Nyadi tu digela
aku,
Ai takang
tunjang teberu terutu jemu ujan nyaya,
Ai buah apung
sepugu keberai nadai lepa,
Ai tusu tanah
ladu beri antu Bunsu Sempandai,
Ai tambak bukau
galak tumbuh sekeradak keruang sungai,
Ai sepeta bunga
jawa tumbuh di nanga kerapa melai,
Sua enjok suka
tendok,
Datai ari Teluk
Baya Bebangai,
Suruh anjung
Burung Ketupung,
Surung anjung
Burung Beragai,
Lalu dianjung
Bujang Lempong ngagai landung tanah landai,
Ujak pulut
lemak ujak selepak buluh balai,
Nyau kelama,
peda nyadi dih,
Belayan padi
ari kaki sampai serarai,
Peda mansang
padi bangang nunda segang pasang lemai,
Peda buah padi
mudah udu manah besai tangkai,
Lalu diambi
Dara Sanji isi ngagai lanji tikai kemebai,
Simpan Dara Rawan
dalam pelawan tajau rawai,
Tutuk Dara Gauk
ngena cheruk ngambika nyamai,
Pelaki Dara
Mereti ngena ragi ulih meli ba Kedai Awai,
Dipulah Seripah
Dayang Ani, bini dudi Patinggi Ali Datuk Intai,
Dia ia lalu
disimpan sida dalam kutak begambar singa,
Ditaruh sida
teguh-teguh di supermarket kedai china,
Lalu dibeli
Bujang Wi ngena duit pala raja,
Nyadi diatu iya
dipeda kitai nerachah mua bala,
Laban Ai Brandy
champur Whisky enggi aku tu,
Endang sigi
pama pemadu-madu iya bisa,
Teleba
ngerebahka jelu gajah begading dua,
Kena sida bujang
belaban bungah enggau sida ke dara,
Lebuh ke
besemaya di kebun bunga muzium negara.
Tang ke sehari tu
tadi,
Iya dikena aku
ngansah terinting puting dabung seleka,
Enggi kita wai
akan,
Ke terengkah
aba blog aku sapit tikai anyam tiga,
Ngambika
seregah kita taing-taing inggar didinga,
Munyi pusin
bilun terebai enggi Sultan Yang Dipertuan Raja,
Maya iya pulai
ari matau menua,
Aku ga meda
pala kita nyau repa ulih idea pukul rata,
Meda belakang
nyau bebendang tinggang seludang baju kasa,
Punggung nyau
penuh laban gelung rajut bisa,
Meda lengan
nyan enteran sangkuh temaga,
Baju udu badas
sempama kain permaidani sutera.
Nya alai, ke tu
Lalu diperenchitka
aku mimit ba chubit gelas bekaki,
Dikena aku muka berinja dabung gigi,
Ngambika nyawa nuan lagi nekis nyaris inggar memunyi,
Sempama munyi serumbung lori,
Nuan ga endang dipaduka orang di lempedu kandang ati,
Tau nusun ari pun mula nyadi,
Datai ti ujung pengawa kitai berami.
Dikena aku muka berinja dabung gigi,
Ngambika nyawa nuan lagi nekis nyaris inggar memunyi,
Sempama munyi serumbung lori,
Nuan ga endang dipaduka orang di lempedu kandang ati,
Tau nusun ari pun mula nyadi,
Datai ti ujung pengawa kitai berami.
Tiada ulasan:
Catat Ulasan