Empas bebaika gajet ke sekula

Tuduh penemu Opis Menteri Pelajar ti deka ngemendarka nembiak sekula bebaika gajet baka telefon pintar, tablet enggau komputer pangku ke sekula patut dipansik enggau dalam agi ari sukut chara kereban tu diguna. Iya mega patut mending penemu raban pengajar, apai indai sereta sida bukai ke relevan sebedau ngaga pemutus penemu ngemendarka kereban tu dibai ke sekula.

Menteri Pelajar apin lama ti udah madahka tuduh penemu nya setipak enggau guna teknologi tinggi dalam mayuh bengkah sektor nyengkaum ba sukut pelajar.

Ba penemu aku perintah patut meratika baru tuduh penemu tu enggau lenak agi laban iya tentu bisi pemanah enggau pengurang enti sema iya dikemendarka ila. Sigi amat kereban gajet tu beguna amat laban iya ulih ngemudahka proses belajar laban nembiak ulih bulih penerang semina ari ujung tunjuk.

Nengah bantu teknologi pemadah mega nembiak ulih nambahka pemereti sida senentang sesebengkah pekara ti diajar dalam kelas. Taja pia, enti tuduh penemu tu deka dipejalaika ila, perintah patut nentuka bisi malin sereta atur ti terit ke patut dititihka nembiak.

Malin atur tu ditempa dikena nentuka nembiak enda nyalahgunaka kereban ti disediaka perintah ngujungka iya tau ngerusakka runding enggau ulah sida. Raban ari opis menteri mega patut netapka orang ke patut ngemataka kereban gajet tu.

Ba pekara tu, tentu raban pengajar mih ke diberi tanggung pengawa ti berat tu taja pan kitai nemu sida enda patut dilempai enggau siti agi pengawa besai. Besenutuk enggau nya mega, sapa ti patut nyediaka kereban gajet tu ila laban enda semua nembiak sekula ulih meli kereban ti mar baka tu.

Enti nembiak enggau apai indai empu milih gajet ke deka sida, tentu ba sekeda ke mayuh penatai pemisi deka mai model ke mar sereta ke baru. Tu tau meri empas ti enda manah ngagai nembiak ke apai indai sida kurang penatai pemisi.

Kelimpah ari nya mega, tau nyadi kes enchuri enggau penanggul disiplin ti bukai. Enti perintah tauka sekula diberi tanggung pengawa nyediaka kereban gajet tu, pekara bekaul enggau kos tau nyadika penanggul besai laban naka kediatu bisi kurang lebih lima juta nembiak sekula di serata menua tu.

Nya kebuah, tuduh penemu tu patut dipansik enggau dalam agi. Raban ari Opis Menteri Pelajar patut betemu sereta ngaturka randau enggau Gerempung Pengajar Nasional sereta enggau Gerempung Apai Indai Nembiak enggau Pengajar di serata menua tu.

Taja pan tuduh penemu tu manah amat, kitai tentu enggai napi penanggul maya pekara tu deka dipejalaika ila laban nangika perintah diansak narit pulai pemendar nembiak mai sereta ngena gajet di sekula.