Ngubah Sentimen Mensia Mayuh

Panyun Jaku

Lebuh Tisih Bepelasarka Sekula tauka Pentaksiran Berdasarkan Sekolah (PBS) dipejalaika ba tikas sekula primari berengkah ari taun 2011, mayuh bala ngarapka pekara nya ulih ngubah paradigma enggau sentimen mensia mayuh ngambika enda balat ngemeratka pengulih akademik nyadika pugu nyukat pengulih nembiak.

PBS mega dianggap platform ti pengabis manah dikena mantu nembiak sekula ngenegapka Pengelandik Bepikir Tikas Tinggi (PBTT) tauka Kemahiran Berfikir Aras Tinggi (KBAT). PBTT ti diperatika ulih nyaup raban tu mantaika mayuh macham pengulih napi pengelandik ti tinggi kelebih agi maya sida udah lepas ari pengawa besekula.

Batang Kenang

PBS tu dikiraka siti sistem tisih ke baru dikena ba sistem tisih menua Malaysia. Transisyen ari sistem tisih pelajar ti bepelasarka peresa ngagai gempung sistem peresa begulai enggau sistem tisih bepelasarka sekula nya dikira transformasyen positif ke udah dipejalaika Opis Menteri Pelajar Malaysia kemaya hari tu. Taja pia, konsep ti manah ari baruh inisiatif tu agi dipetalatka mensia mayuh nyentuk ngagai sehari tu. Ari sukut realiti, PBS tu patut bendar disukung mensia mayuh awakka terus mujur.

Dikena nyapai objektif tisih dia pejalai pengawa nisih tu patut beseriran nitihka objektif sesebengkah pengawa tisih sereta dipajalaika sepemanjai maya. Pengajar tauka sapa-sapa ti bejalaika pengawa nisih tu patut nemu konstruk PBS ke mungkur semua aspek tisih ngambika genap iku nembiak diajar nitihka pengulih lalu ditisih enggau naka pengerentang ari semua aspek. Pengawa tu nyerangkung kognitif (pengulih intelek enggau pelajar), afektif (ulah enggau pemanah pendiau) sereta psikomotor (seregah diri enggau pengelandik). Pekara ti diguna, pengelandik enggau pengulih nembiak ditisih nitihka standard ti udah ditetap enggau ditagaka.

Tu mih langgur enggau transformasyen ungkup awak ti panjai. Nya alai mayuh bengkah raban patut bendar diberi penerang senentang konsep enggau tuju PBS tu ngambika nadai agi pansut mayuh macham isu sereta jaku pejah ti mantahka sistem tu. PBS kemaya hari tu diperatika udah dipejalaika ba menasan ti nemban tang taja pia, iya agi patut dikemanahka agi ari mayuh aspek nyengkaum aspek penemu, chara iya dipejalaika, pengawa ngelila bala pengajar enggau nembiak sereta chara tisih tu diripot.

Pengawa bansa tu enti dipejalaika enggau berurun, belebas sereta teratur deka nyadika sektor pelajar menua dipeda ngembuan langkar ke besai agi nengah PBS ti dipejalaika ngena chara holistik bepelasarka gempung dua pengawa nisih, iya nya tisih formatif enggau tisif sumatif.

Taja pia pengawa ti mantaika penemu sentang konsep tisih formatif agi kurang bendar dipejalaika enti dibanding enggau tisih sumatif. Runding sereta penemu ti baka tu patut bendar diubah. Kebuah pia, dalam PBS, respons ti diulih ari proses nisih nya beguna amat nyadika malin dikena nambahka pemanah pelajar nembiak.

Dikena ngemujurka pengawa PBS, semua raban patut nemu enggau silik prosedur pejalai tisih formatif ke nyadika medium ngemanahka pengawa belajar enggau ngajar (P&P) dalam bilik kelas. Naka kediatu enti diperatika enggau ngelansa PBS agi dipejalaika nitih chara sistem tisih lama ke balat ngemeratka kuantiti pengelati nembiak ari ke meratika kualiti pelajar sida. Nembiak agi dipeda ari sukut pemayuh A tauka peninggi Band ulih sida sereta penyampau nembiak tulihka band ti tinggi. Bida tu semina dipeda ari sukut chara nisih pemansang pelajar nembiak dipejalaika nengah sistem Band nitihka Dokumen Standard Prestasi bebanding enggau sistem meri mark belalauka lumur sebedau tu.

Enti diperatika pejalai pengawa PBS di menua maju, dia sida din balat agi ngemeratka tisih dalam proses P&P. Simpul pengawa tauka pemutus ti diulih nya meri penerang ti silik sentang taka ajar ti semitan udah dipejalaika pengajar kelimpah ari penerang sentang tikas penalam penemu nembiak udah nyapai sesebengkah objektif pelajar. Penerang tu dikena pengajar nyeruri pengelemi P&P sida.

Dalam tisih formatif, pengawa ngajar, belajar enggau tisih endang bekaul rapit entara diri sama diri. Enti tisih formatif tu dipraktikka enggau betul sereta langkah rapat ti dikena nya nemban enggau objektif tisih, tentu nadai isu agi alai nembiak diberi kelas tambah bebayar di luar sekula. Besenutuk enggau nya mega, langkah rapat enggau pengawa ngaturka PBS patut seriran enggau milih pedagogi ti engkeman ungkup sesebengkah subjek. Enti ubah ngagai sistem tisih enda seriran enggau langkah rapat P&P, dia tisih tu dikiraka nadai reti laban PBS patut ngemeratka konsep tisih formatif iya nya tisih sepemanjai maya lalu dikelapung enggau tisih sumatif.

Ari sukut tisih formatif, pengajar patut diberi autonomi milih chara nisih nembiak nitihka ke patut. Tu nyengkaum chara nisih baka kuiz, drama, pekit nulis karang, forum enggau peresa pandak. Tisih mega patut dipejalaika ukai bepelasarka peresa penentu gred chara formal tang mungkur peresa enda formal. Tuju pengawa tu dikena mantu pengajar nyukat pengulih sesebengkah  objektif pelajar nembiak sereta meratika tikas ajar pengajar nya empu.

Genap kali peresa dipejalaika mesti bisi sapi penemu tauka respons ari pengajar ngagai nembiak sida. Tuju respons tu dikena ngemanahka pelajar nembiak. Respons pengajar ulih diberi ngena mayuh macham chara baka nengah chara sebut mulut ambika banding baka jaku lalau, betulis tauka nengah model. Enti ari sukut pemerati, dia portfolio dipeda engkeman nyadika siti chara ti semitan dikena nyimpan penerang pengulih nembiak nitihka objektif pelajar sida. Sistem tu udah lama dikena di New Zealand lalu dalam PBS mega pengajar enda ibuh nyimpan semua data dalam sistem tisih ti udah diungkup ke pengawa nya. Pengawa bepasukka genap data pengulih nembiak baka ti dikemeranka raban pengajar diatu balat ngeribatka sida pengajar. Enti chara ngelila nembiak begunaka pengajar ngemasukka tiap-tiap mark pengulih nembiak dalam pengkalan data, reti nya sistem tisih bepelasarka sekula mega nadai bida enggau sistem tisih ti bepelasarka peresa.

Simpul Kenang

Transformasyen ngagai sistem tisih PBS begunaka ubah ti ukai semina ari sukut prosedur nisih tang mega ubah ulah enggau minda mayuh bengkah raban bala mensia ambika banding ari segi penerima konsep tu, pemansang kreativiti dalam P&P sereta mayuh leman teknik tisih di sekula. Pugu pematak pengawa dalam sistem PBS iya nya ukai orang bukai tang bala pengajar, nembiak enggau apai indai. Nya mih kebuah raban pengajar sekula patut ngembuan ulah ti tebuka sereta mentas lebuh berandauka hal-hal bekaul enggau P&P enggau bala apai indai ngambika ulih meri pemansang ngagai pelajar nembiak sida.