KEMAYA HARI TU mayuh apai indai serebana madahka diri dipejal mayar rega tauka fee
tuisyen ti bangat kelalu mar. Enti ba Malaya abis murah pan nyau deka datai
ngagai RM200 bayar tuisyen ungkup beberapa buah mata pelajar teras. Nya alai,
lebuh bisi palan tuisyen ngeletakka caj fee ti fleksibel agi tentu palan nya
udu agi diperebutka bala mayuh.
Apai indai ke
ngembuan penatai pemisi ti chukup deka milih tutor prebet tauka ngaturka tuisyen
di rumah (Home Tuition). Kebuah pia laban anak sida kiraka enda ibuh nitih taga
belajar silibus ti tetap baka di sekula tauka palan tuisyen.
Tutor deka ngaturka
pelajar enggau ajar iya nitihka pematut nembiak nya. Latih ekstra sereta
betandu deka diberi ngagai nembiak ba topik ke alai sida nya lubah meretika
utai. Enti pengelemi pelajar nembiak nya mujur diputarka, dia nembiak nya ulih negapka
pengarap diri lalu mantu iya empu ngangkatka prestasi diri empu enggau jampat
agi.
Taja pia, utai ti
patut ditanyaka kitai nya; kebuah nembiak sekula patut diberi tuisyen. Nama kebuah
sida tu patut diberi tuisyen? Nama pelajar ti diajar pengajar di sekula ngelama
tu enda chukup dikena sida ngauk penemu sereta dikena sida napi peresa perintah
pia? Nama agi enti kitai meda kemaya hari tu sekula nyau udu amat berumpak enggau
pangan diri laban sistem pelajar kemaya hari tu balat ngemeratka pemutus
akademik ti manah.
Ujung-ujung hari tu
tadi kitai mega bisi tedingaka serebana bala nembiak ke udah lepas SPM ti enda
ulih tama ke IPT. Mayuh nembiak ke pandai di chunggai jari tiga, ti lati dalam
pemutus peresa sida ngasaika diri bisi penanggul laban tepagang enda ulih
nampung pelajar ke menua tasik ketegal ubah aba sistem pelajar. Senario tu
ngujungka fenomena penyampau nembiak lati ke kelalu mayuh baka beluh di tinting
kedang berebut masuk ke IPT enggau IPTS. Empas ari pekara tu lalu nyadi mih isu
nembiak ke mujur tang enda tentu pegari enda ulih enggau orang bukai nampung
pelajar ke tikas kolej tauka universiti.
Pekara ti baka tu balat
bendar ngenyinuka ati. Maya ti baka tu mih raban apai indai mikirka pematut
bala anak sida diberi tuisyen. Bala nembiak patut berumpak sereta besemekih
enggau pangan diri enti deka mujur dalam bidang pelajar. Sida ke agi kurang
sereta lubah dalam pelajar beguna amat ke awak tambah dikena sida belatih
belajar sereta ngulangka pelajar sida.
Enti diperatika baru
isu tu, dia kitai meda baka ti bisi utai ke timpang dalam hal tu. Enti majoriti
nembiak sekula kitai patut diberi kelas tuisyen dikena ngulihka pemutus peresa
ti manah dia reti nya sistem pelajar kitai nya ke nyau enda semitan. Enda pia
iya?
Tiada ulasan:
Catat Ulasan