Kena hari
Minggu, 9 April 2017 tu tadi raban pengarap Kristian serata dunya bisi ngintu
Minggu Palma. Minggu Palma nya siti ari hari ti pengabis dikemeratka dalam kelinda
Kristian sepengudah Hari Krismas enggau Paska tauka Easter. Minggu Palma nya
hari Minggu sebedau Paska lalu iya ngelaika pun minggu kudus, minggu sebedau
pemarai Yesus. Pengerami Minggu Palma asal ari Gerija Jerusalem diintu urung
pengujung abad keempat. Ba abad kelima, pengerami Minggu Palma udah ngerekai
ngagai sampai ke Konstantinopol. Ubah ti bisi nyadi maya abad keenam enggau
ketujuh ngujungka dua tradisyen Minggu Palma ti baru iya nya ritual merekat
daun palma lalu bejalai bebala mayuh maya pagi hari nganti iya ke muak ke lemai
sebedau tu. Pengerami tu mega dipraktik ba Gerija Barat maya abad kelapan lalu
diberi nama “Dominica in Palmis,” tauka “Minggu Palma”.
Minggu Palma
ngingatka penama Yesus ke Yerusalem laban deka ngintu Paska. Injil ngerikod
penatai Jesus ke nengeri nya nepan siku keldai. Maya penatai Jesus, mensia
mayuh lalu nganchauka baju sereta ngambi dan kayu engkeremba lalu mansang ngambat Iya enggau panjung, “Hosanna!
Beberekat mih Iya ke datai dalam nama Tuhan, ke Raja orang Israel!” Jaku nya
dikena sida ngemasaka Iya ke nyadi Mesias sereta Raja ti udah lama dianti sida.
Reti Jesus
nepan ba atas siku keldai sereta bejalai ba atas daun engkerema nya dikena
ngamatka jaku ke disebut nabi Sekariah (Sekariah 9:9). Maya jeman bup kudus, adat
sesebengkah menua ngelala raja tauka orang bansawan nya lebuh orang nya bejalai
tama nepan ba belakang keldai. Keldai nyadi kelai pemaik; orang ti nepan keldai
nya beniat mai pemaik. Pampang daun engkerema dikena ngayanka orang ke datai
nya orang ke bepangkat tinggi datai mai pemenang tauka pemujur. Minggu Palma
nya peluang dikena ngayanka minggu kepenudi pengidup Jesus. Tu mih awak ungkup
orang Kristian nyikap ati diri napi pemerinsa enggau pengelantang
Pengangkat-Iya.
Tiada ulasan:
Catat Ulasan