Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Khamis, 20 April 2017

‘Indu Malaysia ke berumur 40 ke atas...’



Limpang enda lama, ngambi sesempa rampang pinang, ngetu dulu ngambi segigi tangga nyingkang, belelak dulu ngenangka adat enggau budaya, jaku enggau kurikulum pelajar Iban. Limpang ngenangka pekara ke tau nyadika teladan, diambika chuan. Penemu ti tau ngasuh kitai menuku, berita ti tau ngasuh kitai nemu mayuh leman pekara, runding ti tau ngasuh kitai tajam perening. Sekali tu aku mai kitai ngenangka pekara pasal orang indu Malaysia. Pekara tu dikauk aku ari surat berita The Star, 16 April 2017.

Nitihka berita nya madahka indu orang Malaysia ke berumur lebih 40 taun dikumbai regas agi beleman kelebih agi lebuh sida udah badu datai kain tauka menopause. Pia ku padah siku konsultan urologist.

Professor Dr George Lee ke gawa ba Hospital Gleneagles Kuala Lumpur madahka indu ke berumur lebih 40 taun bisi beleman dalam pukul rata lapan kali sebulan enti dibanding enggau sida ke berumur baruh 40. Sida ke baruh 40 taun tu beleman pukul rata enam kali sebulan.

Sekeda ari kebuah sida ke udah enda datai bulan tu regas beleman laban sida nadai nangika diri agi tau betubuh bisi. Lebuh ke beleman suah agi bala lelaki enda tentu rindu ngena kondom lalu bala indu mega enggai makai pil nagang diri beranak laban nangika diri gemu. Tu tau ngasuh pengawa beleman tu bisi ‘risiko’ mimit.

Dikena napi penanggul tu, mayuh ari sida nyeliahka diri ari beleman. Pekara tu mayuh nyadi ba sida ke tengan umur di Malaysia. Pia ku padah Professor Dr George Lee lebuh ke dipinta bejaku ba mua mayuh senentang ramu jaku ti berambaika “What The Fact of Sexual Habits”.

Iya madah taja pan mensia mayuh nganggap orang indu badu beleman sepengudah sida enda datai kain tang ke bendar ku iya pengawa beleman berengkah regas maya tu. 

Pama indu udah datai menopause, sida lalu bisi agi pengarap. Tu ngasuh sida beleman enggau lantang ati. Dr Lee madahka indu tuai nadai tentu mayuh utai dirunding. Tu ke ngasuh sida bisi hari ke diri empu sereta bisi agi awak beleman enggau laki sida.

Ba pansik ti dipejalaika sida Dr. Lee, sida ngengkah pengawa beleman tu ba penuduk dalam rintai pengawa ti patut dikereja. Nitihka pansik nya, bala indu meri penuduk ba pengawa beleman tu ba lumur 14 ari 17 iti pekara. Lalu ke lumur 17 nya pengawa ke kurang dikemeratka sida. 
  
Tu ngayanka bida ti jauh enti dibanding enggau raban lelaki. Sida ke lelaki meri pengawa beleman tu ba penuduk kelapan ari 17 pekara ti patut dikereja. 

Kebuah pia ku Dr Lee laban orang indu ngembuan pengirau ati lebih ari orang lelaki. Sida ke indu balat agi berunding pasal duit, anak, rumah enggau lauk ke patut disumai. Nya kebuah pengawa beleman suah ditinggalka sida. Lebuh sida udah tuai, bala anak udah ba universiti, rumah enggau duit belanja kiraka udah diatur enggau chukup perambu. Tu ngasuh sida lantang agi beleman laban nadai agi utai dikirauka sida.    

Tiada ulasan:

Catat Ulasan