Unit 12 Ayat Turu - Ayat Turu Selit

12.3  Ayat Turu Selit

Ayat turu selit  iya nya ayat turu ti dipenyadi ari siti batang ayat enggau siti tauka ayat mit ti diselitka ba batang ayat ke lalu nyadi sebagi ari batang ayat nya. Ayat turu selit bisi tiga bengkah.

(i)         ayat turu selit relatif

(ii)        ayat turu selit komplemen

(iii)       ayat turu selit penerang

12.3.1   Ayat Turu Selit Relatif

Ayat turu selit relatif nya ayat ti diselit ngena jaku penyambung relatif ti tauka ke. Iya  nyelepak  dua iti ayat. Lebuh ngaga ayat turu selit relatif, sekeda leka jaku tauka rambai jaku ti sebaka dalam ayat nya tau ditinggal awakka ayat nya manah didinga sereta nitihka jalai jaku Iban.

Chunto:

Ayat Turu Selit Relatif	Ayat Tunggal
25. Aku ngena motokar ti dibeli       apai.	26. Aku ngena motokar. 27. Kerita dibeli apai.
28. Perau ti digaga apai udah          dijual.	29. Perau digaga apai. 30. Perau udah dijual.
31. Rumah ke dibeli Pengajar Laja          nya rumah dua tingkat.	32. Rumah dibeli Pengajar Laja. 33. Rumah nya dua tingkat.
34. Van ti  ditepan bala       pengabang nya van sua.	35. Van ditepan bala pengabang. 36. Van nya van sua.

12.3.2   Ayat Turu Selit Komplemen

Ayat turu selit komplemen nya ayat ti dipenyadi ari ngena leka jaku penyambung komplemen pasal, senentang.

Chunto:

Ayat Turu Selit Komplemen	Ayat Tunggal
37. Aku nemu pasal nuan ti deka       nyambung pelajar ngagai        universiti.	38. Aku nemu. 39. Nuan deka nyambung pelajar       ngagai universiti.
40. Sida serumah baum pasal       menteri ti deka datai ke       rumah sida.	41. Sida serumah baum. 42. Menteri deka datai ke rumah       sida.
43. Bala nembiak ringga pasal       sida ti deka ngintu pengerami       Hari  Pengajar.	44.  Bala nembiak ringga. 45.  Sida deka ngintu pengerami        Hari  Pengajar.
46.  Kepala Menteri ngelalau         orang  mayuh senentang sida           ti patut  bekelimat ngena         belanja.	47.  Kepala Menteri ngelalau        orang  mayuh. 48.  Sida patut bekelimat ngena         belanja.

Kadang-kadang ayat ti ngundan jaku penyambung komplemen pasal ke nyadi objek ayat tau enda dikena lalu nadai ngubah reti ayat.

Chunto :

49. Iya enda pechaya pasal Amit terus nyambung pelajar iya.

      50. Iya enda pechaya  Amit terus nyambung pelajar iya.

51. Pasal nuan ke nemu besampi endang ditemu orang mayuh.

      52. Nuan ke nemu besampi endang ditemu orang mayuh.

12.3.2.1  Bansa ayat komplemen

Ayat komplemen bisi tiga bengkah:

(i)  Ayat komplemen rambai jaku nama.

(ii)  Ayat komplemen rambai jaku pengawa.

(iii)  Ayat komplemen rambai jaku adjektif.

(i)  Ayat komplemen rambai jaku nama

Ayat komplemen rambai jaku nama tu bisi dua bengkah:

(a)  Ayat komplemen rambai jaku nama subjek.

(b)  Ayat komplemen rambai jaku nama objek nemban.

(a)  Ayat komplemen rambai jaku nama subjek

Chunto:

53. Pasal langgur pemansang menua ti diadang deka ngangkatka

           penatai pemisi rayat endang pengawa ti manah.

54. Pasal bala kita ke deka minta projek nanam sawit nya sigi penemu

           ti manah sereta patut  disukung.

(b)  Ayat komplemen rambai jaku nama objek nemban

Chunto :

55.  Berita nya ngayanka pasal semua sekula deka disikap ngena

       kereban komputer.

56. Opis Pengangkut Jalai Darat udah madah ngagai orang mayuh

      pasal  chukai jalai ti enda nyadi ditikika.

  

(ii)  Ayat komplemen rambai jaku pengawa

Chunto:

      57.  Apai Jabing ngasaika pasal tanah iya enda patut dililung.

58.  Indai Dumang ngarapka pasal anak iya mujur dalam pengawa

       dagang.

59.  Sida besetuju pasal langgur ti deka nudukka kedai gerempung.

  

(iii)  Ayat komplemen rambai jaku adjektif

Chunto:

60.  Aku besai amat pengarap pasal nuan ke ulih nyadi tuai kitai ke lurus

       ati.

61.  Bala nembiak kolej pechaya udu pasal sida ti ulih pas magang

       dalam peresa.

62.  Sida rindu bendar ninga pasal program lumba enggau main ti baru

       ditaburka ari radio.

12.3.3   Ayat Turu Selit Penerang

Ayat turu selit penerang nya ngundan siti batang ayat enggau siti tauka lebih ayat mit ti nyukung penerang predikat. Ayat tu bisi dua tukuh iya nya

(i)         ngundan batang ayat enggau siti tauka lebih ayat mit ti nadai

                  reti kediri.

(ii)        bisi jaku penyambung dikena nuruka siti batang ayat enggau ayat mit.

Chunto:

63. Iya nyadi pengetua lebuh aku ngajar ba sekula sekondari nya

       suba.

64.  Basil ngantuk laban enda chukup tinduk malam tadi.

65.  Endun mandi lalu nesah gari sida sebilik.

66.  Aku deka ngeluai kopi tang nadai gula.

Penuduk ayat turu selit penerang tau ba pun ayat enti ayat nya ayat tunsang.

Chunto:

67. Lebuh aku ngajar di Baram suba iya ukai kepala sekula kami.

68. Laban ti kelalu pedis nembiak nya lalu nyabak.

69. Maya buah raya suba bala jelu gegemu magang.

12.3.3.1  Bansa ayat turu selit penerang

Ayat turu selit penerang meri penerang ke lebih ngagai batang ayat. Iya tau dibagi ngagai sembilan bengkah:

      (i)         Penerang kebuah

      (ii)        Penerang empas

      (iii)       Penerang pinta

      (iv)       Penerang maya

      (v)        Penerang besakal

      (vi)       Penerang pengarap

      (vii)      Penerang chara

(viii)     Penerang tuju

      (ix)       Penerang banding

(i)  Penerang kebuah

Penerang kebuah nya nerangka kebuah sesebengkah pekara ti nyadi tauka dikereja. Chunto jaku penerang kebuah nya baka laban,ketegal, enggau ti bukai.

Chunto:

70. Aku mesti  belajar bebendar laban deka napi peresa ujung taun tu.

71. Ketegal nadai tiket sida enda diasuh tama meda tukis.

72. Iya regas laban selalu besenam.

(ii)  Penerang empas

Penerang empas nya pekara ti nerangka empas tauka asil sesebengkah pengawa. Chunto jaku penerang empas nya baka sampai, nyentuk ke  enggau ti bukai.

Chunto :

73. Nembiak nya belajar bebendar sampai masuk universiti.

74. Tungguk bemunyi nadai berenti nyentuk ke bulan pegari.

(iii)  Penerang pinta

Penerang peminta nya penerang ti nerangka peminta ti mesti  diasi. Chunto jaku penerang peminta sema, enti enggau ti bukai.

Chunto:

75. Sema aku pas peresa STPM enggau manah, aku bepeluang masuk 

universiti.

76. Jalin ulih enggau bala pangan iya memarin enti apai iya ngasuh.

(iv)  Penerang maya

Penerang maya nya elemen ti nerangka maya sesebengkah pengawa tauka utai ti nyadi. Chunto jaku penerang nya baka sebedau, kenyau, suba, ila, kala, seraya, kedung enggau ti bukai.

Chunto:

77. Miti bulih pemutus peresa ti manah sebedau iya nampung pelajar ke

menua tasik.

78. Kenyau ari mit iya endang bisi ngembuan pengerindu ke main asal

      enggau adat Iban.

79. Sebedau aku besekula suba aku endang udah diajar sida apai pasal

      ngintu  pendiau diri.

80. Enti aku udah bulih degree ila nya baru aku ulih dipaduka nyadi

pengajar profesional.

81. Kami meringga mulung seraya ke nganti padi mansau.

82. Kedung ke  rega motokar nya murah kitai nadai kebuah enda meli ia.

(v)  Penerang besakal

Penerang besakal nya elemen ti nerangka sesebengkah pengawa tauka utai ti besakal. Chunto jaku penerang besakal nya baka taja pan, tang enggau ti bukai.

Chunto:

83. Taja pan tua lama udah enda betemu aku tetap meruan nganti.

84. Aku enda nyadi nurun ngalu ke pasar taja pan apai aku mejal.

85.  Anggat sigi bisi ati deka raun ke Kedah tang enda nyadi laban

       belanja enda chukup.

(vi)  Penerang pengadang

Penerang pengadang nya elemen ke nerangka sesebengkah pengawa tauka utai ti dijuluk ati. Chunto jaku penerang pengadang nya baka ngambika ,awakka enggau ti bukai.

Chunto:

                                                                                   

86.  Kitai patut ngembuan semengat bekerejasama ngereja 

 pengawa.ngambika tau  bulih pemujur.

      87.  Agensi perintah ngatur kimpin budi basa  ngambika  dikena ngubah

 runding enggau ulah  orang  mayuh.

88.  Menteri Pelajar Perintah Besai ngelancharka mata pelajar Sivik

       awakka ulih nanam pengerindu mensia mayuh nyaga reta rama.

89.  Kitai patut besambi-sambi awakka kitai ulih begulai sejalai.

(vii)  Penerang chara

Penerang chara nya elemen ti nerangka gaya, chara tauka jalai sesebengkah pengawa tauka utai tau nyadi. Chunto jaku penerang chara iya nya enggau, ngena.

Chunto:

90.  Sami nurun ke sekula ngena bas.

91.  Enggau ati ti gaga aku ngelaluka penatai kita.

(viii)  Penerang tuju

Penerang tuju nya elemen ti nerangka reti bagi pengawa tauka utai ti nyadi. Chunto jaku penerang tuju nya baka awakka, ngambika enggau ti bukai.

Chunto :

92.  Bala tuai perintah nusun Langgur Pemansang Malaysia ke

       Sembilan awakka tau ngangkatka penatai pemisi mensia mayuh.

93.  Menteri Penyerakup Bansa enggau Pemansang Rayat ditumbuh

       ngambika ulih nyerakupka kaul antara pupu raban bansa.

(ix)    Penerang banding

Penerang banding nya elemen ti mandingka utai nyau deka sebaka. Chunto jaku penerang banding nya baka baka, sempama, asai enggau ti bukai.

Chunto ayat:

94.  Tuai rumah meri pemutus runding pasal penyarut sida serumah

       baka idung entara mata, baka dilah entara nyawa.

95.  Raban komiti nya enda nerajuka pangan diri ngereja pengawa

       baka lelabu enda bulaka putan, baka tukul enda bulaka tempan.

96.  Rajesh pemadu pengingin ati  deka ngambi Bidah ke bini

       sempama  tungguk ti rindu ke bulan.

97.  Kaki aku disengat semada asai ke dituchul bara api.