Ai ansah tusun kedua

Nya alai tu mih ke digela aku ai sempuli padi nubai,

Tumbuh di tanah latah mandai,

Dibantun dara imun nyerumba sebum panas lemai,

Diketau dara bagau betenggauka seliau bintang tigai,

Dikisar indai entukar bebar enggau kah lamba mikai,

Ditutuk dara gauk enggau lesung tunggul kelampai,

Ditampi dara tinggi enggau chapan baru tembu bingkai.

Lepas nya baru dipanduk dara gauk enggau periuk temaga Berunai,

Dichampur indai burung tekukur enggau meki ragi pemakai,

Disimpan indai burung bayan dalam tempayan dua berimbai,

Disengkabung indai burung tiung enggau lumpung kudi Berunai,

Udah nya baru lalu dituang indai bujang ngagai balang butul kirai.

Dia iya lalu bebali nyadi tuak ansah beram nyamai,

Enti kelia dikena ngansah niang Dugat apai Renai seduai Jupong apai Jawai,

Tang ke tu kena aku ngansah tatah dabung landai nuan Igat wai,

Ngambika ati nuan berani ngereja semua utai,

Awakka runding nuan juring baka juing laja kirai,

Sada nuan bias ari tuba Kayan Long Linai,

Ngambika mejang nuan ila tau enggau orang ngerandang jalai singkang pemansang ngemajuka bansa kitai.