19 haribulan December tu tadi nya hari pemutus tisih
ke dikumbai Pentaksiran Tingkatan Tiga (PT3). Maya nya mayuh macham ulah
nembiak ulih diperati lebuh nerima pemutus tisih nya. Ngagai sida ke bulih pemutus
tisih ti lati tentu sida lantang sereta gaga tang taja pia ngagai sida ke enda,
enda patut sida majak sinu sereta ngulitka ke pengulih diri tang sida patut
nguji ngubah pengulih diri maya sida ba pom empat.
Taja pan baka nya, enti diperatika ari sukut realiti
pengidup nembiak agi mayuh amai sida tu enda ingatka diri ketegal ke ngumbai
pom empat nya taun ‘bulan madu.’ Pom empat mega suah dikumbai taun relaks dalam
pelajar lalu enda ibuh bebendar laban maya ngirai diri napi Sijil Pelajaran
Malaysia (SPM) nya agi lama amat.
Peragam ti salah baka nya ngujungka mayuh nembiak
sekula dipejal ngulang pelajar sida bekali lipat lebuh masuk pom lima. Tu ngasuh
sida berasai kena tekan maya nyau dampih peresa SPM. Peragam ti baka tu patut
bendar dikemetul dikena nentuka nembiak nya ulih merambu pengidup sida dudi
hari enggau manah sereta teratur.
Pom empat ukai taun alai nembiak ‘bebulan madu’, tang nya mih awak ti kritikal dikena sida
ngaga mayuh macham langgur sereta besedia napi SPM, ditampung enggau perambu
pejalai pengidup sida jemah ila. Sigi amat lebuh diperatika mayuh amai nembiak
ke ngembuan peragam baka tu ngujungka sida kurang meri perati berat ngagai pelajar
sereta belajar sengapa kada. Realiti ti patut ti ditemu sida nya pom empat nya taun
ti beguna amat dikena nempa langgur enggau teratur ngambika sida enda berasai
besak udah nya ila.
Awak dua taun ukai lama. Nembiak ngembuan timpuh ti
serekat dikena ngulangka pelajar sereta nyikap diri napi SPM lalu dikelapung
mega enggau perambu sepengudah peresa nya. Perambu mesti digaga enda milih sida
bulih pemutus ti lati, jelan tauka baruh dalam PT3 ngambika enda ngerua jam
sida ila. Rua ditu reti nya rua ari sukut langgur jam pejalai pengidup sida
jemah ila laban dalam awak dua taun nya sida abis kurang iya udah ngemunka
singkang nuju ngagai pekara ke deka digaga sida ila. Enda milih nama arus
pelajar ti dipilih, sida patut besedia ngambika enda besak maya datai peresa. Pekara
baka tu ulih ngerugika diri empu.
Entara pekara ti patut disediaka nya pengawa ngulang pelajar
subjek ti mar sereta iya ti begunaka sida belajar bebendar lalu meretika pekara
ti dipelajarka sida enggau lenak agi. Pekara tu patut dipejalaika sepemanjai
maya. Nitihka pansik, sebagi ari tanya SPM dalam subjek Matematik, Sejarah,
Biologi enggau Sains bepelasaka topik ti diajar maya sida agi ba pom empat. Taja
pan SPM diambi maya ba pom lima tang tu mih subjek teras ke begunaka momentum
sepemanjai maya. Enti sida ulih nangkap sereta nguasa semua topik dalam subjek
diajar maya ba pom empat, pemerat pelajar maya ba pom lima tentu kurang agi. Nyadi
pekara ti salah enti bisi nembiak ngumbai pom empat tu taun alai sida bebulan
madu.
Pom empat ulih dikumbai penyangkai ti keterubah endur
sida nyingkang ngagai pelajar ke tinggi agi. Kebuah pia, laban proses belajar
enggau ngajar (BeN) ba pom empat suah agi ke ngasuh nembiak bepikir enggau tuai
agi ari sukut runding. Kelimpah ari ti ngemeratka Pengelandik Bepikir Tikas Tinggi
(PBTT) ke bisi dikena dalam sistem pelajara menua tu kemaya hari tu, pom empat
mega dikumbai pun proses belajar ke begunaka tuai runding. Reti nya, sida ukai
semina belajar bepikir nengah chara PBTT, tang sida mega deka nengah proses BeN
ke nitih chara orang ke udah tuai umur. Enti sida enda ngena awak enggau manah
dia sida semina ngerugika diri empu.
Ba pekara pasal penempa, endang nadai bida entara
nembiak indu tauka lelaki, tang bepelasarka sekeda pansik madahka nembiak indu
nya nemu agi ngambi peluang ti bisi. Taja pan pekara tu betukuh subjektif tang bepelasarka
penyampau pengulih SPM genap taun endang terang bendar ngayanka nembiak indu
nya mayuh agi mujur ari nembiak lelaki. Pemayuh tu engka ketegal sekeda faktor,
ambika banding baka penyampau nembiak, pengulih tauka chara ngulangka pelajar, penuai
runding enggau ti bukai. Nembiak indu diperatika nguna awak dua taun tu alai
sida ngirai diri napi SPM ngujungka sida mujur bulih pemutus ti lati.
Nya kebuah, raban nembiak patut milih arus pelajar ti
beseriran sereta setipak enggau pengerindu sida lalu ukai ketegal nitih penemu
tawing tauka ketegal dipejal apai indai sida.
Tentuka maya milih arus pelajar nya ketegal pengerindu enggau pengulih
lalu ukai ketegal faktor bukai. Pengawa ti milih ketegal pemutus orang bukai
tau ngenataika mayuh penanggul sereta mega ngasuh sida jemah ila puntan baka
menasan jalai jelu, labah baka buah merunjau ulu. Nya kebuah pesan jaku tuai
ngasuh kitai seruran nyukat baju ba tubuh diri empu. Apai indai ulih meri peduman
tang ukai ngansak anak nitihka pengingin ati sida.
Tiada ulasan:
Catat Ulasan