Jeman majak berubah. Enti kitai deka besemekih enggau
orang bukai dalam era teknologi digital tu dia kuing penemu senentang media
sosial enda tentu ulih diseliahka kitai pia aja. Industri tauka pengawa dagang
enda ulih enda mesti ulih nipak diri nitihka singkang pemansang dunya enti agi
deka dipeda tan sereta relevan.
Siti ari chunto ti ulih dipeda sereta tau nyadika
teladan nya ba bidang industri fesyen. Mayuh bendar langkah rapat baru
diperunding sereta dipratik nyadika respons ngagai budaya konsumer ti balat
ngembuan mayuh macham pengingin tauka kelalu demanding munyi ku jaku orang kemaya hari tu. Kenyau ari beberapa
musim, jenama baka Calvin Klein, Gucci, Kenzo, Public School, Versace sereta
mega Vivienne Westwood majak nginsit ke mua nengah chara ngulaika pekayan
lelaki enggau indu sida dalam siti show ke sama lalu ukai agi baka ke ngelama
tu nya dua iti show ti bebida.
Nitihka penemu sida ti tebangkar dalam bidang fesyen
madahka taun tu siti revolusyen baru deka dikenataika ba Minggu Fesyen. Alexander
Wang, Tom Ford, Tommy Hilfinger sereta jenema ti nguluka pengawa tu iya nya
Burberry deka bejadika koleksyen ke dikumbai sida ‘See Now, Buy Now’. Enggau chara
tu pengguna ulih bebelika gari sida kemaya nya lalu enda ibuh nganti sampai
enam bulan baka formula lama industri fesyen. Enti disebutka dalam jaku English
reti nya fashion is reinventing itself.
Uji kitai mandingka industri tu enggau industri teksi
menua kitai. Sida tu raban ti kih amat lalu semampai enggai berubah. Ngasaika diri
kena tanjal ketegal populariti servis GrabCar enggau Uber raban deriba teksi tu
sanggup nyanda laya enggau bala deriba GrabCar enggau Uber. Sida sanggup nutup
Jalai Bukit Bintang ketegal ngasaika diri dichiping sereta pengawa deriba GrabCar
enggau Uber nya dipeda enda rentang ngagai sida ke deriba teksi. Uji peda pekara
tu ba surat berita. Asil ari ulah sida
tu ngujungka imej raban deriba teksi majak negatif. Ulah sida nya mimit pan
nadai mantu ngubah nasib sida deriba teksi.
Mesej ke deka dikenataika ditu nya madah ngagai kitai
deka pan enda kitai mesti ngaturka diri nitihka singkang putar jam sereta maya
ti majak berubah. Siti agi chunto nya baka majalah enggau surat berita enda
tentu ulih semina bepanggai ba media chelak aja. Penatai majalah enggau surat
berita tu ba dunya Internet enggau media sosial patut dikukuhka agi.
Nya kebuah pesan ari pengarang sekali tu beserimbai
enggau taun baru 2017 tu mai kita anang enda Reinvent yourself . Anang kelalu berasai lantang enggau tikas status quo. Mesti nguji deka ngubahka
diri nyadi versyen ti pengabis manah. Taja pia amat mih berubah nya pekara ti
patut tang anang mih sampai kitai nyau enda ingatka identiti diri empu. Identiti
kitai empu nya mudal tauka puku dikena kitai nyingkang ke mua enda ngira
pengelaju jam beputar sereta awak ke semampai berubah.
Tiada ulasan:
Catat Ulasan