Pun penyampau nembiak bulih 6A balat bendar kusut ba Ujian
Pencapaian Sekolah Rendah (UPSR) 2016
ketegal kelalu diikat enggau chara belajar tradisional ti udu meri perati
ngagai teknik ngapal kelimpah ari kurang penemu pengajar sentang format peresa baru
nya. Tu ditambah mega enggau bansa tanya
ti bepelasarka tanya Pengelandik Bepikir Tikas Tinggi (PBTT). Nya mih kebuah
nitihka pemutus peresa mayuh nembiak kohort tu enda bulih pemutus peresa ti
lati.
Taun 2015 38,344 calon mujur tulihka 5A tang taun 2016
semina 4,896 ari 452,721 nembiak bulih semua A bagi enam subjek dalam UPSR
2016, iya nya semina 1.11 persin ari semua calon. Nya kebuah, pemutus peresa UPSR
taun 2016 tu nempa konflik aba raban apai indai nyentuk ngagai sehari tu
kelebih ba sida ke kurang bepenemu sentang format peresa ti baru tu. Pemutus peresa ti
baka tu tentu ngayanka polemik ba raban mensia mayuh.
Penyampau ti baru tu ulih nyadika ukur tumu dikena
merati taka ni pengulih nembiak nguasa PBTT
kelimpah ari penau pengajar nyerap format baru nya ba sida empu sereta ngagai
bala nembiak. Nengah format baru nya, nembiak enggau pengajar enda ulih agi kelalu
fokus ngagai konsep belajar ngena chara ngapal aja tang mega patut meri perati
berat ngagai meretika sesebengkah pekara. Udah lama amat nembiak enggau
pengajar ba menua tu nguna belajar chara
ngapal enti dibanding enggau chara meretika pekara. Endang enda ngalitka ati
ketegal chara tu nembiak ulih nyaut tanya enggau chukup manah ketegal semua
utai tu udah dimalin.
Taja pia lebuh PBTT berengkah dikena, dia nembiak baka
ke lemas enda nemu utai ketegal tukuh belajar chara lama nya enda seriran
enggau pengingin format UPSR. Nya mih nyadika impak iya. Taja pan format nya
baru dibantai kali keterubah lalu bisi orang enda besetuju enggau format tu
tang ubah singkang nya dikira nemban dikena ngubah gaya runding nembiak ti kelalu
bepanggai ba pengulih akademik aja. Sektor pelajar dunya global udah berubah.
Pengawa ti kelalu bepanggai aba akademik sepemanjai maya nyangka tau ngenataika
penanggul ngagai nembiak jemah ila.
Penatai pengawa ti begunaka PBTT nya entara chara
dikena mantu sektor pelajar kitai napi ubah global. Kitai enda patut ngerijat
meda pemutus peresa ti enda tentu manah. Anang nyadika pemutus peresa UPSR taun
2016 nyadi penanggul ti besai tang iya patut nyadika pelasar dikena ngemanahka
sebarang pengelemi ti bisi. Nya kebuah, pengawa sekeda orang ke ngumbai nembiak
kohort kesekali tu nyadika kereban uji pansik peresa nya enda nemban amat.
Manah agi iya disebut sebengkah ari chara ngemanahka sistem pelajar. Agi mega
tuduh penemu sentang ubah format UPSR tu endang udah dibantaika kenyau ari taun
2010 lalu taun tu iya berengkah dipejalaika. Ubah nya mega dipejalai nitihka
renggat. Nadai pansut isu nembiak patut dilabelka enggau mayuh macham nama.
UPSR 2016 nya kohort keterubah ari baruh format baru
Kurikulum Standard Sekolah Rendah (KSSR) ti mega disikap enggau Tisih Ba Sekula
tauka Pentaksiran Berasaskan Sekolah (PBS) kenyau ari taun 2011. Format baru nya
ubah ti betukuh holistik dikena nempa nembiak ti nitihka langkah rapat kreativiti
enggau tikas bepikir ti tinggi enti dibanding enggau iya ke sebedau tu ti balat
agi meri fokus ngagai tanya mayuh macham pilih. Nya kebuah, aruh iya enda patut
bendar kitai manding pemutus peresa taun tu enggau taun sebedau tu laban format
iya jauh amat bebida. Nembiak patut nyaut tanya peresa ti bisi kaul enggau
pemereti sereta pengelandik nulis karang. Tu begunaka nembiak ngembuan pugu
pengelandik enti dibanding enggau tanya ti betukuhka objektif sebedau tu.
Dikena ngemanahka agi pekara tu, patut mega disadangka
raban pengajar guru diberi penemu ti dalam agi sentang format baru UPSR
kelimpah ari pengawa ti ngemeratka PBTT ngagai nembiak. Sigi amat pengawa ti
deka ngubah langkah rapat ngajar enggau belajar (P&P) chara tradisional
ngagai format baru ukai pengawa ti mudah dikerejaka tang ubah tu patut terus
dipejalaika. Pengajar enggau nembiak mesti ngemunka singkang masaika diri enggau
P&P baru laban format UPSR kemaya hari tu mungkur semua pengelandik, penemu
enggau ukur pemanah tauka nilai. Nya alai pengajar patut ngajar nembiak sida
enggau fleksibel agi ngambika sida ulih ngena PBTT enggau betul. Enti nembiak
majak diajar ngena chara ngapal tentu sida nadai bepeluang nguasa PBTT lalu tu
ngujungka pekara sama deka nyadi ba UPSR ti nangkanka tu.
Tiada ulasan:
Catat Ulasan