TVET ngemasukka pengelandik ti beguna

Enti deka alah enda, enti enggai iya ke bisi pan dikumbai kitai nadai. Nya dikena aku ngepunka buah kenang aku sekali tu. Baka nya mega menua kitai Malaysia ulih nyadi sebuah menua ti ngembuan teknologi tinggi enti rayat iya bepengelandik sereta ngetanka kualiti daya idup ti beteraska minda komuniti kelas keterubah maya taun 2020 ila baka ti udah dirintaika dalam Tinjau Pemansang 2020. Malaysia ulih nyadi sebuah menua berindustri enti nembiak kemaya hari tu ngena peluang ari perambu pelajar menua ti udah dilangkar enggau silik ulih perintah.

Nengah Lumpar Perambu Malaysia Ke-10 (RMK-10), perintah udah meri perati ngagai pelajar teknikal enggau vokasional (TVET) dikena ngasilka nembiak ke ngembuan pengelandik dalam timpuh awak ari taun 2011 – 2015. Sepemanjai timpuh RMK-10, perintah deka ngemasukka pelajar pengelandik nengah chara holistik ungkup nembiak ke udah tembu sekula sekondari baruh, sekula sekondari atas, institut pelajar tinggi nyentuk ngagai sida ke bepeluang bekereja. Dalam awak nya, bisi sekeda ubah nyadi kelebih agi ti bisi kaul enggau pelajar teknik enggau vokasional. Sekeda ari ubah nya nyengkaum meri nama baru tauka rebranding semua sekula sekondari vokasional ti ditukar ngagai kolej vokasional.

Ubah nengah nama baru tu udah muka peluang besai ngagai bala nembiak teknikal ngulihka penguntung. Taja pan pelajar teknikal enggau vokasional di Malaysia udah berengkah dipejalaika kenyau ari taun 1980-an tang maya nya suba iya semina meri perati ngagai nembiak ti enda mujur dalam akademik ba tikas premier tauka arus perdana. Nembiak ke enda mujur akademik tu diberi peluang kedua nitihka pelajar ti beteraska TVET.

Taja pia, udah perintah meda pemesai guna TVET dalam proses nempa menua tu nyadi menua maju, dia aspek TVET tu diangkatka nengah pelajar ti betikas premier. Pelajar TVET nya menasan jalai ti beguna ba menua baka Malaysia dikena iya ngasilka modal mensia ti bepengelandik tinggi, bepenemu, berinovasyen lalu ulih besemekih enggau orang bukai ba peringkat global enggau menua serantau sereta semampai engkeman enggau guna kereja kemaya hari tu.

TVET meri perati ti berat ngagai pelajar ti bekonsepka belajar sepemanjai maya, iya nya pelajar ti meruan nadai ngira umur belajar. Nembiak ke baru ngangkatka diri bujang enti diberi peluang ngambi pelajar ti bisi kaul enggau TVET ulih nempa pengelandik ti engkeman enggau guna kereja kemaya hari tu. Pelajar ti bepelasarka TVET tu ukai semina ngadaka penyampau pengereja pengawa ti telatih tang ulih mantu bala nembiak nempa pengawa kediri empu belalauka pengelandik ti diulihka sida nya. Pekara tu deka ngurangka hal ti kelalu bepanggai ba pengawa makai gaji tauka gawa ba sektor perintah.

Ba Perambu Pemansang Pelajar Malaysia 2015-2025 (Pelajar Tinggi), perintah agi meri perati ti nyemetak ngagai pemansang pelajar TVET. Fokus ngagai TVET nya seriran enggau juluk ati perintah dalam Tinjau Pemansang 2020, iya nya nyadika Malaysia tu menua penengkebang teknologi lalu ukai semina nyadi menua pengguna teknologi. Penteba tu nyadika pelasar penempa menua maju ti genap, iya nya penyampau pengereja pengawa ti landik enggau jelan landik ti chukup ungkup semua leman kereja ti patut diisi.

Ba peringkat pelajar tinggi perintah, udah diungkup sereta disediaka empat buah universiti perintah ti bestatus universiti teknikal di Malaysia. Tu nyengkaum Universiti Teknikal Malaysia Melaka (UTEM), Universiti Malaysia Perlis (UniMaP), Universiti Malaysia Pahang (UMP) enggau Universiti Tun Hussien Onn (UTHM). Universiti perintah teknikal tu meri ruang ti nyemetak ngagai nembiak ke pas belajar ba bidang teknikal ba peringkat sekula sekondari nampung pelajar sida ngagai peringkat pelajar tinggi. Jalai tu meri peluang ngagai bala nembiak milih bidang teknikal enggau chara pelajar ti berurun. Kelimpah ari universiti perintah, universiti prebet mega bisi nyediaka pelajar teknikal baka ba Universiti Tenaga Nasional (UNITEN) enggau Universiti Petronas (UTP). Pusat belajar ti mayuh baka tu meri ruang enggau peluang ti chukup ngagai nembiak sekula sekondari nampung pelajar sida ngagai peringkat ti tinggi agi. Pekara tu seriran enggau juluk ati perintah ti bekaul enggau pemansang pelajar TVET.

Kualiti graduan TVET nya siti ari semilan inisiatif ti dikemeratka dalam perambu pemansang pelajar ti baru ti dipenyadika dalam taun 2015. Reti nya pengelandik vokasional nya ulih ngasuh raban graduan nya diperebutka raban industri enggau kompeni di Malaysia. Rasional ti meri fokus ngagai nembiak ti ngembuan pengelandik TVET iya nya polisi TVET nya empu ke meri perati ngagai pilih ti kedua ba pengulih diri dalam bidang pengereja pengawa ba peringkat global enggau lokal. Pilih kedua tu ulih meri ruang ngagai mayuh calon nembiak ti deka enggau masuk dalam pelajar TVET.

Pengelandik TVET ti dikuasa nembiak ulih ngasuh sida nyadi orang ti nemban diberi pengawa dalam bidang teknologi enggau industri setipak enggau pemansang sektor robotik sereta dunya teknikal. Sektor pengaga barang nya sektor ti mayuh nerima penguntung ari TVET tu. Bidang baka tu agi kurang tebilang ba raban nembiak. Taja pia, peluang bekereja ungkup sida tu sigi mayuh. Enti nunda patut bisi siti atur ti berurun diberi raban bekuasa ngagai mensia mayuh bekaul enggau nembiak ke udah pas TVET sereta pengawa ti engkeman.

Juluk ati perintah dalam pemansang industri pengaga barang sereta nyadi menua industri bebanding enggau menua ti bepelasarka pengawa bumai betupi deka puntan baka menasan jalai jelu enti mensia mayuh agi ngumbai pelajar ba bidang tu ungkup raban nembiak kelas kedua. Persepsyen mensia mayuh sentang pelajar TVET agi ba tikas negatif enti dibanding enggau bidang pelajar akademik ti konvensional. Ba raban nembiak rebak baru ke baru ngangkatka diri bujang, sida mega suah dibantai enggau pengelati bidang akademik arus premier ti bepelasarka peresa standard Malaysia.

Sekula vokasional suah dikaitka enggau palan alai nembiak sekula ke enda mujur dalam bidang akademik. Dikena mutarka penanggul tu, perintah, ambika banding ulih bejalaika kimpin nengah media massa arus premier dikena ngangkat sereta nerenak pengerindu ba rayat Malaysia sentang pemesai guna pelajar vokasional enggau teknikal. Bidang tu patut dipilih nyadi pekara ti keterubah ngagai menua ti bisi ati deka nyapai pemansang nyadi sebuah menua maju.

Kelimpah ari nya, pengajar mega ngembuan tanggung pengawa ngiring ngembing lalu ngayan ngagai nembiak pemesai guna bidang teknikal enggau vokasional laban iya ulih ngangkatka pengulih ekonomi ti regas agi ari selama. Dalam konteks nembiak ke baru ngangkatka diri, bidang TVET tu patut diguna enggau manah sereta patut dikira lebuh sida merambu pengawa jemah ila.

Bidang Pugu Asil Menua (NKRA) udah ngerintaika enam bidang ti nyadika pekara ti beguna amat ungkup rayat enggau menua Malaysia. Siti ari NKRA iya nya ngangkatka asil kualiti nembiak sekula. Utai ti bisi dipasuk dalam bidang tu iya TVET. Iya mega mai ubah tauka reformasyen dikena nyapai juluk ati menua. Singkang pengawa dikena ngangkatka pengelandik rayat Malaysia ngambika sida laku nyadika pugu pekara ti dikemeratka perintah. Nampung pelajar udah sekula sekondari enggau pelajar tinggi deka nyadika katalis ti ngubah guna kereja bepengelandik enggau jelan pengelandik ti bisi digunaka raban industri. Pekara ti diperatika tu ulih ngangkatka pemansang ekonomi ti tegap agi ngagai menua.

Hal tu mega nyadika pugu singkang transformasyen dalam sistem pelajar. Kelimpah ari TVET, sekeda langkah rapat bukai mega bisi diadar kena ngulihka juluk ati ke deka ngangkatka sistem pelajar menua kitai. Penyampau enrolmen nembiak prasekula, sekula ti beprestasi tinggi, program Penisih Literasi enggau Numerasi (LINUS) nya sekeda chunto langkah rapat ti dikena ngangkatka prestasi nembiak.

Kelimpah ari nya, raban pengajar dalam bidang TVET mega diberi peransang ngambika sida ransing agi ngajar bala nembiak. Tu nyengkaum meri peluang ngagai sida nampung pelajar sida ba bidang penemu enggau pengelandik. Nambahka nya mega sida diberi peluang niki pangkat nitihka pengelandik enggau penemu ti dikembuan sida. Ngakunka setipikit pengelandik sida ti diberi sekeda gerempung mega nyadika tiket dikena sida ngulih tempat ba institut pengelandik tauka pelajar ti tinggi agi.

Kelimpah ari nya, perintah mega udah ngatur baru sistem, ngemanahka agi sereta ngakun terima bidang ti bisi kaul enggau TVET. Pekara tu dikira siti ari langkah proaktif. Pengawa ti beberika insentif ngagai penengkebang baru mega ulih ngasilka pansik tauka pengawa nengkebang ti kreatif enggau inovatif agi. Ubah tu ukai semina ulih narit ati raban pengajar TVET tang iya mega meri penemu baru ngagai bala nembiak ke benung begigaka kereja. Jemah ila nyangka mayuh agi bala nembiak negmbuan pengerindu deka nyadi pengajar TVET enti sida ulih meda peluang ti manah ba pengawa nya.

Dalam konteks ngangkatka bidang pelajar TVET, perintah mega nyediaka ungkup duit agih bepelasarka prestasi institut ti bisi nyediaka program nya dikena meransang sida besemekih enggau institut bukai ba pengawa ngasilka pansik enggau nyediaka mensia ti bepengelandik. Bantu duit belanja deka mega diberi ngagai raban nembiak ba peringkat Sijil Kemahiran Malaysia (SKM) tikas tiga ke atas ba institut ti dipegai kuasa perintah. Peransang tu diberi dikena nentuka nembiak ti kurang mujur nya mega diberi peluang laban raban sida tu mega raban ti mayuh sereta bisi potensi enti sida diberi latih enggau pengelandik.

Nengah Sistem Latih Dual Nasional (SLDN), kerejasama industri nyediaka latih pengelandik ba tempat gawa mega mantu ngangkatka asil pengereja pengawa ti landik. Agih belanja RM150 juta bisi disediaka baruh SLDN dikena meri peluang ngagai bala nembiak ti enda mujur dalam pelajar akademik.

Nengah program latih praktikal dalam industri, nembiak diberi peluang nyikap sereta ngirai diri empu sebedau sida diterima gawa. Kaul pengawa sektor prebet ba pekara ti nyediaka tempat alai belatih nengah konsep bekunsi enggau sektor perintah mega deka diangkatka. Kelimpah ari nya, kus ti bisi kaul enggau pengawa di luar deka ditambah ngambika ngemudahka transisyen nembiak dalam makit pengawa. Latih bepelasar ba industri diberi ngagai nembiak pelajar tinggi dikena nambahka penemu, peneleba enggau pengelandik entrepreneur ngambika sida ulih bejalaika projek enggau mudah.

Utai ti berubah jemah ila ba menua Malaysia ke bendar udah berengkah enggau pengelati ba bidang pelajar. Reformasyen sistem pelajar TVET ti nyemetak agi udah ditambah manah agi enggau guna kemaya hari tu enggau dudi hari. Perambu tu deka ngasilka modal mensia tauka katan mensia kelas kesatu. Reti nya sida deka ngembuan pengelandik lalu balat agi laku sereta ulih ngemeran pengidup ti harmoni iya nya pengidup ti setimbang entara teknologi enggau kaul entara mensia enggau rampa menua. Kurikulum TVET ti diaduka baru kelimpah ari nerima peminta makit kereja mega agi bepelasar ba Filosofi Pelajar Bansa. Polisi tu ti dipejalaika deka ngamatka juluk ati menua lalu mai penguji ngagai serak kemaya hari tu enggau jemah ila awakka ulih nempa menua Malaysia ti dipebasaka menua bukai.

Diatu semua utai nya bepanggai bendar ba nembiak nya empu nentuka kuing tuju sida jemah ila. Peluang udah disediaka enggau chukup silik sereta berurun. Ngagai raban perintah, penemu sentang pemesai guna pelajar ti bepelasarka TVET tu endang nemban amat nitihka singkang pemansang kemaya hari tu.

Nya alai, nembiak redak kemaya hari tu endang patut ngambi peluang tu sereta ngena pengelandik ti udah disediaka TVET dikena ngulihka penatai pemisi enggau chukup pengarap nengah batang pengawa sida. Hal tu engkeman amat enggau guna pengidup rayat ti nguan sebuah menua maju ti beteknologi tinggi.