Pemuka Kenang
Dalam pengidup besehari-sehari kitai enda ulih enda suah
bendar ngena jaku tanya dikena ngepun sereta ngerapitka kaul entara pangan
diri. Taja pia, bisi maya jaku ke dibantaika kitai ngagai orang ke enggau kitai
berandau nya tau ngasuh ati sida ensiban tauka nyima. Uji peratika chunto
cherita di baruh tu.
Cherita keterubah :
Menyadi lelaki nanya menyadi indu iya lebuh ke nemuai ke
rumah menyadi indu iya seminggu sepengudah menyadi iya beranakka anak siku ti
manah memelan.
“Nama tepa ti diberi laki nuan udah nuan beranakka anak
iya?”
“Nadai.” Ku saut iya pandak.
“Ni patut baka nya, kati nuan enda dikemeratka iya kini?
Aku empu seruran meri tepa ngagai bini aku taja pan kekadang enggau nadai
kebuah.”
Lemai nya, lebuh laki iya pulai gawa mai tubuh ti lelak
dia iya tepedaka mua bini iya baka orang ke muras. Ketegal tanya menyadi iya
seduai melaki bini lalu betalat enggau pangan diri. Tu ngujungka seduai lalu
sarak.
Ari ni pun penatai penanggul ruang bilik seduai tu?
Tentu nya ari jaku menyadi lelaki indu nya tadi.
Cherita
kedua
:
Siku mentua indu nanya pengelantang rumah menantu iya.
“Nuan nadai ngasaika rumah tu nyau kelalu sempit diatu? Nama nuan enda meda
anak nuan udah mayuh?”
Rumah nya tadi ke berasai sedandang besai sereta lapang
nyau asai ke mit sepengudah ninga jaku mentua iya nya tadi. Pengelantang ngelama
tu ti dibaja enggau kasih sayau majak lenyau sepengudah sida sebilik kena kapit
utang ketegal nguji meli rumah ti besai agi sereta berutang luar ari pengulih
penatai pemisi sida sebilik.
Cherita
ketiga
:
Siku orang nanya pangan iya. “Berapa gaji nuan sebulan?”
Pangan iya nyaut, “dua ribu ringgit.”
“Semina dua ribu ringgit aja, pia? Mimit amat gaji beri
tauke nuan nya. Nama nya chukup dikena nuan beridup besehari-sehari?”
Kenyau ari nya tanya pangan iya tadi lalu enda tentu
rindu ke kereja iya empu. Iya lalu minta ngagai tauke iya gaji iya nya tadi
ditiki. Sayau amat tauke iya enda ulih nikika gaji iya ngujungka tauke nya
ngasuh iya badu gawa. Diatu iya nadai agi bekereja, duduk rerunguk aja di
rumah.
Cherita
keempat
:
Siku orang nanya ibu tuai orang. “Berapa kali bala anak
nuan nemuai ngagai nuan, ibu dalam kandang sebulan?”
Ibu tuai nya semina nyaut munyi tu, “Sebulan semina
sekali.”
Iya ke nanya lalu meri jaku sindir, “Pia neh. Balat ga
anak nuan ngaga nuan baka nya. Patut sida suah agi ngundang nuan, ibu. Nuan ga
udah tuai.”
Ati ibu nya tadi lalu berasai sinu. Enti ngelamata tu
iya enda tentu ibuhka anak iya ke jarang nemuai ngagai iya laban nemu bala sida
nya kiruh enggau mayuh macham pengawa. Tang udah jaku nya tadi, ati ibu nya
lalu berubah. Tu tau meri empas negatif ngagai pengerai ibu nya laban iya
berengkah sinu sereta tusah ati.
Penutup Kenang
Nama penguntung kitai enti kitai nanya utai ke baka di
atas nya tadi? Kitai patut semampai nyaga diri ari kiruh ke pengidup orang
bukai. Ngemitka dunya pengidup sida semina nempa asai ati ti enda patut ba sida
ke nerima jaku kitai nya.
Enti pekara baka tu majak dikereja kitai, nya mih ngujungka kitai nya nyadi ejen pengerusak aba
dunya tu. Enti bom bisi meletup, tau peresa mih diri empu. Nama nya kitai ke
ngenyadika api sumbu nya?
Tiada ulasan:
Catat Ulasan