ayat 2 enggau Ayat 3 ngena jaku penyambung.

Ayat turu mega ulih dipenyadi ari berakitka dua tauka lebih ayat tunggal baka grafik di baruh tu:

			Ayat 1
Ayat 2	+	Ayat 3	+	Ayat 4	+	Ayat 5

Ba ayat di baruh tu, jaku penyambung tang nya dikena berakitka ayat Aku makai enggau ayat Iya semina ngirup, ti nyadi ayat turu Aku makai tang iya semina ngirup.

		Ayat 1-Ayat Turu
Ayat 2- Ayat Tunggal		Jaku Penyambung		Ayat 3- Ayat Tunggal
10. Aku makai.		tang		11. Iya semina ngirup.

Dalam proses nyambung ayat  tunggal dikena ngaga ayat turu, bisi dua iti pekara tau nyadi.

      (i)         Sekayu klausa ditan

(ii)        Leka jaku tauka rambai jaku sebaka ti ditingkil

Sekayu klausa ditan

Chunto:

12. (a) Nagi nyumai asi.

(b) Renggi ngerempah lauk.

     Jaku penyambung: lalu

(c) Nagi nyumai asi lalu Renggi ngerempah lauk.

13. (a) Anak mayau kami gemu.

(b) Anak uduk sida Maling kurus.

     Jaku penyambung: tang

(c) Anak mayau kami gemu tang anak  uduk sida Maling kurus.

14. (a) Kami enda nyadi nurun nyala.

(b) Sungai bah tunggal.

     Jaku penyambung: laban

(c) Kami enda nyadi nurun nyala laban sungai bah tunggal.

Leka jaku tauka rambai jaku sebaka ti ditingkil

Chunto:

      15. (a) Remi landik betenun.

            (b) Remi landik beranyam.

                 Jaku penyambung :enggau

             c) Remi landik betenun enggau beranyam.

16. (a)  Raben Inan enggai makai buah temedak.

(b)  Raben Inan enggai makai buah rian.

                    Jaku penyambung:  enggau

             (c)  Raben Inan enggai makai buah temedak enggau buah rian.

           

17. (a) Iba nesah gari.

(b) Iba nyembui gari.

           Jaku penyambung: lalu

(c) Iba nesah lalu nyembui gari.

Ayat tunggal ti disambung nyadi ayat turu antara klausa ba ayat nya ditanda ngena tanda koma (,) enggau siti jaku penyambung.

18.   (a)  Maya peremisi sekula Adam bisi nemuai ngusung aki iya di rumah panjai. 

       

        (b)  Maya peremisi sekula Adam bisi nemuai ngusung aya iya di rumah panjai.  

             

        (c)  Maya peremisi sekula Adam bisi nemuai ngusung kaban belayan iya di rumah panjai.  

              

        Penyambung: Tanda koma (,) enggau leka jaku enggau.

         (d) Maya peremisi sekula Adam bisi nemuai ngusung aki, aya, enggau bala  

              kaban belayan sida di rumah panjai.

12.2.2  Chara Nukuh Ayat Berakit

Ayat dirakit ngena jaku penyambung.   Bisi dua chara ngerakitka ayat.

Sambung nitihka rurun pekara ti nyadi.

Sambung ti meri reti belaban ngagai pekara ti nyadi.

Sambung nitihka rurun pekara ti nyadi

Chunto:

19.  Penemu iya mabu, tambah mega dikenataika ngena chara ti bebalut.

      

20.  Keterubah aku diasuh duduk, udah nya dibai berandau,

       kepenudi  aku dibai betemu enggau menijar kompeni.

21.  Aku tu orang miskin, kedua endang korang pengerai, lalu ketiga aku mayuh anak.

               

Sambung ti meri reti belaban ngagai pekara ti nyadi

Chunto:

22.   Apai iya rindu bekebun sayur tang anak iya enggai ngereja pengawa nya.

        

23.  Orang nya agi regas taja pan umur iya udah tuai.

24.   Rega kain nya kelalu mar amat pan gamal iya enda berapa manah.