Nama salah enti rega minyak niki?

Pemuka Kenang

Isu rega barang niki ukai isu baru. Iya udah nyadi isu selama ti udah kala nyadi kenyau ari suba. Taja pia lebuh rega minyak makai niki pun bulan tu tadi ketegal perintah narit pulai subsidi sereta rega minyak makai dijual nitihka market value  tauka rega makit ngujungka nyadi isu besai ngagai bala rayat di menua tu. Rayat baka ke semampai nanjak arus napi penusah rega barang ti majak niki.

Batang Kenang

Nama salah enti rega minyak niki? Nya mih isu ke deka dikenang sekali tu ngambika kitai sama-sama belematika pekara tu enggau lenak agi. Tuju mantaika penemu tu ukai nyukung rega barang tu niki tang nguji meratika isu tu ari sukut ti betiban enggau penemu kitai mayuh.

Enti ngelama tu rega sebutul minyak makai ke berat lima kilogram iya nya RM20 tang diatu udah niki 65 sen nyadi RM20.65. Bulan nyin kemari rega minyak makai chap ti sama semina berega RM13.50. Reti nya dalam awak sebulan rega nya niki RM7.15 tauka betambah 53 persin! Berengkah ari 1 November perintah udah narit pulai subsidi rega minyak makai ba menua tu. Semina minyak makai ke dijual dalam empelus berat sekilogram aja agi diberi subsidi lalu dijual enggau rega RM2.50.

Uji kitai meratika fakta sentang minyak makai di Malaysia. Kenyau ari taun 2010 nyentuk ngagai taun nyin kemari, perintah bisi meri subsidi RM6.3 bilion tauka pukul rata RM1.05 bilion ninting taun ngagai minyak makai di menua tu.

Taja pia lebih setengah ari minyak makai ti patut diguna rayat menua tu udah dijual belalai ke menua bukai ti berimbai pendiau enggau menua kitai baka menua Thailand, Filipina enggau Indonesia. Penyampau ungkus minyak makai ti dijual belalai ti bisi kaul enggau subsidi nya kira-kira RM540 juta setaun.

Reti nya, lebih RM500 juta duit rayat menua tu diberi pia aja ngagai rayat ba tiga buah menua tu. Indah, rayat Singapore pan enggai enda enggau ngeruh ai; enggau ngambi peluang bebelika minyak makai kitai di pasar raya sekayu Johore Bahru tiap-tiap hari. Kebuah pia laban barang tu nyau sama rega iya nya RM57.60 ungkup kuantiti ti sama (butul lima kilogram) di pasar raya NTUC Fairprice ba republik nya tang ba tempat kitai rega nya enda datai RM14. Di Thailand, minyak makai dijual enggau rega kira-kira RM5 sekilogram, lalu ba Filipina barang tu berega RM8 sekilogram.

Kenu ku orang, baka belayan padi lebat bebuah, tiap utai ke nyadi tentu bisi tuju enggau kebuah. Ba penemu aku, siti ari sukut positif ti bisi kaul enggau rega baru minyak makai tu iya nya iya ulih ngasuh mensia mayuh ngurangka pemakai ti begunaka mayuh minyak. Pemakai beguring endang enda manah ke pengerai laban iya ulih ngasuh sakit tungkul atau sereta pugu kebuah orang gemu. Sebaka mega  maya rega gula niki kitai ulih ngurangka pemakai begula baka ai irup, ruti enggau kuih ti manis ke tau ngasuh kemi manis. Nya alai, nganti pemakai beguring enggau iya ke direbus, dipanggang enggau ditunu tau ngasuh tubuh kitai bepengerai.

Rega minyak makai nyangka tau ngasuh rega tuchur pisang tauka ruti chanai niki, tang kitai ulih nganti pemakai ke dikerinduka rayat menua tu enggau menu bukai baka  pisang tauka empasa rebus, ruti nan tauka chapati ke tentu nya manah agi ari sukut pengerai laban nadai ngundan minyak.

Nambahka nya, nyangka iya manah agi enti rega barang pemakai ti niki tu ngasuh kitai landik agi ngatur belanja diri. Enti menya mayuh orang nyau deka genap hari gian ngirup teh tarik sereta makai ruti chanai, tang lebuh rega gula sereta minyak makai niki tau ngasuh kitai ngurangka penyuah kitai duduk ba kedai kupi tauka ba restoran mamak ke dikerinduka kitai nya. Aku ngasaika diri empu suba enti udah pulai gawa ari opis jam 4.30 lemai sigi singgah ba kedai mamak ngirup teh tarik sereta makai ruti chanai.

Penutup Kenang

Enti pengawa ngurangka diri ke kedai kupi sereta mentinka diri bepakaika pemakai beminyak enggau begula majak nyadi-senyadi dia rega minyak makai enggau gula ti niki ketegal perintah ke narit subsidi tau dikumbai mai penguntung besai ngagai menua kitai. Ukai semina rayat majak bepengerai, tang beratus-ratus juta ringgit duit subsidi ulih diapuh ari disadung enggau enda menuku ngagai ngagai orang bukai ba seberai aris menua kitai. Iya ke rugi nya tentu menua kitai lalu sida ke untung sereta kaya-raja nya semina sida ke bedagang chara belalai ti bepekat enggau pemborong besereta enggau sekeda penerit adat ti korup sereta enda rurus lebuh gawa ba aris menua munyi ku sempama jaku tuai; orang ke ngambuh, kitai ke abis arang.