Pemuka Kenang
KALA tauka enda nuan ngusung tempat rama ti udah bisi
papan tanda nagang orang nginsap tang bisi mega nuan tepedaka orang ke enda
malu-malu nyau debus-debus asap nginsap dia? Kala nuan meda deriba ngelanggar
lampu trafik tauka neriba kerita ba arung ungkup orang maya bisi penusah tau
mega dikumbai emergency lane? Tebalanka
kitai meda orang muai uras sebarang endur nyengkaum bebuaika uras keluar ari
kerita sida?
Batang Kenang
Semua utai ke udah dirintai di atas nya sekeda ari chunto
pengawa ngelanggarka atur ti udah masai dikereja mensia mayuh sereta semampai
nyadi kemaya hari tu. Pekara baka tu ulih diperatika ba dini-dini endur ba
menua kitai Malaysia. Sida ke ngereja pekara nya ukai semina enda ngayanka diri
berasai salah tang sida tu baka orang ke
nadai empedu malu. Katika ngelanggar atur nya sebengkah pekara mudah tauka
amatka ulah nya tau ngasuh kitai gagit agi ngereja pengawa nya?
Ari sukut realiti, pengidup mensia endang penuh enggau aturan.
Di rumah panjai, di genturung pendiau, di sekula, di opis sereta di jalai raya
semua bisi atur kediri empu. Nya kebuah, ari nya iya nempa ulah mensia ti
bebida-bida napi atur ti udah disediaka nya tadi. Bisi nya angkun nitihka atur
sepemanjai maya. Orang ke baka tu suah agi dikelese mensia mayuh sereta dikumbai
"rurus bendul." Anggap ti baka tu ke bendar ukai anggap ti positif tang
lebih ngagai anggap ti betukuh ngelanyaika orang nya.
Bisi mega orang ke enda tentu ibuhka atur. Sida ke baka
tu nitih atur semina "maya bisi mood" tauka nitihka atur maya ti
patut aja. Ambika banding, enti bisi polis, baru sida begaut deka nitihka atur.
Enti nadai polis, semua atur deka dilanggarka sida.
Bisi mega kategori orang ke dikumbai aku "kering
keras" tauka hardcore ngagai
tiap-tiap aturan. Ba orang ti baka tu, aturan nya enda relevan tauka enda
engkeman nitihka prinsip pengidup iya. Nya kebuah, nama bisi aturan, sigi tetap
dilanggarka iya. Ba penemu individu ke bansa tu, ngelanggar aturan nya siti
pekara ti ngasuh iya temegah ati sereta tau ngasuh iya jelai nama tampak rita. Orang
ke baka patut sanggup sereta sengaja ngelanggar atur ngambika sida dipeda
berani ba mua mensia mayuh.
Enti diperatika dalam pengidup kitai mensia bisi dua
bengkah aturan iya nya aturan betulis lalu bisi mega aturan ti enda betulis. Aturan
betulis nya gentura atur ti udah dipesetujuka mensia mayuh lalu enti enda
dititih, bisi ukum deka diletakka ngagai orang ke ngelanggar atur nya. Chunto
aturan betulis nya adat tusun tunggu Iban, atur jalai raya, atur kereja ba opis,
undang-undang menua, ukum-ukum pengarap enggau ti bukai. Aturan enda betulis tu
lebih ngagai tukuh rama. Aturan bansa tu balat bekait enggau adat tradisyen tauka
budaya komuniti ba sesebengkah genturung pendiau dia. Nitihka aturan bansa tu,
enti bisi orang enda nitihka atur dia iya deka ditinggang ukum tang ukum tu lebih
ngagai tukuh ukum rama tauka sosial. Aturan enda betulis tu balat bekait enggau
hal-hal adat basa baka kaul mensia mayuh ambika banding baka kaul orang ke
berimbai pendiau, kaul entara melaki bini, kaul nembiak enggau pengajar tauka adat
basa maya makai, adat nuntut penemu enggau ti bukai. Enti bisi bala ba
sesebengkah genturung nya ngelanggar atur rama tu iya tau dipulauka sida bukai.
Nama mih tuju kitai bisi aturan? Tuju aturan nya bisi
bekaul enggau konsep maslahah ku jaku
Arab. Ari sukut rama, maslahah nya mai reti “ngiga pemanah lalu nulak penyai."
Ba penemu orang ke bepengarap Islam, iya nya mai reti ti
besai agi, iya "ngiga pengelebih sereta nulak pengerusak baka ti udah ditentuka
‘Iya Ti Pemadu Bekuasa’. Reti nya pemanah ti digiga enggau penyai ti deka
diseliahka nya enda tau enda seriran enggau iya ti udah ditentuka Tuhan. Konsep
maslahah meri perati berat ngagai mensia mayuh. Reti nya, fokus nya lebih
ngagai mensia mayuh lalu ukai ngagai individu.
Nya kebuah, nitih aturan nya mai penguntung sereta
nyeliahka diri ari pengerusak tauka penusah. Ambika banding, orang ti enda
nginsap deka meri penguntung tauka pemanah ngagai pengerai diri empu lalu ulih
nyeliahka diri ari penyai, iya nya penyakit. Iya ukai semina ngagai diri empu tang
mega pemanah pengerai orang bukai ke berimbai pendiau enggau kitai. Reti nya
pengerai mensia mayuh mega ulih dijaga sereta angin pan dijamin beresi enti
genap iku orang enda nginsap.
Tu ngayanka aturan nya ngembuan tuju ti manah. Nya kebuah,
mensia sepa jaga endang balat amat beridup bepelasarka aturan. Bup kudus mayuh
bengkah pengarap di dunya endang bisi ngembuan mayuh bengkah tukuh aturan (ukum)
ke enda tau enda dititihka mensia nitihka pengarap ti diamalka sida. Ambika banding
bisi bup kudus dalam sesebengkah pengarap ti nagang mensia mayuh ngirup arak, beleman
enggau orang ke ukai enggau jadi melaki bini, berutang enggau aturan ti bukai. Aturan
tauka ukum tu ditempa Petara tauka Allah Taala ukai sengapa kada, ukai pia aja
tang ngembuan tuju ti nyata. Tuju ti pemadu beguna nya dikena ngadar mensia
mayuh ngambika sida nyadi sesebengkah komuniti ti betamadun sereta semampai idup
dalam harmoni.
Suah amat kitai ninga orang besebutka jaku ti munyi tu – ‘aturan
ditengkebang ungkup dilanggar’. Rambai jaku ke madah ‘aturan ditengkebang
ungkup dilanggar’ nya rambai jaku ti enda nemban amat. Rambai jaku tu suah amat
disebut lalu kadang-kadang iya ditiu enggau naka temegah ati baka ke nadai asai
ati ti besalah. Tauka enda kitai ngumbai semua aturan ti udah ditempa Petara
tauka Allah Taala nya endang ungkup dilanggar mensia?
Semua aturan ti ditempa Petara tauka Allah Taala ketegal
Iya nemu kitai mensia udu begunaka aturan nya. Enti nadai aturan, pengidup mensia
sama mih sebaka enggau pengidup jelu. Kati deka tauka enda kitai ngemaruhka diri
sampai ngagai tikas nya? Tentu enggai. Nya kebuah, aturan endang enda tau enda
dipebasa sereta dititih lalu ukai ungkup dilanggar. Genap iku kitai ngembuan tanggung
pengawa ngagai aturan ti bisi disediaka nya. Bisi maya kitai enda ulih enda
ngereja pengawa ti lebih ari pekara ti patut. Dalam hal tu, kekadang bisi maya kitai
enda ulih enda ngenselanka diri sereta ngereja pengawa ke enda tentu
dikerinduka orang bukai ketegal deka ngenan pemanah diri tauka orang bukai.
Penutup Kenang
Sesebengkah aturan ti udah ditempa digaga mesti diperati
sereta diteritka sepemanjai maya. Nya kebuah, raban penerit adat patut bisi
ditumbuh dikena nentuka aturan nya dititih. Taja pia, pengawa raban penerit
adat ulih dikurangka enti mensia mayuh nya ngembuan pengering ati diri deka
nitihka aturan nya. Pengering diri tu mih ke bedau tentu tampak dipeda bisi
pegari dalam sesebengkah komuniti kitai di Malaysia ngujungka semua atur ti bisi nya dilanggar sida enggau nadai
empedu malu. Dalam hal tu, sekula, pelajar, latih diri, chuan teladan enggau
jaku lalau beguna amat dikena ngambuh pengering ati diri ngambika kitai nyadi
mensia ke bebasa sereta taluk nitih genap atur ti udah dirintaika dia.Nya kebuah raban bansa Iban bisi jaku dalam ti besuluka jaku munyi tu; 'Lebuh bejalai betungkatka adat, lebuh tinduk bepanggalka pengingat'.
Tiada ulasan:
Catat Ulasan