Glosari Tusun Keempat

Pun Jaku

Glosari tu ngundan penerang pasal mayuh macham leka jaku enggau rambai jaku ti dikena bekenangka atur nusun jaku tauka jalai jaku dalam jaku Iban nitihka konteks linguistik. Tuju ngaga glosari tu iya nya dikena nyemakaka tauka ngetanka konsistensi (maintain consistency) jaku ti patut dikena lebuh bekenangka atur jalai jaku Iban. Dalam glosari tu, sekeda jaku ti berasal ari jaku English bisi dipasukka ditu ngambika konsep ti deka diterangka ditu tau mudah agi ditemu.

Sekeda ari leka jaku tauka rambai jaku ti dipasukka dalam glosari tu nadai dikena dalam bup sistem jalai jaku tu tang bisi dikena dalam dokumen bukai baka turai pelajar, kerembai turai pelajar enggau bup teks jaku Iban.

J

jalai jaku (grammar)

sebengkah bidang linguistik ti mansik jaku ngena chara saintifik lalu menatika chara ngaga leka jaku enggau chara pakan iya nyadi ayat.

jaku aglutinatif (agglutinative language)

bansa jaku ti digaga ngena chara bejantilka urup penambah ngagai urat jaku.

jaku isolatif (isolative language)

bansa jaku ti digaga ari seleka-seleka munyi jaku ti suah ngembuan lebih ari siti tone.

jaku standard (standard language)

variasyen jaku ti udah ditetapka sereta diterima nyadi jaku rasmi ke sesebengkah bansa.

jaku randau rama (colloquial language)

tukuh jaku ti dikena bejaku enggau pangan diri besehari-sehari dalam situasyen ti enda formal.

jaku bansa (national language)

jaku ti dipilih lalu ditetapka perintah nyadi ke batang jaku ti dikena bekomunikasyen dalam situasyen formal ba sesebengkah menua.

jaku asal (natural language)

jaku ti dikena kenyau ari aki ini kelia ba sesebengkah bansa.

jaku rasmi (official language)

jaku ti dikena bekomunikasyen maya bejalaika pengawa perintah ba sesebengkah menua.

jaku tumbuh (derivative)

tukuh jaku ti tumbuh ari urat jaku  lebuh iya udah nerima penambah, betandu, beturu.

jaku adjektif (adjective)

jaku ti nyadi pugu ba rambai jaku adjektif lalu ulih nyadi penerang jaku nama enggau jaku pengawa..

jaku adap (directional noun)

jaku nama ti nyebut tunga tauka endur utai. Chunto: atas, baruh, ulu, ili, utara, selatan.

jaku bantu (auxillary)

tukuh jaku ti nyadi penambah reti dalam rambai jaku pengawa, rambai jaku adjektif enggau rambai jaku penempat. Chunto: udah, deka, tau.

jaku bantu aspek (aspect verb)

jaku bantu ti nerangka maya pekara nyadi. Chunto: udah, bedau, benung, deka, kala.

jaku bantu gaya (modal verb)

tukuh jaku ti dikena nerangka gaya asai ati ti bekaul enggau pekara ti dikereja. Chunto: deka, tau, ulih.

jaku tiap (numeral)

        jaku ti nerangka penyampau utai. Chunto: satu, dua, tiga, etb

jaku betandu (reduplicative)

leka jaku ti dikena beulang-ulang dua kalibaik ke nya beulang penuh, beulang sebagi tauka puntang. Chunto: jaku betandu penuh - ngaru-ngaru, jengap-jengap;  jaku betandu sebagi – berimbai-rimbai, tinggi-setinggi; jaku betandu puntang – lelengau (ari lengau-lengau), bererumban (ari berumban-rumban), rerigang (ari rigang-rigang).

jaku ganti nama (pronoun)

tukuh jaku dikena nganti jaku nama. Chunto: aku, nuan, iya, tu, nya.

jaku ganti nama diri (personal pronoun)

tukuh jaku dikena nganti nama urang. Chunto: aku, nuan, kami, kita, sida, seduai.

jaku ganti nama tunjuk (demonstrative)

tukuh jaku ti nyadi penganti ke jaku nama pekara ti ditunjukka. Chunto: tu, nya, nyin.

jaku penyambung (conjunction)

jaku ti dikena nyambung dua bengkah tauka lebih  ayat, klausa enggau rambai jaku. Chunto: enggau, laban, tang, lalu, sambil, seraya, lebuh.

jaku penyambung berakit (coordinating conjunction)

bansa jaku penyambung ti dikena berakupka dua tauka lebih ari dua bengkah klausa ti sebaka pemesai guna. Chunto: enggau, sambil, tang.

jaku penyambung selit (subordinating conjunction)

jaku ti dikena berakupka batang klausa enggau klausa ti mit-mit. Chunto: ti, pasal, ngambika.

jaku pengawa (verb)

jaku ti dikena nyebut pekara ti dikereja; nyadi pugu ke rambai jaku pengawa.

jaku pengawa transitif (transitive verb)

jaku pengawa ti patut ditangkan rambai jaku nama ti nyadi objek ke penyambut iya. Chunto: macha bup, mendingka lagu, melah kayu api.

jaku pengawa intransitif (intransitive verb)

jaku pengawa ti ulih bediri kediri dalam rambai jaku pengawa. Chunto: Anak mit nya benung tinduk. Leka jaku tinduk tu dikumbai leka jaku pengawa intransitif ba ayat tu.

jaku betandu berima (rhythmic reduplication)

bansa jaku betandu ti disempulang ngena munyi ti senimbal. Chunto: belingkuk-liuk, rebah-rimpai

jaku betandu penuh (full reduplication)

bansa jaku betandu ti alai leka jaku disebut penuh dua kali. Chunto: kayo-kayo, kalat-kalat, regap-regap,rangap-rangap.

jaku betandu sebagi (partial reduplication)

bansa jaku betandu ti alai sebagi ari leka jaku aja ti disebut dua kali. Chunto: bejalai-jalai, tinggi-setinggi,bepusin-pusin.

jaku betandu puntang (partial reduplication)

bansa jaku betandu ti disebut sebagi aja. Chunto: lelinga ari linga-linga, gegiu ari giu-giu.

jaku bekaling

bansa jaku ke suah disebut bekaling. Chunto: kaban belayan, gerai nyamai, periuk genuk.

jaku pengenap tesa (numeral classifier)

tipak jaku nama ti nyadi penerang ke tukuh jaku nama ti disempulang iya. Chunto: buah ba dua buah perau.

jaku komplemen (complement)

jaku ti dikena berakupka ayat komplemen dalam ayat turu. Chunto: Pengajar nya madahka pasal pemutus peresa SPM sida iya manah amat taun tu. Leka jaku pasal ba ayat tu, nya ke dikumbai jaku komplemen.

jaku turu (compound word)

leka jaku ti dituru ngena chara betangkanka leka jaku pelasar awakka meri reti ti baru. Chunto: terima kasih, perau pelumba, jam dinding.

jaku sangkal (negative)

leka jaku ti dikena nyangkal.  Chunto:  nadai,  ukai, enggai, enda.

jaku nama (noun)

leka jaku ti nyadi pugu ke rambai jaku nama.

jaku nama abstrak (abstract noun)

leka jaku nama ti dikena nyebut pekara ti nyadi sereta enda ulih dipeda segenda tauka dipegai tang ulih diasaika ati. Chunto:pengingat,demokrasi,pengerindu,pengasih, pengandal,mimpi,semengat.

jaku nama rama (common noun)

leka jaku ti dikena nyebut nama sesebengkah konsep tauka utai rama. Chunto: burung, ikan, rumah, bubu.

jaku nama adap (directional noun)

leka jaku ti dikena nyebut adap tauka tunga. Sinonim: jaku adap / uing

jaku nama menyana (proper noun)

tukuh jaku ti dikena nyebut nama ti diberi ngagai mensia, tempat, jelu, pekakas lalu mesti  ditulis bepun ngena urup besai. Chunto: nama urang - Bantin, nama tempat - Sri Aman,  nama ukui - Sengkalan, nama perau pelumba - Geruda Lambung .

jaku nama konkrit (concrete noun)

leka jaku nama ti dikena nyebut utai ti ulih peda tauka ulih pegai. Chunto: perau, batu, duku, kapak.

jaku pemendar (confirmative)

jaku ti dikena madahka pengamat. Chunto: ya, au, tau.

jaku pemadah (BM - kata pemeri)

jaku ti dikena nganti nama utai ti dipadah. Chunto: Penulis bup ensera ‘Semaya Jawing’ iya nya Edward Juna.

jaku penekan (BM – kata penegas)*

leka jaku ti dikena ngamatka pekara ti dikejakuka. Chunto: Nya meh penemu ti manah. Penusah ti baka tu lah utai ti pemadu dikenangika aku.

jaku penerang pun ayat (sentential word)

leka jaku ti dikena ba mua ayat baka: nya alai, nyadi, baka. Chunto: Nya alai, sebedau ngemanjaika jaku aku, dulu aku meri selamat datai ngagai semua bala kita.

jaku penguat (intensifier)

leka jaku ti dikena nguatka jaku adjektif. Chunto: Amat landik iya ngajat.

jaku penyambung (conjunction)

tukuh jaku ti dikena berakupka dua tauka lebih ari dua iti ayat  awakka nyadi ayat turu.

jaku perintah (imperative word)

leka jaku ti dikena ngasuh urang ngereja sesebengkah pengawa, baka dikena madahka utai ti patut dikereja, jaku gerah, jaku tagang, jaku pengelalu, jaku peminta. Chunto: anang, lalu, minta, arapka, tulung, ulih.

jaku pun rambai jaku (kata prafrasa)

leka jaku tugas ti dikena ngepunka rambai jaku. Chunto: deka( jaku bantu gaya), benung(jaku bantu aspek), nadai (jaku sangkal), amat (jaku penguat)

jaku pun klausa (kata praklausa)

leka jaku tugas ti dikena ngepunka sesebengkah klausa. Chunto: jaku tekenyit - akai, apo, apu, as, is, cheh, endai; jaku tanya – nama, lapa, sapa, dini, berapa, kemaya; jaku sangkal – ukai, nadai.

jaku penempat (preposition)

leka jaku ti dikena ngenuluka jaku nama tauka rambai jaku nama. Chunto: di, ke, ari, ngagai, ngusung, nengah.

jaku suruh/asuh (imperative word)

leka jaku ti mai reti nyuruh tauka merintah urang ngereja sesebengkah pengawa. Chunto: alai, uji, minta, ulih. 

jaku tanya (interrogative word)

leka jaku ti dikena nanya. Chunto: lapa, sapa, berapa, nama, dini, kati.

jaku tekenyit (interjection)

tukuh jaku ti dikena madahka asai ati ti tekenyit, irau, rawan, pedis. Chunto: Apo, manah amat nasit nuan ulih nyambung pelajar ngagai universiti!

jaku tugas (function word)

raban jaku ti semina bisi reti enti dikena  enggau jaku nama, jaku pengawa enggau jaku adjektif dalam tusun rambai jaku, klausa tauka ayat. Sekeda ari raban jaku tugas nya, baka jaku penyambung ayat - enggau, tauka, tang, lalu, sambil, sereta, ti; jaku pengepun klausa -akai, berapa, kemaya, ya, nyadi; jaku pengepun rambai jaku - deka, benung, udah, ukai.

jaku tunggal (primary word)

tukuh jaku ti dipenyadi ari siti morfem meali-ali ti enda nerima sebarang penambah. Chunto: tu, nya, nyin, aku, nuan, besai.