Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Isnin, 16 Januari 2017

Dikelala Bungai ari Langgu, Dikelala Bansa ari Jaku



Kala kita ninga rambai jaku “dikelala bungai ari langgu, dikelala bansa ari jaku”? Rambai jaku dalam nya ngundan reti ke dalam. Iya nerangka pasal jaku ti ulih nyadika kelai orang bukai ke ngelala sapa orang ke bejaku nya. Reti nya ari jaku, orang bukai ulih ngelala kitai. Rambai jaku nya mega ukai semina ngembuan reti jaku nya aja tang mega iya ngembuan sistem linguistik ti nyengkaum lambang-lambang bunyi baka fonetik tauka fonem ke ditusun nyadika rambai jaku tauka ayat.

Jaku nyadika kelai daya idup lalu nyadika siti sistem kaul sosial dalam raban mensia. Bala antropologi ti pandai dalam daya idup enggau raban antropologi sosial tekait agi ati deka mansik jaku ari sukut tu enti dibanding ari mansik jaku ari sukut sistem struktur linguistik aja.

Ari rambai jaku nya tadi mega, kitai ulih belajarka dua aspek ti beguna senentang kaul jaku enggau orang tauka bansa orang ti nguna jaku nya nyadika jaku asal sida. Bisi mayuh chara kitai ulih meda baka ni jaku ke dikena orang tau nyadika kelai bansa.

Keterubah, chara kitai ngena jaku. Jaku Iban ke dikena bansa Iban terang bendar nunjukka daya idup sida, tikas sosial sida dalam raban bansa Iban empu. Orang Iban ngambu jaku Iban nya sebengkah ari sistem daya idup. Jaku ke manah sereta betul ukai semina diperatika ari sukut atur jalai jaku ke betul tang mega balat ngemeratka adat sosial enggau daya idup Iban. Rambai jaku ‘nemu jaku’ sama reti enggau ‘nemu adat’ lalu pia mega rambai jaku ‘enda nemu jaku’ ngembuan reti ti sama enggau ‘enda nemu adat’.

Nya alai dalam pengidup orang Iban ke nemu bejaku tauka adat basa lebuh bejaku enda ngena jaku ke sebarang lebuh berandau enggau orang ke tuai agi umur tauka orang ke nyadi tuai sida. Leka jaku baka ‘you’ enggau ‘I’, jaku kasar, jaku kamah enggau jaku ke enda sekena enda dikena lebuh berandau enggau orang ke tuai. Tu mih ke dikumbai kitai tingkat sosial orang ke bejaku.

Kedua, jaku mega nyadika identiti diri sesebengkah bansa. ‘Bansa’ ukai ukai semina mai reti tingkat sosial tauka adat orang ke ngembuan jaku nya tang mega entiti tauka gerempung sosiopolitik tauka tamadun supraetnik. Enti dalam jaku English iya dikumbai ‘nation’. Kitai ngelala jaku Iban bepelasarka jaku ti dikena sereta dikembuan bala Iban. Jaku tu mih ke nyadika chuan ti ngeluarka bansa Iban sepemanjai jeman. Nya alai iya dikena nyadika kereban dikena berunding, ngasilka penemu enggau karya sastera enggau seni jaku Iban.

Kelimpah ari nya, kitai mega ulih ngemesaika rampa reti rambai jaku nya tadi ngena chara ngemasukka aspek pengelandik bejaku ari sukut nguasa atur linguistik ti diambi nyadika pengering identiti diri tauka pemansang tamadun bansa Iban. Mayuh bendar teladan di dunya ti bisi nunjukka sesebengkah bansa nya enda maju ketegal sida enda nemu ngambi peluang ngena jaku sida empu nyadika kereban ti dikena bepikir, kereban dikena ngerembaika penemu sereta dikena ngemansangka bansa. Chunto tu nunjukka bansa ke enda ngena jaku sida empu suah agi ngelakka jaku bukai nguasa runding sereta daya idup sida.

Enti diperatika ngena chara kasar, orang Iban di Malaysia kemaya hari tu benung ngadap penanggul ti baka tu. Sekeda bala Iban kelebih agi sida ke di pasar tauka udah tembu belajar ari menua tasik ngena jaku Iban ke udah bechampur-baur enggau jaku bukai baka jaku English tauka jaku Melayu lebuh ke berandau besehari-sehari sesama sida tauka lebuh dipinta bejaku ba mua mayuh nunga bala Iban empu. Tu terang bendar nunjukka sida nadai pengarap ke jaku Iban nya ulih dikena mantaika runding tauka dikena ngetanka identiti bansa. Mayuh bala sida tu udah enda nemu bepikir ngena jaku Iban ke betul sereta standard.

Lebuh bejaku ba mua mayuh di rumah panjai tauka dini-dini endur ke mayuh Iban, kitai enda mega dipinta ngena bejaku jaku Iban ngena jaku dalam tauka jaku berambai tang tu mega ukai madahka kitai diberi lisin ulih ngena jaku Iban ke salah lebuh bejaku. Jaku ti salah jalai ngena suah agi datai ari runding ke beserabut, enda dalam sereta kurang ngembuan penemu ke tinggi. Enti tu nyadi baka kitai, nya ngelaika bansa nya enda mansang ari sukut akal enggau runding.

Nya kebuah sigi amat rambai jaku ke madah “dikelala bungai ari langgu, dikelala bansa ari jaku”.

Tiada ulasan:

Catat Ulasan