TN50 juluk ati baru belalauka chuan nembiak rebak baru

Pemuka Kenang

Sapa kala ninga TN50? Nama utai ti dikumbai TN50? Nama empas TN50 ngagai semua rayat Malaysia. Transformasi Nasional tau mega disebut ngena jaku puntang TN50 nya sebengkah idea ti dikambuhka Menteri Besai menua Malaysia, Datuk Seri Najib Razak sereta dibantaika iya dalam bulan October maya bajet 2017.

Batang Kenang

TN50 tu sebengkah idea baru ungkup menua Malaysia ila maya ngampir taun 2050. Nitihka Najib, tu siti juluk ati tauka visyen ti dilempaika ba bau nembiak rebak baru ke diuluka raban ari Opis Menteri Nembiak enggau Lumba. Tuju juluk ati tu dikena meda Malaysia tu regas mansang nyadi sebuah menua ti maju bepelasarka chuan enggau runding nembiak Malaysia ke tegap bemalinka identiti nasional iya nya bansa Malaysia.

TN50 nya manifestasyen ti tampak ari perintah laban ti angkun mendingka sada nyawa nembiak redak sentang chara Malaysia patut dikemansangka dalam awak kira-kira 30 taun ari diatu. Nitihka penemu Khairy Jamaluddin (Berita Harian, 26 Jan. 2017), TN50 nya sebengkah juluk ati baru ti ngayanka imej Malaysia nitihka timpai mata nembiak rebak baru.

Kitai patut berasai temegah ati meda prinsip tebuka Najib empu lebuh iya ngelanggurka visyen baru ungkup Malaysia tu. Kebuah pia, laban iya empu nyerahka ngagai nembiak redak nentuka kuing tuju sereta chara dikena nyapai juluk ati TN50 tu. Naka kediatu pekara baka tu lalu bedau kala dikereja tuai-tuai pemesai Malaysia ke udah-udah sentang pengawa ti meri peluang ngagai generasyen nembiak nentuka chara Malaysia patut diangkat dalam timpuh 30 taun ti deka datai ila bepelasarka idea enggau pengingin ati sida.

Rayat patut besedia nerima TN50 tu nyadika platform ngambika sama-sama beripai ngenjuk idea dikena nukuhka Malaysia tu nitihka chuan kitai empu; reti nya enda bepanggai ba kuing runding orang luar sereta jauh ari sebarang elemen luar. Enda ngira bansa, pengarap enggau tikas sosial baik nya raban profesional, pengelicha, pemesai perintah, nembiak kolej, kuli, orang bumai tauka berikan mesti sama-sama nyaup meri idea nengah TN50 dikena nentuka pengetan pemansang menua kitai jemah ila.

Tuju TN50 ba pekara ti bekaul enggau bidang sosial entara bansa di Malaysia sigi tampak amat; iya nya ngempuru semua rayat enda milih bansa ba baruh siti payung besai ti dikumbai menua bansa Malaysia. Besenutuk enggau nya mega, TN50 tu ngenanka identiti menua demokrasi ti ngemeranka Sistem Raja Bepelasarka Undang-undang. Nengah TN50, penyerakup entara pupu raban bansa mesti dijaga nyadika pugu agenda lebuh ngangkatka menua Malaysia jemah ila. Penyerakup entara bansa tu mega nyadika kubu dikena ngetanka menua tu ari ramang menua bukai. Rayat Malaysia tentu enggai meda laya entara bansa baka ke udah nyadi rambau 13 Mei 1969.

Ramang ari raban ekstremis bansa mega mesti diperati sereta dikemaduka enggau naka pengelengkas nyengkaum sida ke semampai ngemesaika isu kuasa enggau hak sesebengkah bansa. Tu mega mungkur bala ke seruran mantaika jaku ti balat bepelasarka penemu rasis.

Nengah TN50, sistem undang-undang menua mega mesti dikemanahka agi. Iya patut ngira pekara ti ngenanka akta ti beguna amat dikena nyaminka pemaik enggau harmoni entara rayat. Ambika banding, Undang-undang baka Akta Hasutan (ngajum) enggau SOSMA ditempa dikena napi raban chauvinis enggau ekstremis.

Nangkanka nya ba pekara ti bekaul enggau pelajar, TN50 diarapka ulih ngangkat sistem pelajar bansa ngagai tikas dunya. Beberapa dekad ti udah, mayuh amat ubah polisi udah digaga dalam sistem pelajar menua ketegal segang pemansang dalam sistem sosial enggau dunya penemu ti nadai aris entara menua. Empas ari tu, sistem pelajar kitai lalu dibagi ngagai mayuh arus nitihka sistem sosial bansa tauka bepelasarka sekeda endur. Pekara tu ngujungka seraka pelajar entara rayat majak besai-sebesai.

Taja pan menua udah manggai umur 60 taun dalam taun 2017 tang seraka akses ba bidang pelajar sereta fasiliti entara menua pesisir enggau nenggeri agi dipeda sedandang.  Sistem ti bisi kemaya hari tu mesti diseruri, dibiki sepemanjai maya ngambika ulih nempa rayat Malaysia ti bepelajar tinggi kelimpah ari ngembuan mekanisme dikena ngerapitka seraka sosial entara rayat.

Nengah TN50 mega, perintah dikarapka ulih meratika baru sereta ngemanahka agi Perambu Pemansang Pelajar Malaysia (PPPM) ngambika beseriran enggau guna sereta senario pemansang kemaya hari tu. Sistem pelajar enda ulih digaga nyadi kereban politik. Reti nya, sistem pelajar mesti lepas ari elemen ti ulih muntanka pemansang sistem pelajar bansa.

Penutup Kenang

Nya kebuah, raban nembiak redak iya nembiak rebak baru dikarapka ulih sama-sama mantaika idea enggau penemu sentang TN50. Pekara tu ulih dipejalaika nengah dialog ti diatur Opis Menteri Nembiak enggau Lumba. Tu mih platform ti pemadu manah dikena ngenataika penemu sentang chara Malaysia patut dikemansangka maya ngampir taun 2050 ila. Semua kitai nyengkaum perintah enggau rayat enda mudah lachak, enda mudah nyintak dalam ngemujurka juluk ati tu. Kitai semua rayat Malaysia tentu deka meda maya datai taun 2050 nya ila Malaysia bediri tegap ba mata dunya nyadi sebuah menua maju sereta kaya ke alai rayat iya idup enggau penuh harmoni.