Ai ansah tau mega dikumbai jaku ansah nya sebengkah leka
main dikena meri peransang, ngelancham ati enggau runding sereta muji orang ti
deka diasuh bejaku. Jaku ansah tu suah
dikereja lebuh bisi pengerami ngambika orang ti diasuh bejaku ba mua mayuh nya
enda sanggu mansutka penemu diri. Peratika chunto ai ansah ti keterubah tu:
Nyadi tu ai sempuli padi paya,
Diberi Sempeti Api Raja Petara,
Dikena aku ngansah dilah sura nyawa enggi nuan unggal,
Ngambika jaku nuan lagi nyaris inggar didinga
Munyi nakuda kapal perang.
Aku ga meda pala nuan nyau repa umba tempuga kenyali
banda,
Meda belakang nuan bendang-bendang tinggang seludang
baju kasa,
Meda punggung nuan nyau penuh laban gelung rajut bisa,
Meda lengan kanan nuan unggal
Nyau enteran sangkuh temaga.
Nya alai tak chukup gaya nuan dipeda aku,
Patut nuan bulih emsumbar anak pesiri laki ular naga,
Suah nguluka orang ngipa di nanga mayuh besimpang.
Nya alai udah nuan ngirup ai tu lagi unggal,
Nadai nya ngasuh nuan sulai lesi bebadi ilang nyawa,
Tang ngasuh tubuh nuan teguh ari selama,
Ngasuh isi nuan lagi tan berujanka leka meriam bedil
temaga,
Ukai enda lebuh tembai orang begawaika igi rirai balang
begumba,
Endang nuan dipaduka ngirup ai tuntung jalung bisa,
Laban nuan endang tampak rita sekayu menua Sarawak
nunggang.
Enda semina naka nya,
Enti lebuh ngintu hari pengada Tuan Yang Terutama,
Dia nuan pansut nama,
Diberi tanda terima bintang.
Tiada ulasan:
Catat Ulasan