Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Selasa, 20 Disember 2016

Jaku enggau Litericha di Malaysia



Malaysia:-Menua Mayuh Bansa Jaku

Nitihka pansik (Language and Literature: 2004) menua Malaysia ngembuan kira-kira 80  bengkah bansa jaku. Nya ngujungka iya nyadi sebuah menua ke ngembuan komuniti ke mayuh bansa jaku di dunya. Ari jaku ti mayuh tu, bisi empat bengkah jaku ti pemadu mayuh dikena orang besehari-sehari. Lanskap lingustik tu nyegang bias ari penatai mayuh bengkah pupu raban bansa ari menua bukai dalam timpuh ti panjai sereta udah direkod dalam sejarah menua Malaysia.

Nitihka pansik mega, raban akademik bela besetuju madahka pun penatai jaku di Malaysia nya berengkah ari penatai raban Austroasiatik lalu ditangkanka penatai raban Austronesia ke Malaysia beribu-ribu taun ti udah. Ari nya tadi jaku Melayu ti berasal ari jaku Austronesia nya lalu nyadi jaku ti dominan dikena di menua tu nyentuk ke sehari tu. Jaku Melayu tu enti diperatika enggau silik, mungkur jaku ari Indonesia lalu iya mega nyadi entara jaku ti pengabis mayuh diguna di dunya. Jaku tu dikena orang ba kaul diplomasi internasional beribu-ribu taun ti udah. Jaku Melayu tu mega jaku ti udah balat bendar nyulut kelebih agi ba aspek literari lalu iya mega jaku ti mudah dipelajar sereta diperetika semua orang nyengkaum raban orang imigran. Nya kebuah jaku tu dipilih nyadi jaku dikena bekomunikasyen entara pupu raban bansa maya nya menya.

Mayuh jaku etnik ba pulau Borneo mega asal iya ari jaku Austronesia kelebih agi sida ke diau mendam ba Sarawak enggau Sabah. Pemisit pemayuh guna jaku tu ba kedua-dua nengeri nya ngayanka pengerapit kaul aris antarabansa enti iya ditimpai ari sukut sejarah. Nambahka nya bisi mega raban jaku ti mimit agi ari tu lalu iya dikira sebagi ari raban ke besai agi ke bisi ditemu ba Kalimantan (Indonesia, Borneo) tauka Filipin.

Sekeda ari jaku Austroasiatik dikumbai mega enggau jaku Asli tauka jaku Asal. Jaku tu udah lama mendam dikena ba Peninsula Malaya lalu mengkang bisi dikena bejaku raban bansa Orang Asli kemaya hari tu. Jaku Asli tu bisi kaul rapit enggau jaku bansa Cambodia enggau Vietnam.

Tiga bengkah bansa jaku ti nyengkaum jaku Melayu berengkah regas dikena maya abad ke 19 ngagai abad ke 20 lebuh penatai bebala mayuh raban imigran China enggau pengereja pengawa ari India. Pekara tu balat nyadi maya dipegai perintah koloni British. Mayuh bengkah dialek China bisi ditemu ngelekar nengah chara ti kompleks amat ba serata menua Malaysia. Jaku Tamil nya jaku majoriti raban bansa India di Malaysia. Taja pia bisi mega jaku India ke bukai baka jaku Telegu enggau Malayalam tang raban sida tu enda tentu mayuh enti dibanding enggau jaku Tamil. Jaku Indo-European nyengkaum jaku English, Portugese, Belanda, Sanskrit enggau Punjabi. Ari semua jaku Indo-European tu tadi Jaku English mengkang nyadi jaku ti beguna sepengudah Malaysia merdeka.


Adar enggau Atur Milih Lingusitik

Dalam senario linguistik baka di Malaysia, pengawa ke deka nijir sereta ngadarka jaku tu nitihka raban jaku enggau varians jaku mengkang nyadi siti ari penanggul ti besai. Kebuah pia, laban semua jaku ke bisi di Malaysia semampai berubah sepemanjai maya bias ari kaul entara mayuh entara pupu raban bansa. Tu endang amat nyadi di Malaysia ke alai mayuh bengkah komuniti ngena mayuh bengkah jaku ti ngasilka sinergi linguistik enggau litericha lalu iya mai empas ngagai pemansang sesebengkah bansa jaku bukai baka jaku kreol. Mayuh peranak menua Malaysia ulih bejaku ngena mayuh bengkah bansa jaku. Sida mega ulih nyampur bansa jaku sida  sebarang maya sereta ba sebarang situasyen nitihka gaya lebuh berandau tauka nampil randau orang bukai.

Bisi mega bansa jaku ti enda tentu diperatika raban linguistik, ambika banding baka jaku Siam tauka jaku Thai laban raban bansa Thai ke nyadi peranak menua Malaysia tu mimit amat. Taja pia jaku Arab enggau jaku Sanskrit bisi diperatika sida laban kedua-dua bengkah jaku tu regas amat dikena kelebih agi ba bidang pengarap.

Ari Litericha Tradisional ngagai Litericha Kontemporari

Malaysia mega bisi sejarah asal litericha iya empu ti bepun ari aktiviti sanggah dilah sereta dikena mayuh raban bansa etnik. Proses ngenataika jerita dipejalaika nengah peturun sereta dititi temali ari aki ini nyentuk ke uchu ambu. Pengawa tu agi bisi dikerejaka sida nyentuk ngagai sehari tu. Lebuh penatai pengawa nemu nulis dia jerita asal mupuk direkod ke dalam tukuh surat. Tu mega nyadi ba raban bansa etnik orang Asli, Sabah enggau Sarawak.

Asal sistem tulis tauka surat jaku Melayu dulu agi ari raban bansa etnik ke bukai tang iya semina dipeda regas agi mansang lebuh penatai pengarap Islam, iya nya kira-kira maya abad ke 13 ngagai 15. Pemansang tu nyadi lebuh sida ngambu sistem tulis jaku Arab ke diubah sida sereta dikumbai sida tulis Jawi. Enggau nya sida lalu ulih ngerikodka mayuh jerita asal Melayu ke dikumbai sida Hikayat.

Dalam abad ke 20, skrip ti ditulis ngena sistem tuliss Rumi balat agi dikena ari tulis Jawi. Enggau pemansang tu lalu ada mih litericha Melayu Moden. Novel, jerpan enggau leka main tukuh baru ti diambi-bali ari litericha English berengkah diambu nyadi sebengkah ari litericha dalam komuniti Melayu sereta ditulis dalam jaku Melayu. Pekara tu berengkah diajar maya jeman koloni. Berindik ari nya mega iya lalu berubah mansang nitihka tukuh lokal sereta ngujungka litericha tu ditulis bepelasarka gaya enggau perspektif Malaysia empu. Evolusyen litericha ti baka tu mega nyadi ba Litericha Malaysia jaku bansa bukai baka jaku China enggau jaku Tamil. Litericha China enggau Tamil menua tu berengkah enggau jerita ti diambi ari menua asal ti bepelasarka stail enggau konten ari menua asal tang iya majak berubah ngagai isu domestik sepengudah merdeka. Ba sukut Litericha English, pemansang litericha tu bepun ari penulis orang putih empu. Cherita enggau drama Melayu ti ditulis dalam jaku English nitihka format moden tang pekara tu semina berengkah sepengudah merdeka.


Polisi Jaku


Sida ke bisi autoriti endang semampai nerima hak sereta kuasa genap raban bansa ke deka ngena sereta ngenanka jaku diri empu. Taja pia, undang-undang menua madahka jaku Melayu nya jaku bansa menua Malaysia. Nya kebuah, jaku Melayu tu nyadi jaku perintah sereta dikena enggau regas amat ba bidang pelajar. Siti gerempung nasional ke benama Dewan Bahasa dan Pustaka  udah ditumbuh dikena ngemansang sereta ngelakuka jaku Melayu tu. Taja pia, ba media, senario mayuh bengkah bansa jaku endang tau mega dikena nyengkaum jaku ke kurang agi dikena ba mua mayuh.     

Tiada ulasan:

Catat Ulasan