Jaku
Jawa majak jarang dikena maya berandau besehari-sehari. Pekara tu balat bendar
ngirauka ati Gabenor Jawa Tengah, Ganjar Pranowo. Ganjar, maya ke bejaku ba
sebengkah pengerami madahka, iya berasai irau meda peturun etnik Jawa jemah ila
deka napi penanggul meretika jaku dialek
sida.
“Jaku
Jawa nyau majak enda dikena. Nyau majak
mimit-semimit orang ke bejaku jaku nya tiap-tiap hari kemaya hari tu,” ku iya
maya bejaku ba mua mayuh ba Kongres Ke-6 jaku Jawa di Yogyakarta.
Nitihka
iya, mayuh etnik Jawa diatu nya tusah bendar deka macha teks dalam jaku nya,
kelebih agi ke dikumbai kromo inggil, tikas pengabis tinggi jaku Jawa ketegal
sida enda teleba ngena jaku nya ninting hari.
Dikena mutarka pekara tu,
Ganjar ngansak semua program peritah maya Hari Empat ngena jaku Jawa enggau penuh.
Kelimpah ari nya, iya mega minta bala opis perintah ba Jawa Tengah ngena pekayan
tradisional Jawa maya tiap-tiap 15 haribulan.
Ku
iya, maya ke nemuai ngagai Suriname di Amerika Selatan bedau lama ti udah dia
iya balat tekenyit meda etnik jawa dia agi ngenanka adat asal peturun sida. “Lebuh
bejaku Jawa enggau sida, sida meretika utai ke disebut. Bisi mega nya
nyaut ngena kromo inggil,” pia ku Ganjar.
Kongres jaku Jawa nya aum
ti bejuraika jaku enggau budaya Jawa. Iya diatur genap taun nengah chara begintir-gintir
ba Jawa Tengah, Jawa Timur enggau Yogyakarta. - Agensi
Tiada ulasan:
Catat Ulasan