Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Jumaat, 24 Februari 2017

Ai ansah tusun ketiga



Tu ai teratak bintang banyak ninggang awak arus nanga
Tu ai gemuruh bintang labuh baka suluh lampu kelita
Tu ai chapah batu belah tinggang darah babi menua
Tang agi ga tu dikumbai aku ai sempuli padi paya,
Ai bingka padi kerapa tanam sida jang di emperan tanah kerapa
Nya alai tak mansang padi bangang ngasuh tak betugang tuga chenaga
Tak nyadi padi wi ari kaki sampai antara
Peda buah naka pemanah teruya-ruya
Ketau dara bagau pulut timau enggau pesingan tangan tapa
Dua kambut di buntut guni baja,
Bai pulai nuju penyambai rumah raya
Lalu diindik di atas pentik papan pelangka
Lalu ditiup enggau ribut angin raga
Lalu ditampi enggau siti chapan dua
Lalu dijembi dara mereti sehari-hari ke ari pagi sampai matahari ke teruji putui linda
Lalu diinjin ba injin ke bemain enda belepa
Lalu dipanduk dara gauk dalam periuk kendi tembaga
Lalu diengkah manah-manah selidak chapak bunga
Lalu digerami enggau igi ragi segala
Udahnya lalu dikandang sida aya jang dalam rumbang tajau singa raja
Lalu disarap dara nelap enggau lipat kain kesumba
Lalu dituang dara mekang dalam balang butul segala
Lalu diperenchitka aku mimit dalam chubit chawan bunga nengah kelasah tikai sana jawa
Tadi bai dara bajik pansut ari penaik bilik buka dua
Bai ngagai kitai ke berintai duduk semuka tugung bala
Laban randa seharitu besai pengawa melah gelagah buah pinang seleka,
nyemelaka asap lia nyemakaka bunga chempaka
Nya alai ai tu kena aku ngansah terinting puting dabung seleka
Awaka nuan nekis nyaris inggar didinga
Sepindah enda munyi pantap
Niang Minggat laki Jara
Lebuh tinda dibai orang ngujika ati berani mutus changka
Nyimpung igi balang begumba, merejuk kuta pintu labang
Laban tinda nuan tu endang dipanahka kita serumah nembuka kereja
Bejadi seduai ke melaki bini kumbai kitai melah pinang.

Tiada ulasan:

Catat Ulasan