LEBUH pemutus peresa UPSR pansut bedau lama ti udah,
dia mensia mayuh kelebih agi bala apai indai nyau ngerijat sereta meri jaku
pejah ketegal penyampau nembiak ke bulih semua A udah balat bendar kusut. Maya
pekara tu nyadi aku sigi enda enggau orang ngeruh ai meri tuduh penemu
senentang pekara tu laban aku nganti sereta neju pekara tu chelap tu.
Diatu udah chukup maya alai raban apai indai peranak Malaysia
ngubahka runding sida pasal A. Aku ngasaika diri ti udah gawa nyadi tukang
tarak sepengelama 20 taun berani madahka A ba raban nembiak ke bulih maya UPSR
nya nadai ulih mai sida kini-kini enti dikalihka ngagai realiti pengidup
besehari-sehari.
Lebuh bala nembiak ke bulih semua A tu nampung pelajar
sida ke sekula sekondari dia kitai ulih merati 99% ari sida tu enda ulih mindahka kualiti “A”
ngagai environmen tauka rampa endur ti baru. Maya ti ditanya, mayuh mega ari
nembiak tu besetuju madahka sida endang semampai disapi sereta dilatih tandu
raban pengajar sida ngujungka sida ulih nyaut tanya dalam UPSR. Sida endang
enda diajar bepikir ngena chara kritikal tauka kreatif. Enti diperatika ari
trend pemansang pelajar dia kitai meratika nembiak Malaysia udu amai deka ngena
jalai puntang ngulihka A ungkup semua subjek. Sida ngapalka semua pekara ti
udah dipelajar sida ba kelas tuisyen tauka diajar pengajar dikena sida nyaut
tanya peresa.
Nya mih kebuah, aku entara orang ke gaga ninga Opis
Menteri Pelajar nguji deka ngubahka trend tu. Aku mega arapka Opis Menteri tu
enda baka sempama alah bungkung laban genalu; reti nya ngarapka opis tu enda
mudah kena tekan raban apai indai ke ngasuh pulai ngagai sistem lama.
Pengajar kemaya hari tu enda ulih enda ngajar nembiak
sida enggau pengelandik ti engkeman ngambika sida ulih napi mayuh bengkah tanya
maya peresa perintah baka UPSR, SPM enggau STPM.
Turai pelajar enggau ngajar kitai kemaya hari tu
endang ngemeratka Pengelandik Bepikir Tikas Tinggi (PBTT). Taja pia, agi mayuh
raban pengajar ngumbai PBTT nya semina meri fokus ngagai bansa tanya aja.
Pengajar patut nemu PBTT nya ulih dikena ba mayuh bengkah situasyen, ambika
banding baka ba format peresa, bansa tanya, struktur enggau tukuh tanya sereta
iya ti bukai. Chara ti patut nya matih nembiak jalai sida napi tanya ba mayuh
bengkah situasyen. Nembiak mesti belajar kuasa tat sereta macha adar sereta
tanya ti diberi nya enggau silik. Tu pengelandik ti beguna amat maya belajar
sepemanjai maya tauka life-long learning. Pengelandik tu mega beguna dalam
pengidup sida jemah ila lalu maya sida udah bekereja.
Nya kebuah, pengawa matih tandu bala nembiak enggau
tanya peresa udah enda engkeman agi dikena nyadika teknik ngasuh nembiak bulih
A. Udah datai maya alai raban pengajar ba semua tikas ngajar nembiak sida
bepikir nengah chara ti kritikal sereta kreatif.
Tiada ulasan:
Catat Ulasan