Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Ahad, 21 Mei 2017

Pangka Globalisasyen



Pemuka Kenang

Globalisasyen nya sebengkah proses ti nempatka dunya tu ba baruh siti unit ti sama sereta nadai disekat ari sukut aris entara menua enggau penuduk geografi sesebengkah menua. Nengah proses tu mega dunya nadai agi dipeda ari sukut aris entara menua lalu langit sesebengkah menua mega nyau sedandang tebuka ke alai mayuh macham informasyen ulih disadung nengah media komunikasyen baka internet, media eletronik tauka teknologi siber. 
 
Batang Kenang

Globalisasyen ukai sebengkah fenomena baru ti semina nyadi maya abad ke-21 tu, tang udah lama bisi dalam rampa pendiau mensia mayuh. Taja pia empas iya chukup mimit suba. Diatu  globalisasyen nyau majak balat sebalat sereta nyata amat dipeda dalam semua aspek pengidup mensia.

Dalam dunya nembiak sekula, ambika chunto, globalisasyen mega dipeda sebengkah ari transformasyen ti nyangka ngasuh mayuh bengkah singkang proaktif udah sereta ulih dipejalaika.  Tuju tu dikena nentuka nembiak menua tu empu tauka nembiak lokal ulih besemekih sereta besedia napi mayuh macham penguji.

Taja pan bisi sekeda orang ngumbai ubah ti dipejalaika nya bisi dipeda kelalu drastik, tang kebuah pia dikena nentuka nembiak lokal ulih besemekih enggau orang bukai. Nya mih kebuah pengawa tu patut dikereja enggau nadai betagai.

Munyi ke udah disebut, transformasyen nya patut dipejalaika dikena nentuka sektor pelajar menua kitai ulih berumpak enggau orang ari menua luar nitihka peminta globalisasyen. Enggau tu iya lalu ulih ngangkatka sektor pelajar nya ngagai tikas ke dinamik agi.

Rukun Pelajar Menua tauka Falsafah Pendidikan Negara ngemeratka aspek pelajar nya  dikemeran sepemanjai maya lalu iya ulih ngerembaika penemu enggau pengelandik individu ti mungkur semua pekara sereta dipejalaika ngena chara integrated. Tuju Rukun Pelajar Menua mega dikena nempa mensia ti setimbang sereta harmonis ari sukut intelek, pengarap, emosyen enggau selangkuh tubuh bepelasarka pengarap  sereta semampai beseruanka perintah Tuhan. Kelimpah ari nya, iya mega dikena nempa rayat Malaysia ti bepenemu, ngembuan seregah diri, ngembuan ulah manah, bisi tanggung pengawa lalu ulih nyapai pengelantang diri sereta ngenjuk pemeri ari sukut pemaik ngagai mensia mayuh tauka menua.

Nya kebuah iya ngemerat sektor pelajar laban nya mih platform ti beguna amat ukai semina dikena ngasilka modal mensia tang mega mungkur penemu sereta ulah. Dalam aspek pelajar, globalisasyen mai pangka enggau ubah ti besai nengah kurikulum pelajar sereta mega sistem pelajar nya empu.

Arus kuing globalisasyen nudukka sistem pelajar tu nyadi penanda tikas pemansang sesebengkah menua lalu enti iya enda tejapaika kualiti, sistem nya nyangka dikira enda ulih besemekih enggau menua bukai. Taja pan ari sukut polisi sigi pedis deka ngulihka kualiti pelajar ti betikas antarabansa, tang iya mesti dikereja nitihka peminta globalisasyen ba bidang pelajar.

Dikena nentuka kitai enda tinggal tauka ngaga sektor pelajar menua ti bekualiti agi, mayuh ubah patut dikereja tauka diaduka baru. Sekurang-kurang iya dikena nentuka tikas pelajar kemaya hari nitihka standard antarabansa ketegal iya mega ulih meri empas ngagai belanja belajar jemah ila.

Enti standard globalisasyen enda dikemeratka sepemanjai maya iya enda sengaja tau meri empas ngagai rebak baru ari aspek peluang bekereja, kualiti pelajar, pengulih bejaku, spritual enggau selangkuh tubuh. Nya kebuah, tanggung pengawa ngiring sektor pelajar menua ngambika sama-sama seriran enggau globalisasyen pelajar antarabangsa nyadi tusah dikereja taja pan iya mesti dipejalai ungkup pemanah jemah ila. Taja pan pia, di tengah pengeranchak transformasyen bisi mega empas positif tauka negatif ti deka ditapi.

Institut pelajar tinggi baik nya enggi perintah tauka prebet ulih muka peluang ti besai ngagai nembiak ari menua luar kena sida ngauk penemu di menua tu. Besenutuk enggau nya, mayuh bengkah perengka-guna enggau kereban pelajar patut disediaka tauka dikemanahka agi nitihka guna kemaya hari tu. Tu ke nyadika sistem pelajar menua regas mansang ari selama. Penatai nembiak ari menua luar ngayanka reti sistem pelajar menua kitai udah datai ba tikas antarabansa. Pekara tu ulih meri peluang alai besilih budaya entara nembiak menua tu enggau nembiak antarabansa sereta ulih nempa kaul ti manah entara kedua-dua menua. Nambahka nya pengelandik enggau penemu teknologi ulih dipindah ke menua tu nengah chara beambika raban ke tebangkar ari menua luar.

Taja pia, enti dipeda ari sudut negatif, penatai nembiak ari menua luar mega  disempulang enggau budaya ari menua asal. Hal tu enti enda ditapi enggau silik dia sekeda elemen ti enda manah mega ulih nyelepak tama ke menua tu. 

Beserimbai enggau nya, iya mega mai empas ti negatif laban iya tau ngasuh sistem pelajar menua berubah-ubah nitihka pemansang arus globalisasyen. Tu tau ngirauka ati laban tau ngasuh pekara ke enda setimbang nyadi enti sema sesetengah hal globalisasyen dipeda enda ulih diterima genap lapis komuniti.

Pekara tu tau nyadi, ambika banding, enti komuniti nya agi benung ngemansangka sistem penerang sida, kurang akses ngagai menua luar, teknologi agi ba tikas baruh, tikas pelajar baruh, enda tentu landik ngena jaku menua bukai kelebih agi jaku English sereta raban ke tebangkar dalam ngemansangka sistem pelajar menua ke enda chukup.

Arus globalisasyen ti semampai berubah mega ulih meri empas ngagai identiti nasional laban sistem pelajar berubah ketegal peminta sida ari luar lalu ukai ketegal peminta sereta guna pelajar maya dia ba menua nya empu. Nya alai, mayuh macham rapat langkah proaktif, perambu timpuh pandak tauka panjai enggau perambu ke bukai patut diatur sereta dipejalaika dikena ngangkatka pengulih sektor pelajar menua kitai ngambika ulih nerima globalisasyen tu.

Utai ke balat ngirauka ati nya lebuh globalisasyen tu empu diperatika ulih nguingka runding mensia mayuh lalu ngujungka pelajar nya balat agi dipedagangka kitai tauka udah datai ba tikas komersial. Kebuah pia, laban bisi orang ke ngaga pelajar nya nyadi kereban alai beambi-ulih sereta ngira untung. Tu mih ke deka mai pengerusak ngagai bansa enggau menua jemah ila. Enti kitai kelalu ngira untung dia kualiti pelajar deka ditempaya pia aja lalu ngujungka atur ti lunggar lebuh nerima nembiak masuk, pengelicha enda ngembuan pengelandik ti chukup, kualiti pelajar ti enda diintu enggau manah, perengka-guna ke enda chukup, kurikulum ti enda nyeratan sereta enggau mayuh pekara ke bukai.

Kelimpah ari nya, iya ke dikenakutka kitai mega pengawa belematika penemu dalam raban nembiak nyau majak kurang laban sida nuntut penemu semina ketegal deka pas peresa aja lalu ukai ngena penemu nya dikena nempa pengidup jemah ila.

Penutup Kenang

Kitai enda ulih lari ari nerima impak globalisasyen taja pia kitai patut landik napi pekara nya. Iya begunaka pemintar dikena nentuka impak globalisasyen nya enda nempaya utai ke udah bisi lalu enda mega ngelepaska peluang ti patut diperebut ungkup menua kitai jemah ila.

Tiada ulasan:

Catat Ulasan