Anang mawa enggau pemutus peresa SPM

Panyun Jaku

16 MARCH 2017 tu tadi tentu nyadi hari  ti ngasuh sekeda bala nembiak sekula nya kesal di jungkal kandang ati kelebih agi ngagai semua nembiak Sijil Pelajaran Malaysia (SPM) 2016 ketegal maya nya mih pemutus peresa sida dikeluarka Opis Menteri Pelajar. Pemutus SPM endang iya beguna amat ngagai nembiak lepas pom lima ketegal nya mih tiket besai dikena sida masuk institut pelajar tinggi (IPT).

Batang Kenang

Nembiak ke bulih pemutus ti lati tentu enda napi sebarang penanggul masuk sebarang IPT laban pintu endang semampai sedandang tebuka ngagai sida ke deka nampung pelajar ngagai peringkat ke tinggi agi.

Ngagai sida ke bulih pemutus kurang lati, kita ke bendar enda patut bangat berasai mawa, nama agi enti kita ngembuan peragam ati ti madahka peluang udah tetutup alai kita ngauk sebarang penemu. Peluang mega semampai tebuka ungkup nembiak ke kurang benasit manah laban perintah udah nyediaka mayuh bengkah lubang pelajar dikena sida ke bisi pengerindu deka majakka pelajar di dalam menua tu empu sekalika di universiti, kolej universiti, politeknik tauka kolej komuniti.

Enti diperatika ari sukut rama, genap iku nembiak ngembuan peluang neruska pelajar sida taja pan prestasi akademik ba peringkat SPM sida enda tentu lati. Iya ti patut diperatika sida nya sida empu enda kelalu milih IPT ti deka dipasukka sida.

Endang enda ulih disangkalka agi degree tauka setipikit ti dikeluarka sesebuah IPT nya bisi meri impak ngagai peluang nembiak nya bulih kereja sepengudah sida begraduat. Taja pia, nembiak mega patut nemu sereta meretika pekara ti bekaul enggau pengulih akademik ari sesebuah IPT ukai pugu faktor penentu ti mantu sida bulih kereja ti dipinta sida. Kebuah pia, laban orang ke ngaji pengereja pengawa kemaya hari tu balat agi meri fokus ngagai pengulih calon-calon ti minta kereja nya ngayanka pengelandik sida kelimpah ari pengulih akademik baka ti ditulis dalam transkrip sida.

Nya kebuah, ngagai semua nembiak lepas SPM, anang berasai nangi enti pemutus ti diulih enda tentu lati laban peluang masuk makit kereja agi sedandang enti sida nampung pelajar ba sebarang IPT di menua tu kelebih ba bidang pengelandik.

Bepelasarka respons ti diberika raban pengaji pengawa madahka kelimpah ari pengulih akademik, bisi tiga pugu faktor ti diperati lebuh sida interview siku-siku calon ungkup sebarang pengawa ti bisi puang.

Tiga pekara tu iya nya ulah, pengelandik bekomunikasyen enggau pengelandik mutarka penanggul.

1. Ulah: Ulah nya beguna amat lebuh nentuka daya idup nembiak nya dudi hari ila tang mayuh nembiak enda tentu pedulika pekara tu. Tiap-tiap iku nembiak patut ingat sebarang pekara ti dikereja sida sehari tu deka meri empas ngagai sida jemah ila.

Nya alai, sida mesti nentuka semua aturan ti ditetapka IPT semampai dititih taja pan kadang-kadang nya ukai pekara ti dikedekaka ba ati sida.

Ba awak ti sama, nembiak mega dilalau awakka enda upload sebarang komen tauka informasyen ti betukuh negatif, petenah tauka berita selebebu ngapa ke dalam akaun media sosial sida baka Facebook enggau Twitter.

Semua pekara tu deka diperesa orang ke deka ngambi sida gawa laban iya ngayanka ulah enggau personaliti nembiak nya empu.

2. Pengelandik bekomunikasyen: Prestasi akademik ti lati bedau nyamin penau orang nya dalam bekomunikasyen laban iya begunaka latih sepemanjai maya.

Nembiak mesti ngambi peluang lebuh nampung pelajar sida ila alai sida nambahka pengelandik komunikasyen sida. Mayuh macham chara ulih dikena sida nyapai tuju tu. Besaraka penemu dalam raban, suah betanya sereta bejurai enggau pengelicha kelimpah ari ngaul diri dalam mayuh bengkah  aktiviti kokurikulum. Nya sekeda ari chara dikena nambahka pengelandik tu.

Enti aktiviti baka tu ulih digaga sepemanjai maya tentu pengelandik komunikasyen nembiak ulih semampai dikemanahka agi.

3. Pengelandik mutarka penanggul: IPT nya palan ti strategik amat alai mantu nembiak nambah pengelandik sida mutarka penanggul.

Kebuah pia, maya sida ba IPT, sida mesti ngaturka aktiviti sida besehari-sehari nya kediri empu nyengkaum mutarka sebarang penanggul ti ditapi sida. Ari nya, pengulih sida mih nyadika elemen mutarka penanggul nya beguna amat.

Ngena media sosial nyadika kereban alai ngayanka asai ati ti enda puas nya ukai chara ti patut digaga bala nembiak dikena sida mutarka penanggul ti ditapi sida. Indah ngaul diri enggau sebarang aktiviti ngayanka pengasai ati diri  sereta mantah rama mega ukai chara ti engkeman dikena mutarka penanggul. Enti pekara baka nya digaga, iya tentu deka meri persepsyen negatif ngagai ulah enggau personaliti nembiak nya empu.

Simpul Penemu

Enda ulih disakalka agi, pengulih akademik nya siti pekara ti beguna amat dikena ngulihka pengawa ti manah. Taja pia, pengulih akademik aja ukai pelasar penentu ti ngasuh orang nya bulih kereja ti dipinta sida.

Utai ti balat diperatika orang ke ngaji pengereja pengawa kemaya hari tu iya nya pengelandik ti ulih dibantai calon ngagai orang ke deka ngaji sida kereja.

Pengulih calon bekomunikasyen sereta mutar penanggul meri pengarap ngagai orang ke deka ngaji sida nya lalu tu deka nambahka peluang sida bulih pengawa ti dipinta. 

Personaliti enggau ulah positif calon mega mantu nguingka runding orang ke deka ngaji nya nerima sida.

Nya alai, pesan ngagai bala nembiak lepas SPM taun tu, anang bangat mawa enggau pemutus ti diulih kita laban iya ti berat agi nya perambu dudi hari ngambika lati agi lalu ngerundingka faktor ti tau narit ati raban pengaji pengawa kemaya hari tu. Munyi ku jaku orang tuai enti deka sigi alah enda enti enggai bisi pan dikumbai nadai.