‘Bansa Macha Bansa Ti Maju’

Pemuka Kenang

Maya ke Miri ngetu di Betong,

Singgah di Betong lalu meli lia;

pengawa macha mayuh penguntung,

ngambika bisi diguna jemah ila.

Raban bansa Iban endang sinonim enggau mayuh bengkah leka main tradisional dikena ngenataika geragayak ati sida maya beperindang tauka lebuh besampi ngagai Petara. Entara leka main nya nyengkaum leka timang, leka sabak, leka jaku ai ansah, leka pelandai enggau mayuh ti bukai. Leka dindang di atas ngayanka pengawa macha nya beguna amat dalam pengidup kitai besehari-sehari dikena ngambuh serak dudi ti berintelektual. Dudi hari besemaya mai penguji ti sarat enggau penguji reformasyen. Nya kebuah,  nengah pengawa macha mega ulih ngeresak runding ti baru ngambika nadai bisi modal mensia ti dikungkung enggau chara bepikir ti sempit. Taja pan dunya udah nujah mayuh bengkah jeman maya dalam beberapa dekad ti udah tang budaya macha nya tetap pengawa ti dikemeratka dalam pemansang sereta pengentap sesebengkah bansa. Sejarah udah ngerikod bansa ti mujur endang bepelasarka penteba komuniti ti bisi budaya literasi. Baka nya mega enti fakta tu ditebalitka, komuniti enda mujur ketegal sida enda ngemeranka budaya literasi. Bansa ti bisi kuasa tauka mujur dalam sesebengkah aspek pekara enda ulih ngenan utai ke diempu sida enti nadai budaya penemu ti tegap. Rayat Malaysia ti enda nemu pemesai guna pengawa macha patut nyadika pengawa macha nya sebengkah ari budaya sida. Bah, nama guna kitai ngemeranka pengawa macha? Katika macha tu ulih mai penguntung ngagai kitai?

Batang Kenang

Pengawa macha sigi ulih nambahka penemu kitai.  Pengawa macha ulih meri ukur pemanah ngagai siku-siku orang ngambika iya besedia napi penanggul sereta besemekih enggau orang bukai maya era globalisasyen tu.  “Genap iku kitai mesti meri rega tambah ngagai diri empu,” pia ku menteri besai ke dulu suba, Tun Abdullah Ahmad Badawi maya ke bejaku ba mua mayuh urung tengah taun 2005 suba. Jaku iya nya madahka reti ukur pemanah siku-siku anak pascamerdeka deka betambah enti individu nya bebendar deka ngangkatka paradigma diri empu ngambika enda ba taka pengidup ti lama belama. Enti kitai belematika pekara tu enggau silik, jaku tu ulih dikamatka enggau pengawa macha ke tentu ulih ngenjuk idea ti manah ngagai pemacha nya empu. Kelimpah ari belajar chara formal di sekula, ukur pemanah diri deka ulih betambah enti sida ngemeranka pengawa macha kereban bacha akademik baka macha mayuh macham bansa majalah ambika banding baka Majalah Dewan Bahasa, Dewan Siswa, Kosmik enggau ti bukai. Orang ke pandai di chunggai tunjuk jari seruran ngumbai pengawa macha nya jematan penemu. Persepsyen tu ayan ari pengawa macha ti dikemeran nya ulih ngaul mensia enggau dunya penemu. Reti nya, ngemeranka pengawa macha endang ulih nambahka penemu lalu nyikap kitai besedia napi penguji pemansang ti semampai ayan kemaya hari tu.

Nangkanka nya, uji kitai fokuska timpai runding kitai ngagai penguntung kedua iya nya macha tau mega ngasuh orang tebangkar. Tebangkar ba hal tu reti nya pengereja pengawa ti bepenemu lalu bepengelandik dalam sesebengkah pekara. Macha ulih nyadika koridor pemansang ekonomi dikena ngangkatka tikas penemu raban pengereja pengawa. Baka ke kala didinga kitai, komuniti ti rindu macha nya komuniti ti udah mansang sereta kompetitif ngujungka sida ulih meri sadang penemu ti baru, relevan sereta engkeman setipak enggau kereja ti dipasukka sida. Tu ke ulih mai ngangkat menua ke tikas ti tinggi agi.  Evidens baka tu ulih dipeda kitai baka ba menua pengeluar minyak ti kaya-raja ke balat bendar bepanggai ba orang ke tebangkar ari menua bukai ke maju agi ari sukut penemu enggau pemandai dalam semua aspek pengidup sida ngujungka sida tekelalu bepanggai ba orang luar. Nya kebuah, pengawa macha patut bendar dikemeranka ngambika ulih nempa komuniti sivil ti bepengelandik sereta tebangkar. Lebuh menua kitai udah nyapai tikas maksimum dalam pengawa ngambuh individu ngambika sida tebangkar dalam sesebengkah pekara dia kitai nadai agi ibuh bepanggai  ba orang luar ke tebangkar. Bepelasarka ari penerang tu nyata amat pengawa macha ulih ngasilka orang ti tebangkar tauka bepengelandik dalam sesebengkah pekara ngagai sesebuah menua nya.

Enti diperatika ari aspek bukai,  macha mega nyadika tiang penyakang konkrit  alai orang mujur dalam akademik. Taja pia, enti diperatika kemaya hari tu penampak pengawa macha majak tekelap dalam ati nembiak. Nembiak kemaya hari tu ngasaika pengawa macha dalam pengidup sida enda tentu dikemeratka taja pan semua nemu pengawa macha nya ulih  nambahka penemu lalu ulih ngerembaika horizon pikir raban nembiak sekula.  Nya kebuah, raban nembiak sekula enda tau enda nerenak pengerindu macha dalam diri sida laban macha nya pugu pemujur siku-siku nembiak. Ambika banding suba kala siku nembiak ke benama Nik Nor Madihah mujur tulihka 20A dalam peresa SPM. Iya ngemeranka pengawa macha lalu pengawa nya udah nyadika budaya dalam diari pengidup iya ke nyadi nembiak sekula. Ketegal pemesai guna macha dia bala pengajar enggau raban pemesai sekula enggau naka ulih meransang nembiak macha. Mayuh macham pengawa udah diatur baka minggu macha enggau program  NILAM (Nadi Ilmu Amalan Membaca). Nengah program NILAM mayuh nembiak udah mujur dalam pelajar sida. Kelimpah ari ti mujur dalam akademik, bala nembiak mega ulih ngena penemu ti dikauk sida ari pengawa macha nya lalu dibai ke dalam pengidup sida besehari-sehari. Reti nya, pengawa macha sigi ulih mantu nembiak mujur. Belajar enti nadai macha nya baka orang ke ngena basikal nadai betayar.

Enti pengawa macha nya udah nyadi sebengkah budaya dia rayat ti bisi ngembuan penemu dalam ulih mantaika ideologi enggau buah runding ti memelan dikena ngangkatka proses pemansang menua. Kebuah pia laban macha nya chuan dikena nukuh sesebengkah civilization ti pegari seriran enggau menua bukai ti udah ngasaika modenisasyen ti entap baka menua Jipun. Di menua Jipun, ketegal polisi aplikasyen dalam penemu sains enggau inovasyen, sida ulih nengkebang teknologi ti nadai udah ditemu ba menua bukai; ambika banding baka injin ngaduka diri ulih dikena dalam pengidup besehari-sehari; baka injin nyual ketam idup, telu manuk baru, sayur ti baru dikarang sereta utai bukai baka baju ujan enggau barang kemas. Pengelebih injin ngaduka diri tu iya nya iya ulih dikena sepemanjai maya iya nya 24 jam sehari. Hal tu ngasuh raban pedagang enda ibuh ngiruh diri nyaga premis sida laban injin ngaduka diri tu mega disikap enggau penteba pengelikun ti chukup kelimpah ari meri ungkup timpuh awak dikena sida ngemajuka pemansang menua. Ari nya nyata bendar pengawa macha tu resipi ti semitan dikena nukuh komuniti ti beproduktiviti tinggi lalu ngujungka iya ulih ngamatka juluk ati menua ke deka mansang agi ari selama.

Penutup Kenang

Kenu ku orang, udah ga terang agi ga besuluh; nya ngayanka pengawa macha tu sigi pengawa ti manah amat laban ngenataika mayuh macham pengelebih ngagai pemacha, diri sebilik, bansa enggau menua nya. Pengawa macha nya pun ti positif  dikena besadungka penemu. Hal tu nyadi evidens bepelasarka pekara ti amat nyadi dalam sejarah Islam nengah surah al-‘Alaq iya nya maya Nabi Muhammad nerima apokalips ti keterubah ba Gua Hira’ nengah malaikat Jibril ti ngasuh iya macha. Nya terang amat madahka macha nya kunci penemu ti meri impak positif dalam nguingka pemansang runding mensia mayuh. Taja pan kemaya hari tu mayuh leman pengawa udah dipejalaika dikena meransang pengawa macha tang pengawa nya sempama baka  ujan ti labuh ke pasir. Apai indai ngembuan tanggung pengawa ti besai lebuh meransang budaya macha anak sida kenyau ari mit laban sempama jaku tuai madahka enti deka ngelentika buluh awakka ari tubu. Perintah mega patut nyediaka mayuh macham perengka guna baka librari ngambika kitai ulih macha enggau lantang. Kimpin macha mega patut terus dipajakka. Enti pengawa meransangka budaya macha regas dipejalai, menua Malaysia tentu ulih nyadi menua ti maju. Nya kebuah, semua orang enda tau enda macha  lalu bebendar agi ngerembaika budaya macha ngambika ulih ngasilka mensia mayuh ti enchelak penemu. Ingat sulu jaku tu ‘bansa macha, bansa ti maju’.