GLOSARI – Tusun Kedua

Pun Jaku

Glosari tu ngundan penerang pasal mayuh macham leka jaku enggau rambai jaku ti dikena bekenangka atur nusun jaku tauka jalai jaku dalam jaku Iban nitihka konteks linguistik. Tuju ngaga glosari tu iya nya dikena nyemakaka (maintain consistency) jaku ti patut dikena lebuh bekenangka atur jalai jaku Iban. Dalam glosari tu, sekeda jaku ti berasal ari jaku English bisi dipasukka ditu ngambika konsep ti deka diterangka ditu tau mudah agi ditemu.

Sekeda ari leka jaku tauka rambai jaku ti dipasukka dalam glosari tu nadai dikena dalam bup sistem jalai jaku tu tang bisi dikena dalam dokumen bukai baka turai pelajar, kerembai turai pelajar enggau bup teks jaku Iban.

ayat (sentence)

unit sebut ti pemadu tinggi ba tingkat jalai jaku ngembuan reti menyana lebuh disebut ngena intonasi ti patut; dipun enggau diujungka ngena sengian, bisi ngundan subjek enggau predikat. Chunto: Bandan nyau ngalu ke pasar.

ayat turu selit (embedded sentence)

ayat ti dipenyadi  ari siti batang ayat enggau sekeda ayat mit ti diselitka ba batang ayat nya tadi.

ayat pasif (passive sentence)

ayat ti ngundan jaku pengawa pasif ti lebih ngemeratka objek asal nyadika batang elemen.

ayat penerang (declarative sentence)

ayat ti dikena nyebut gaya utai tauka nerangka pekara ti nyadi; ba ujung ayat penerang ditutup ngena tanda titik (.). Sinonim: ayat berita.

ayat perintah (imperative sentence)

ayat ti ditujuka ngagai orang kedua ngasuh iya ngereja sesebengkah pengawa.

ayat relatif (relative clause)

ayat ti diselitka ba ayat turu ngena jaku penyambung relatif ti. Chunto: Indu ti benung mendingka lagu ari radio nya menyadi aku.

ayat tekenyit (exclamatory sentence)

ayat ti dikena ngayanka asai ati diri maya kitai tekenyit, ngelanjur, irau, pedis, nyindir urang etb.

ayat tunsang (inverse sentence)

ayat tusun bekalih, predikat diengkah dulu ari subjek.

ayat tanya (interrogative sentence)

ayat dikena nanyaka sesebengkah pekara lalu ditutup ngena tanda tanya (?).

ayat tumbuh (derived sentence, transformed sentence)

ayat ti udah berubah laban udah ditusun baru ketegal proses nusun baru penuduk elemen ayat, ngerembaika ayat tauka ningkilka sekeda elemen ayat.

ayat tunggal (simple sentence)

ayat ti ngundan siti klausa meali-ali ke semina ngundan siti subjek enggau siti predikat.

ayat aktif (active sentence)

ayat ti ngundan jaku pengawa transitif, subjek nyadi  elemen ke diterangka.

ayat aktif intransitif (active intransitive sentence)

ayat ti ngundan jaku pengawa intransitif, jaku pengawa ti nadai ditangkan objek.

ayat aktif transitif (active transitive sentence)

ayat ti ngundan jaku pengawa transitif, jaku pengawa ti ditangkan objek terus.

ayat pelasar (basic sentence)

ayat ti nyadi pugu ayat  lalu tau nyadi penumbuh ayat bukai. Sinonim: ayat mudah.

ayat penerang tambah (adverbial sentence)

ayat penerang ti diselitka ba ayat turu lalu meri penerang ngagai predikat batang ayat. Chunto: Indu nya ketawa laban iya gaga.

ayat komplemen (complement sentence/complement clause)

ayat ti nyadi elemen penembu dalam tusun sesebengkah ayat turu, chunto: Pengajar nerangka pasal jalai nulis karang kelikuh ngagai nembiak.

ayat turu (compound sentence)

ayat ti digaga lebih ari siti ayat tunggal. Sinonim: Ayat Kompleks.

ayat turu champur (complex sentence)

ayat turu ti ngundan lebih ari siti bansa ayat, dipenyadi ari bejantilka ayat tunggal enggau ayat turu.

ayat turu berakit (conjoined sentence)

ayat turu rakit digaga ari dua tauka lebih  ayat tunggal ti dirakit nyadi siti ayat ngena jaku penyambung baka enggau enggau tang. Bantin bemain tang menyadi iya enda.

...betampung