Nguji Pengelandik Macha Tusun Ketiga

3.1   Teknik Nguji Pemereti Macha Sengian

Teknik ti ulih dikena nguji pemereti macha sengian nya baka ke dibaruh tu:

(a)	Teknik Tanya Tebuka
(b)	Teknik Tanya Objektif
(c)	Teknik Tanya Pilih betul – salah
(d)	Teknik Tanya kloz

3.1.2         Teknik Tanya Objektif

Teknik betanya saut ngena chara tu dikiraka agi baru enti dibandingka enggau teknik ti tradisional agi baka teknik nanya chara tebuka. Pemanah teknik tanya chara tu dipeda ari penyamai bejalaika peresa tu lalu saut iya mega objektif ari sukut meri mark. Taja pia ngaga item betukuh objektif ukai pengawa ti mudah dikereja. Kebuah pia, laban item tanya ti ditempa nya begunaka pengelandik teknik enggau peneleba ari raban pengajar ke diasuh nempa item nya. Bisi mega penemu ba raban pengajar jaku ke madahka teknik tanya chara objektif tu nadai mai sebarang pemanah ari sukut pelajar jaku. Kebuah pia, laban teknik tu enda meransang nembiak mantaika penemu sereta nulis ngena jalai jaku ti meruan. Kelimpah ari nya mega, teknik tu semina ngasuh nembiak nyangka aja lebuh ke ngiga saut ti betul.

Ketegal bisi pengelemi enggau pemanah dalam teknik tu, dia raban pengajar enda  diperansang ngena teknik tu suah, ambika banding maya nguji meretika teks ti betukuh formatif baka peresa minggu tauka peresa bulan. Taja pia, teknik tu ulih dikena sekali-dua  dalam peresa penggal, peresa tengah taun enggau ujung taun. Teknik tanya chara objektif berengkah dikena raban penguji di menua Amerika sepengudah Perang Dunya Kedua. Tuju iya digaga ngambika ngenyampatka maya meresa enggau meri mark laban iya semina ngena injin (mesin) tauka komputer. Tukuh iya ti objektif nya ke nyamin konsistensi enggau realibiliti ti tinggi entara raban pemeresa. Pengawa baka tu endang aruh iya dipejalaika di Amerika laban maya meresa keretas saut sida begunaka injin pemeri mark. Taja pia, sida mega ngasaika chara tanya objektif tu mega bisi pengelemi enti ditimpai ari sukut pelajar. Iya enda diperansang dikena besehari-sehari ba bilik kelas; kelebih agi dalam bidang belajarka jaku. Lebuh bejuraika pengelemi enggau pemanah teknik tu, Oller (1979) kala madahka munyi tu:

In the overall perspective, multiple choice tests affords two principal advantages: ease of administration and scoring. They cost a great deal on the other hand in terms of preparation and counter productive instructional effects.

Dalam peresa meretika teks bacha ti ngena teknik chara objektif tu, nembiak ngembuan peluang milih sekeda pilih saut ke suah dikumbai opsyen dikena sida nentuka saut ti betul. Bisi empat tauka lima opsyen ti diberi. Ari sukut teknik ngaga item objektif, item objektif dibagi ngagai dua pekara iya nya stem tauka batang pekara disempulang enggau dijir pilih saut tauka opsyen. Bisi mega maya iya ngundan tiga pekara iya stimulus, stem enggau opsyen. Stimulus nya rambai jaku tauka ayat ti meransang nembiak bepikir sebedau sida macha batang pekara tauka stem. Ba rintai opsyen tauka pilih saut semina ngundan siti aja saut ti betul tauka nemban. Opsyen ti betul nya dikumbai key  tauka kunchi saut. Opsyen ti bukai nya dikumbai distrakter tauka “pengachau”. Semua opsyen ti dipilih nya mesti bisi ayan ba dalam teks bacha.

Stem tauka batang pekara ti deka ditanya suah ditulis ngena chara tanya tauka nembuka ayat.

Chunto Item ti Betukuh Tanya

Ni bagi nama di baruh tu indu nengeri menua Malaysia?
A	Kota Baru
B	Kota Kinabalu
C	Kuching
D	Kuala Lumpur

Ba tanya di atas nya, saut betul nya D; lalu A, B enggau C nya dikumbai distrakter tauka pengachau.

Chunto Item ti Betukuh Nembuka Ayat

Indu nengeri menua Malaysia iya nya
A	Kota Baru.
B	Kota Kinabalu.
C	Kuching.
D	Kuala Lumpur.

Dalam chunto ti dibantaika di atas nya ngayanka kedua-dua reti ti sebaka tang bansa tanya ti ngasuh nembuka ayat nya spesifik agi. Stem item ungkup chara nanya nya mudah agi ditulis tang iya mejal tukang ngaga item nya ngayanka pekara nya enggau terang. Stem nyangka tau nyadi panjai agi. Ba sesebengkah tanya objektif bagi tanya meretika teks bisi mega item betukuh mayuh bengkah pilih (aneka pilihan ). Item bansa tu nya item ti bechampur bansa tanya enggau penerang.

Di baruh tu dirintaika sekeda lalau ke ulih dikena nyadika malin lebuh kitai deka ngaga item objektif ti bekualiti.

(a)	Reti tauka penanggul ti dibantai ba stem mesti terang, spesifik lalu enda lebih ari siti.
(b)	Stem mesti ditulis ngena jaku ti terang lalu enda kelabur ari sukut reti. Struktur ayat enda tau kompleks lalu terus ngagai reti pekara.
(c)	Iya ti manah amat nya, penyampau leka jaku ba stem nya mesti mayuh agi ari opsyen.
(d)	Saut ti betul nya mesti 100% betul tauka iya ti pengabis manah entara semua opsyen ti diberi.
(e)	Struktur ayat ba opsyen mesti seraris tauka sama tukuh enggau stem sesebengkah item peresa.
(f)	Seliah ari ngena leka jaku ti tau meri ulu lungga ngagai saut ti betul. Pekara tu ulih nyadi enti:
	(i)	bisi leka jaku ti sama enggau iya ke ba stem enggau opsyen ti betul.
	(ii)	saut ti betul ditulis enggau lenak agi ari ke bukai.
	(iii)	meri dua pilih ti sama reti ngujungka nyamai nembiak nangkap saut ti salah.
(g)	Penyampau leka jaku ba genap iti opsyen mesti kurang lebih sama.
(h)	Ari siti item ngagai siti item, penuduk kunchi saut mesti berubah lalu enda statik. Ambika banding, anang ngaga A nyadika saut belama, tauka B enggau C aja ba tetiap item.
(i)	Opsyen ti salah enda tau nyata amat salah lebuh dibacha. Taja pan salah, opsyen nya mesti mega narit ati sekeda nembiak ke kurang meretika kereban ti dibacha sida. Mesti bisi nembiak milih opsyen ti salah.
(j)	Genap iti distrakter tauka pengachau mesti ngeruga runding nembiak, pemereti macha sida ti pandai enggau iya ke enda pandai.

Ba genap bengkah teknik ti dikena nguji pengawa meretika teks bacha, pengajar mesti ngemeratka pekara milih tibak karang tauka genteran teks. Tibak karang ti dipilih nya mesti ngayanka tuju macha enggau dalam agi lalu enda semuti macha pekara ti bekaul enggau bidang jaku tauka litericha aja. Kereban bacha ti dipilih mega patut diambi ari pun penatai ti bukai, ambika banding baka mata pelajar bukai ti patut dibacha sereta diperetika nembiak maya sida ba sekula. Tibak teks ti ngundan pekara ti nyadi, fakta, idea tauka penemu nya dikira kereban ti manah dikena nguji pemereti nembiak pasal kereban ti dibacha sida. Pemanjai kereban bacha bepanggai ba penyampau item objektif ti deka ditempa sereta peringkat nembiak ti deka diuji nya. Ambika banding, baka selama tibak teks ti ngembuan 50 – 100 leka jaku nyangka engkeman ba tikas nembiak sekula primari, 200 – 300 leka jaku nya ungkup nembiak sekula sekondari baruh lalu 400 – 600 leka jaku nya ungkup sida ke ba sekondari atas. Sekat pemanjai teks ukai pekara ti enda tau enda dititih. Iya mega dipatut dipeda nya ari sukut tikas penggemar teks bacha nya. Teks ti mudah dipereti nyangka tau panjai agi ari teks ti mar dipereti. Taja pia, tikas penggemar patut engkeman enggau tikas nembiak ti deka diuji. Kelimpah ari milih teks ti engkeman dikena nguji nembiak, jaku ti dikena mega patut diperatika lebuh milih teks kelebih agi ari sukut struktur jalai jaku enggau lebas jaku ti dikena dalam teks ti dipilih nya.

Lebuh sesebengkah teks ti engkeman udah dipilih, pengajar patut macha dulu beberapa kali lalu nyeruri tauka ngedit (enti patut) ngambika teks nya nadai ngembuan penyilap ari sukut sepil, tanda bacha, jalai jaku etb. Iya ti manah amat nya maya nempa item objektif, gaga lebih ari ti dipinta. Item nya patut dibacha beberapa kali, diubah tauka diedit dataika pengajar nya puas ati nadai bisi penyilap tauka pengelemi ari aspek teknik penumbuh iya. Item ti enda manah lalu enda ulih diseruri mesti dibuai. Semina item ti manah aja dipilih lalu dikena, iya nya selepas pengajar macha baru lalu nandu bacha genap iti item ti dpilih iya tadi.

Berapa iti item objektif ti patut digaga ba sesebengkah teks bacha? Tu ukai pekara ti tetap. Penyampau tu bepanggai ba isi teks bacha nya, pemanjai teks lalu awak ke diungkup ngagai nembiak nyaut peresa nya. Ambika banding, baka selama awak ti diberi dikena nyaut siti-siti item objektif iya nya 1 ½ minit. Tu nyengkaum awak macha teks ti diberi. Ambika chunto, 45 minit diberi ngagai nembiak nyaut tanya meretika teks ti ngundang 30 iti item objektif tauka 1 ½ jam nyaut peresa ti ngundan 60 iti item. Lebuh peresa ba bilik kelas, pengajar dipejal nitihka awak ti ungkup dalam taga jam belajar sekula, baka 40 – 45 minit tiap-tiiap taga jam belajar. Enti iya baka tu dia penyampau item ti engkeman nya kira-kira entara 25 – 30 item objektif. Ba tikas sekula primari, timpuh awak ungkup ngajar  nya pandak agi, iya nya 30 minit. Enti awak nyampau tu dikena nguji nembiak meretika teks dia 20 item objektif nya dikira engkeman.