Finland diakun dunya dalam bidang pelajar

Pemuka Kenang

Nadai siku orang ulih nyakal penemu ti madahka pelajar nya beguna amat kelebih agi dalam pemansang sesebengkah menua. Sistem pelajar ti manah ngasilka rayat ti bepenemu sereta bepelajar lalu ngujungka sida malas pulai enggau chara ngemansangka menua sida. Uji peratika jaku Nelson Mandela tu.

          Education is the most powerful weapon which you can use to change the world. -Nelson Mandela

Pekara ti deka dikenangka sekali tu bisi kaul enggau pemujur sebuah menua ba Eropah iya nya menua Finland. Pemujur menua Finland tu balat bendar bepanggai ba sistem pelajar sida. Uji peratika chara Finland ngaturka sistem pelajar sida sampai mujur nyadi teladan menua bukai.

Batang Kenang

 

Sistem pelajar Finland udah lama nyadi sanding penemu komuniti dunya. Tu nyengkaum tikas kindergarten, sekula primari enggau pelajar tikas tinggi. Sepengelama 40 taun udah alai sida bejalaika reformasyen, Finland kemaya hari tu dikiraka entara menua ti ngembuan sistem pelajar ti pengabis manah di dunya. Nama kebuah pia?

Pengulih nya asil ari evolusyen pelajar ti dikemansangka sepemanjai maya ngujungka menua Eropah ti bukai nyadika Finland nya menua sanding penemu dalam pemansang pelajar. Menua tu nyadi teladan enggau chuan lebuh bejakuka pekara ti bekaul enggau pelajar. Raban akademik Finland, Dr Pasi Sahlberg madahka pugu sistem pelajar sida nya bepelasar ba mekanisma pengajar ti dianggap nyadi ejen pengubah modal mensia. 

Pansik ti pejalai nengah chara rama ba mayuh bengkah institut pelajar sida suah mantaika tanya ngagai nembiak munyi tu – sapa ke deka nyadi pengajar? Amat ngalitka ati lebuh lebih setengah ari sida nembiak tu madahka diri deka nyadi pengajar laban ba penemu sida kereja nyadi pengajar tu dikira profesional amat sereta narit ati sida. Tu ngayanka bala nembiak sida balat meri basa ngagai kereja nyadi pengajar. 

Belalauka statistik, 25 persin ari peranak Finland rindu ke kereja nyadi pengajar. Pengajar baka selama diungkupka awak empat jam sehari di dalam bilik kelas lalu ditangkan enggau dua jam seminggu ngereja pengawa nyadi ejen pemansang  profesional.

Ba Universiti Helsinki, 2,400 graduan masters udah nembuka pelajar sida dalam program nyadi pengajar. Program nya dipelanja perintah enggau penuh. Nitihka penemu ti dipansutka Dr Sahlberg madahka pengawa nempa sereta matih siku-siku pengajar nya pedis agi ari ngasilka siku doktor tauka luyar.

Di menua ti bisi lebih ari lima juta peranak menua, pelajar formal tu enda bangat dikemeratka sida kelebih agi ngagai nembiak mit sampai ke berumur tujuh taun lalu pia mega nembiak ke tuai agi semina diberi peresa enggau kereja rumah. Taja pia, iya enda mega nagang nembiak sida tulihka pemutus ti lati dalam akademik. Pekara tu ulih dipeda maya taun 2001 lebuh nembiak sida mujur bulih penuduk ti pengabis tinggi dalam bidang matematik, sains enggau macha ba peringkat antarabansa ngujungka pekara tu ngemegahka ati raban akademik enggau sida ke ngaga polisi. Dalam taun 2009, Finland sekali agi bulih penuduk ti keterubah dalam charta pengulih ti pengabis manah lalu ngalahka Amerika Syarikat ba tangga ke-15 ba bidang macha, 19 (matematik) enggau 27 (sains). Di Helsinki, opis Menteri Pelajar Finland bisi nerima 100 pengari perintah ari 40 ngagai 45 bengkah menua ari serata dunya kenyau ari taun 2005.

Sistem pelajar Finland enti diperati ari sukut polisi dikira agi sebaka enggau menua bukai tang komposisyen entara nembiak-pengajar nya ke ngasuh sida nyulut sereta mujur. Finland semina bisi 600,000 nembiak sekula ba serata menua sida enti dibanding enggau di bandar raya New York aja ke bisi lebih ari sejuta nembiak sekula. Tu mih ke ngasuh sida ulih meri fokus penuh ngagai nembiak sida munyi ku padah Mandal  Presiden American Institutes for Research, iya nya Mark S Schneider.

Penutup Kenang

Sistem pelajar ba dini-dini endur dikira kompleks amat tang pemansang sistem pelajar di Finland diperatika nyingkang enggau jampat amat sempama deras baka upas kesulai tandang taja pan dalam tiga dekad ti udah sistem sida balat enda berapa. Kenyau ari taun 1970, pengajar di Finland mesti ngembuan degree master. Gaji sida mega manah amat kiraka setanding enggau kereja profesional ti bukai. Taja pan menua Finland enda tentu jelai berita dalam pekara bukai tang peranak menua sida udah sedada sama seati baka sungai ke betemu nanga; baka kijang betemu siba; baka kain betemu puncha ngujungka sida mujur ngasilka sistem pelajar ti nyadi chuan sereta teladan menua bukai.