Gerempung Bansa Dayak
Sarawak (SDNU) pampang nembiak begempung enggau konsultan pemansik sereta enggau
media bisi udah merambu deka ngatur forum dikena ngangkatka jaku Iban.
Konsultan pemansik
Borneo Research Initiative on Native Studies (Brains) ti betuaika direktor opis
nya iya nya Assoc Prof. Dr Bromeley Philip enggau kaban media diarapka ngaga
publisiti sereta rekoding sentang pekara tu taja pan bedau diputuska naka
kediatu.
Presiden SDNU Tan Sri
William Mawan Ikom ti mega deka nyadi penyanding penemu ngagai komiti pengatur
forum nya madahka “Simposium Lumpung
Penemu Iban 2016” ti diperambu nya deka diatur ba minggu kepenudi bendar
dalam bulan November.
Komiti nya mega merambu
deka ngangauka Kepala Menteri Datuk Patinggi Tan Sri Adenan Satem nyadi patron
lalu muka sereta nutup simposium nya ila. Simposium nya deka diatur dua hari
berunggu ba sebuah hotel di Kuching. Bala
ti ditaga ngulu simposium tu ila iya nya bala pengajar subjek jaku Iban enggau
pematih pengajar, bala tuai-tuai tauka pengari ari ejensi perintah ke bekaul
enggau jaku Iban lalu bala pengelicha ti dikangauka mungkur sida ari Kolej
Pematih Pengajar, professor ba jaku enggau pemansik linguistik ari
Universiti enda ngira bansa enggau jalai pengarap.
Nitihka Mawan, Jaku Iban endang semak ba ati iya lalu jaku
Iban tu mih kereban ke nyadi identiti bansa Iban. Iya berasai temegah ati ke
Nembiak SDNU ti betuaika Churchill Drem enggau gerempung Brains ti betuaika Dr
Bromeley ketegal udah ngaga pemutus sereta deka bekerejasama nyediaka panggau
ti besai guna ungkup komuniti Dayak, kelebih agi komuniti Iban berandauka pemansang
jaku Iban.
Bromeley madahka
program ti nyangking simposium nya deka nyadi sebagi ari ‘roadshow’ ngagai
sekula di serata nengeri Sarawak dikena ngangkat subjek jaku Iban. Juluk
roadshow nya mega dikena ngelakuka Urup Iban (Urup Dunging) ba nembiak sekula
sekondari. Pemansang sistem Urup Iban mega dipelaba deka dikerandau maya
simposium nya ila.
Naka kediatu, jaku Iban
dikena bejuta iku rayat di serata nengeri Sarawak. Jaku nya siti ari raban
jaku ‘Ibanic Austronesian’ ke udah dikelala di serata Malaysia. Taja pan
jaku nya ke bendar jaku minoriti di Malaysia, tang iya dikena serap ba serata
Sarawak ukai semina ba bansa Iban aja tang mega bansa bukai. Endang sigi amat jaku
Iban bisi pengurang ba sukut jalai jaku, dictionari sereta kereban ngajar, enti
dibanding enggau Bahasa Malaysia. Kelimpah ari nya mega, semina mimit aja bup
ke ditulis ti tau nyadika lalau baka bup teks, litericha enggau bup akademik.
Ketegal nya Brains deka
bebendar sereta silik agi mansik jaku Iban tu ngambika iya nyadi pengari Iban
sebaka enggau British National Corpus (BNC). Pengawa nya mungkur ngerikod leka
jaku Iban ari semua utai tulis ke udah bisi teks jaku dalam Iban. Nitihka
langgur penemu, korpus tu ila deka dikelala enggau nama Iban National Corpus
(INC). Iya deka nyadi pelasar ke pengawa ngintu sereta ngangkatka baru jaku
Iban. Bromeley ngarapka INC nya ila ulih
nempa jaku Iban nyadi leka jaku akademik ke dinamik. – Diambi sereta dibali Utusan
Borneo
Tiada ulasan:
Catat Ulasan